તબીબી સ્નાતકના અભ્યાસક્રમમાં GMERS દ્વારા લાગુ કરાયેલો તોતિંગ ફી વધારો તાત્કાલિક અસરથી રદ્દ કરવા માંગ

ફી વધારાથી ગરીબ અને મધ્યમવર્ગના બાળકોનું ડૉકટર બનવાનું સપનું માત્ર સપનું જ રહેશે
ખાસ-ખબર ન્યૂઝ રાજકોટ, તા.6

સરકાર દ્વારા ગુજરાતની સામાન્ય જનતાની સ્વાસ્થ્ય ક્ષેત્રે સેવા કરવાના હેતુસહ સ્વનિર્ભર તબીબી કોલેજો ખોલવામાં આવેલી છે પરંતુ તાજેતરમાં એટલે કે 28 જૂન 2024ના રોજ ગુજરાત મેડિકલ એજ્યુકેશન અને રિસર્ચ સોસાયટી (જીએમઈઆરએસ) દ્વારા એક પરિપત્ર મારફતે શૈક્ષણિક વર્ષ 2024-25 માટે તબીબી સ્નાતકના અભ્યાસ ક્રમમાં સરકારી – સેલ્ફ ફાયનાન્સ, મેનેજમેન્ટ ક્વોટા માટે વાર્ષિક ફી ધોરણમાં લગભગ 67% થી માંડી 88% ટકા જેટલો અસહ્ય અને અસાધારણ વધારો કરવામાં આવ્યો છે. આ ફી વધારો તાત્કાલિક અસરથી રદ કરવા મુખ્યમંત્રી ભુપેન્દ્ર પટેલને આમ આદમી પાર્ટી દ્વારા રજૂઆત કરાઈ છે.
વિગતવાર જોઈએ તો જનરલ કવોટા માટે વાર્ષિક ફી રૂપિયા 5.50 લાખ અને મેનેજમેન્ટ કવોટા માટે ફી 17 લાખ જાહેર કરવામાં આવેલ છે. આ વાર્ષિક ફી ગત વર્ષોમાં જોઈએ તો 3.30 લાખ (જનરલ કવોટા) અને 9 લાખ (મેનેજમેન્ટ કવોટા) લેવામાં આવતી હતી જે આ વર્ષથી લાગુ કરેલ ફી કરતાં ઘણી ઓછી હતી.

લાગુ કરેલા ફી વધારાથી જનરલ કવોટામાં પ્રવેશ પામનાર વિદ્યાર્થી પોતાની એમબીબીએસની લાયકાત વર્ષે રૂા. 14.85 લાખથી મેળવતો હતો તે આ વર્ષેથી વધીને એમબીબીએસ પૂર્ણ થયે રૂા. 24.75 લાખ ચૂકવશે જ્યારે મેનેજમેન્ટ કવોટામાં પ્રવેશ મેળવનાર વિદ્યાર્થી 40.50 લાખથી મેળવતો હતો તે આ વર્ષથી વધીને એમ.બી.બી.એસ. પૂર્ણ થયે રૂા. 76.50 લાખ ચૂકવશે. આમ સરકાર ગુજરાતની જનતા સમક્ષ વારંવાર મોટા ઉપાડે ડબલ એન્જિન અને સંવેદનશીલ સરકારના નારાઓ લગાવે છે, શું આ રીતે ગરીબ અને મધ્યમ વર્ગના બાળકો પોતાનું ડોકટર બનવાનું સપનું પૂર્ણ કરશે? બીજું કે કદાચ આ રીતે ડોકટર બન્યા પછી પણ તે સમાજના લોકોની આરોગ્યપ્રદ સેવાઓ કરશે કે પછી અભ્યાસ કાળ દરમિયાન તેને માથે ચડી ગયેલા આર્થિક બોજને પહોંચી વળવા માટે સામાન્ય જનતાના ખિસ્સા ઉપર કાતર મૂકશે ?

આ ફી વધારાના કારણે ઘણા બધા પ્રતિભાશાળી વિદ્યાર્થીઓ તબીબી શિક્ષણથી દૂર રહેશે અને તેમના કુટુંબના ભવિષ્ય માટે ચિંતાનો વિષય બનશે. ખરેખર સરકાર આ નિર્ણયથી ગુજરાતભરના વાલીઓમાં રોષની લાગણી ફેલાયેલી છે. તો આ બાબતે ઘટતું થાય તે ખૂબ જરૂરી અને હિતાવહ છે. આમ આદમી પાર્ટી, ગુજરાત રાજ્યના તમામ વિદ્યાર્થીઓ કે જે તબીબી અભ્યાસ કરવા માટે ઉત્સુક છે તેમજ તેમના વાલીઓ અને તબીબી શિક્ષણના સાર્વત્રિક હીતોને ધ્યાનમાં રાખી ગુજરાત સરકાર દ્વારા આવેલો આ તોતિંગ ફી વધારો તાત્કાલિક અસરથી પાછો ખેંચાય તેવી માંગ કરાઈ છે.