સેન્સેક્સ લાઇફ ટાઇમ હાઇ નિફટી ૪૬૯ પોઈન્ટની છલાંગે ૨૩૨૯૦

સેન્સેક્સ ૧૬૧૯ પોઇન્ટ ઉછળી ૭૬૬૯૩, નિફટી ૪૬૯ પોઈન્ટની છલાંગે ૨૩૨૯૦:
– FPIs/FIIની રૂ.૪૩૯૧કરોડની ખરીદી : આઇટી ઇન્ડેક્સમાં ૧૧૭૫ પોઇન્ટનો તોતિંગ ઉછાળો

સ્મોલ કેપ તેમજ મિડ કેપ શેરોમાં આગઝરતી તેજી

રિઝર્વ બેંક ઓફ ઈન્ડિયાએ આજે ધિરાણ નીતિ સમીક્ષામાં વ્યાજ દર જાળવી રાખતાં અને વડાપ્રધાન નરેન્દ્ર મોદીના નેતૃત્વમાં એનડીએ સરકાર મજબૂતી સાથે દેશને આગળ લઈ જવા કામ કરશે એવા નીતિશ કુમાર, ચંદ્રાબાબુ નાયડુ, ચિરાગ પાસવાન સહિતના સાથી પક્ષોએ વિશ્વાસ આપતાં આજે ભારતીય શેર બજારોમાં ફોરેન ફંડો મંદીમાંથી તેજીમાં આવી જઈ રૂ.૪૩૯૧ કરોડના શેરોની જંગી ચોખ્ખી ખરીદી કરતાં ફિર એકબાર સેન્સેક્સ ૭૬૦૦૦ પાર અને નિફટી ૨૩૦૦૦ પાર થઈ નવો રેકોર્ડ સર્જાયો હતો. આ સાથે ગઈકાલે કોંગ્રેસ નેતા રાહુલ ગાંધીએ એક્ઝિટ પોલના નામે ચૂંટણી પરિણામના દિવસોમાં મોટું શેર કૌભાંડ થયાના કરેલા આક્ષેપોનું પણ સૂરસૂરયું થઈ જઈ આજે બજારે આ આક્ષેપોને જાણે કે લપડાક લગાવી હોય એમ તેજીનો નવો રેકોર્ડ બનાવ્યો હતો. શેરોમાં સપ્તાહના અંતે ધૂમ ખરીદી કરી ફંડો, મહારથીઓ, ખેલંદાઓએ સેન્સેક્સ ૭૬૭૯૫.૩૧ નવો ઈતિહાસ રચી અંતે ૧૬૧૮.૮૫ પોઈન્ટના ઉછાળે ૭૬૬૯૩.૩૬ની નવી વિક્રમી ઊંચાઈએ મૂકી દીધો હતો. જ્યારે નિફટી ૫૦ સ્પોટ ૪૬૮.૭૫ પોઈન્ટ ઉછળીને ૨૩૨૯૦.૧૫ બંધ રહ્યો હતો. નિફટી તેની સર્વોચ્ચ ૨૩૩૩૮.૭૦ની ઊંચાઈથી નજીવો છેટો રહ્યો હતો. બીએસઈ સ્મોલ કેપ ઈન્ડેક્સ ૧૦૩૭.૭૪ પોઈન્ટ ઉછળીને ૪૮૭૩૧.૫૫ અને બીએસઈ મિડ કેપ ઈન્ડેક્સ ૫૫૫.૭૧ પોઈન્ટની છલાંગે ૪૪૧૧૧.૪૪ બંધ રહ્યો હતો.

ઓટો શેરોમાં પૂરપાટ તેજી

ઓટોમોબાઈલ કંપનીઓના શેરોમાં આજે ફંડો, મહારથીઓએ ફરી આક્રમક ખરીદી કરી તેજીનું તોફાન મચાવ્યું હતું. મહિન્દ્રા એન્ડ મહિન્દ્રા રૂ.૧૫૭.૪૫ ઉછળીને રૂ.૨૮૫૭.૧૦, ટાટા મોટર્સ રૂ.૩૨.૨૫ ઉછળીને રૂ.૯૭૦.૪૦, બાલક્રિષ્ન ઈન્ડસ્ટ્રીઝ રૂ.૯૩.૧૫ વધીને રૂ.૩૨૦૦, અપોલો ટાયર્સ રૂ.૧૪ વધીને રૂ.૪૮૫, કયુમિન્સ ઈન્ડિયા રૂ.૮૬.૯૫ વધીને રૂ.૩૫૯૧, અશોક લેલેન્ડ રૂ.૫.૫૫ વધીને રૂ.૨૩૧.૩૦, મારૂતી સુઝુકી રૂ.૧૧૮.૮૦ વધીને રૂ.૧૨,૭૯૪.૧૫, એમઆરએફ રૂ.૧૧૭૮.૦૫ વધીને રૂ.૧,૨૭,૨૯૯, આઈશર મોટર્સ રૂ.૨૬.૮૫ વધીને રૂ.૪૭૪૫.૬૫ રહ્યા હતા. બીએસઈ ઓટો ઈન્ડેક્સ ૧૩૯૫.૩૩ પોઈન્ટ ઉછળીને ૫૬૬૨૩.૮૮ બંધ રહ્યો હતો.

આઈટી ઈન્ડેક્સની છલાંગ

આઈટી-સોફ્ટવેર સર્વિસિઝ, ટેકનોલોજી શેરોમાં ફંડોએ આજે સતત આક્રમક ખરીદી કરતાં અનેક શેરોના ભાવોમાં તેજી સાથે બીએસઈ આઈટી ઈન્ડેક્સ ૧૧૭૪.૯૯ પોઈન્ટ ઉછળીને ૩૫૯૦૯.૪૧ બંધ રહ્યો હતો. ન્યુજેન સોફ્ટવેર રૂ.૫૭.૬૫ વધીને રૂ.૯૪૭.૬૦, વિપ્રો રૂ.૨૩.૪૫ વધીને રૂ.૪૮૪.૪૫, બિરલા સોફ્ટ રૂ.૩૧.૬૦ વધીને રૂ.૬૭૮.૪૦, ટેક મહિન્દ્રા રૂ.૫૯.૩૫ વધીને રૂ.૧૩૭૭.૫૦, ઈન્ફોસીસ રૂ.૬૦.૮૫ વદીને રૂ.૧૫૩૩.૩૫, એચસીએલ ટેકનોલોજી રૂ.૩૩.૩૦ વધીને રૂ.૧૪૩૧.૦૫, ટીસીએસ રૂ.૬૨.૨૦ વધીને રૂ.૩૮૯૨.૯૦ રહ્યા હતા.

કન્ઝયુમર ઈન્ડેક્સ ઉછળ્યો

કન્ઝયુમર ડયુરેબલ્સ કંપનીઓના શેરોમાં પણ ફંડોએ આજે પસંદગીની આક્રમક ખરીદી કરતાં બીએસઈ કન્ઝયુમર ડયુરેબલ્સ ઈન્ડેક્સ ૧૨૩૮.૮૭ પોઈન્ટ ઉછળીને ૫૭૧૫૨.૭૧ બંધ રહ્યો હતો. વ્હર્લપુલ ઓફ ઈન્ડિયા રૂ.૬૯.૧૦ વધીને રૂ.૧૬૧૧.૫૦, ટાઈટન કંપની રૂ.૧૧૯.૯૦ વધીને રૂ.૩૪૪૩.૪૫, બ્લુ સ્ટાર રૂ.૪૧.૩૫ વધીને રૂ.૧૫૬૫.૬૫, ડિક્સન ટેકનોલોજી રૂ.૨૨૪.૧૦ વધીને રૂ.૯૯૮૬.૪૫ રહ્યા હતા.

હેલ્થકેર શેરોમાં તોફાની તેજી

હેલ્થકેર-ફાર્માસ્યુટિકલ્સ શેરોમાં પણ ફંડોએ આજે મોટાપાયે ખરીદી કરતાં બીએસઈ હેલ્થકેર ઈન્ડેક્સ ૫૮૯.૦૭ પોઈન્ટ ઉછલીને ૩૬૩૦૧.૮૮ બંધ રહ્યો હતો. વોક્હાર્ટ રૂ.૨૭.૨૫ વધીને રૂ.૫૭૨.૪૦, સનોફી ઈન્ડિયા રૂ.૪૫૪.૨૫ વધીને રૂ.૯૫૯૯.૨૦, આરતી ડ્રગ્ઝ રૂ.૧૯.૮૦ વધીને રૂ.૫૧૨.૭૦, શેલબી રૂ.૯.૩૦ વધીને રૂ.૨૭૨, ફોર્ટિસ હેલ્થ રૂ.૧૫.૫૦ વધીને રૂ.૪૬૧.૬૫, અલકેમ લેબ રૂ.૧૨૮.૪૦ વધીને રૂ.૪૯૫૦, ડો.રેડ્ડીઝ લેબ રૂ.૧૪૦.૫૦ વધીને રૂ.૬૦૩૭.૫૫ રહ્યા હતા.

કેપિટલ ગુડઝ ઈન્ડેક્સ ઉછળ્યો

કેપિટલ ગુડઝ શેરોમાં પણ ફંડોએ આજે આક્રમક ખરીદી ચાલુ રાખતાં બીએસઈ કેપિટલ ગુડઝ ઈન્ડેક્સ ૯૬૫.૫૯ પોઈન્ટ ઉછળીને ૬૮૮૫૨.૨૬ બંધ રહ્યો હતો. પ્રાજ ઈન્ડસ્ટ્રીઝ રૂ.૫૫.૭૦ ઉછળીને રૂ.૫૯૦.૭૫, કલ્પતરૂ પાવર રૂ.૭૯.૫૦ વધીને રૂ.૧૨૬૨, ભારત ઈલેક્ટ્રોનિક્સ રૂ.૯.૪૦ વધીને રૂ.૨૮૩.૧૦, ગ્રાઈન્ડવેલ નોટર્ન રૂ.૭૫.૩૫ વધીને રૂ.૨૬૧૨.૦૫, ભેલ રૂ.૭.૨૦ વધીને રૂ.૨૮૫.૩૫, કાર્બોરેન્ડમ રૂ.૨૯.૨૦ વધીને રૂ.૧૬૦૭.૩૦ રહ્યા હતા.

રોકાણકારોની સંપતિમાં વધારો

શેરોમાં આજે સતત ત્રીજા દિવસે આક્રમક ખરીદી થતાં રોકાણકારોની સંપતિ એટલે કે બીએસઈમાં લિસ્ટેડ કંપનીઓનું માર્કેટ કેપિટલાઈઝેશન એક દિવસમાં વધુ રૂ.૭.૬ લાખ કરોડ વધ્યું હતું. જે છેલ્લાત્રણ દિવસમાં રૂ.૨૮.૬૬ લાખ કરોડ વધીને રૂ.૪૨૩.૪૯ લાખ કરોડ પહોંચ્યું હતું.

DIIની રૂ.૧૨૯૦ કરોડની વેચવાલી

ફોરેન પોર્ટફોલિયો ઈન્વેસ્ટરો-એફપીઆઈઝ, એફઆઈઆઈઝની આજે શુક્રવારે કેશમાં શેરોમાં રૂ.૪૩૯૧.૦૨ કરોડના શેરોની ચોખ્ખી ખરીદી થઈ હતી. કુલ રૂ.૧૯,૯૪૩.૯૭ કરોડની ખરીદી સામે કુલ રૂ.૧૫,૫૫૨.૯૫ કરોડની વેચવાલી થઈ હતી. જ્યારે ડીઆઈઆઈ-સ્થાનિક સંસ્થાકીય રોકાણકારોની આજે કેશમાં રૂ.૧૨૮૯.૭૫ કરોડની ચોખ્ખી વેચવાલી થઈ હતી. કુલ રૂ.૧૫,૫૬૪.૧૭ કરોડની ખરીદી સામે કુલ રૂ.૧૬,૮૫૩.૯૨ કરોડની વેચવાલી થઈ હતી.