રાજકોટનાં કૌભાંડી ડૉ.હિરેન મશરૂનું લાયસન્સ સસ્પેન્ડ

એક વર્ષ સુધી પ્રેક્ટિસ નહીં કરી શકે!

‘ખાસ-ખબર’એ ચલાવી હતી ડૉ.મશરૂ વિરૂદ્ધ જબરદસ્ત ઝૂંબેશ

ખાસ-ખબર ન્યૂઝ રાજકોટ

રાજકોટનાં અત્યંત વિવાદાસ્પદ, કૌભાંડિયા પીડિયાટ્રિશિયન ડૉ. હિરેન મશરૂનું લાયસન્સ ગુજરાત મેડિકલ કાઉન્સિલે એક વર્ષ માટે સસ્પેન્ડ કર્યું છે. ઉલ્લેખનીય છે કે, ડૉ. મશરૂએ પોતાની હૉસ્પિટલ નિહિત બેબીકેરમાં આયુષ્યમાન યોજનાનો બેફામ ગેરલાભ ઉઠાવીને કરોડો રૂપિયા સરકાર પાસેથી ખંખેર્યા હતા. તેઓ બાળકોનાં ખોટા લેબોરેટરી રીપોર્ટ બનાવી તેમને જરૂરત વગર પણ દિવસો સુધી હૉસ્પિટલમાં દાખલ રાખતાં અને ખૂબ મોટું બિલ સરકારને પકડાવતાં.

ગુજરાત મેડિકલ કાઉન્સિલનાં ઓર્ડરમાં જણાવાયું છે કે, તપાસ દરમિયાન એ સાબિત થયું છે કે, ડૉકટર મશરૂએ ઙખઉંઅઢ યોજનાનો લાભ ખાટવા ખોટી રીતે હૉસ્પિટલમાં લાંબા ગાળા સુધી દાખલ રાખતા. ડૉ. મશરૂનાં કરતૂતો અંગે સૌ પ્રથમ ‘ખાસ-ખબર’એ ઘટસ્ફોટ કર્યો હતો. અને ‘દિવ્ય ભાસ્કર’એ પણ આ મામલે ઘણાં ધડાકાં કર્યા હતાં.

ડૉ. હિરેન મશરૂએ આયુષ્માન પોર્ટલ પર ફેક ડોક્યુમેન્ટ અપલોડ કરી કરોડોનું કૌભાંડ આચર્યું હતું
ચારેક મહિના પહેલાં રાજકોટનાં લક્ષ્મીનગર મેઈન રોડ પર આવેલી વિવાદાસ્પદ નિહિત બેબી કેર હોસ્પિટલના તબીબ ડૉ. હિરેન મશરૂએ 523 દર્દીના ખોટા રિપોર્ટ બનાવી 2.35 કરોડનું કૌભાંડ આચર્યું હતું. જેનો સનસનીખેજ ખુલાસો સૌ પ્રથમ ‘ખાસ-ખબર’ દૈનિક દ્વારા કરવામાં આવ્યો હતો. જે બાદ ગાંધીનગર આરોગ્ય વિભાગે નિહિત બેબી કેર હોસ્પિટલના ડોક્ટર હિરેન મશરૂને પેનલ્ટીનો લેટર મોકલ્યો હતો, જેમાં સ્પષ્ટપણે લખવામાં આવ્યું હતું કે, પ્રધાનમંત્રી જન આરોગ્ય યોજના અંતર્ગત પરિવારોને રૂપિયા 10 લાખ સુધીનું મફત આરોગ્ય કવચ આપવામાં આવે છે ત્યારે ડોક્ટર હિરેન મશરૂની હોસ્પિટલ દ્વારા પ્રધાનમંત્રી જન આરોગ્ય યોજના અંતર્ગત નોંધાયેલા દાવાઓ માટે જરૂરી રિપોર્ટ્સમાં ખોટી રીતે મોડિફિકેશન કરીને કુલ 116 કેસ પ્રી-ઓથ એપ્રૂવલ માટે મૂક્યા હતા. હોસ્પિટલ દ્વારા યોજનાની માર્ગદર્શિકાનું ઉલ્લંઘન કરવામાં આવતાં આ 116 કેસ રિજેક્ટ કરવામાં આવ્યા છે તેમજ એની પ્રી-ઓથ એપ્રૂવડ રકમ રૂ. 65,47,950 થાય છે. એની 10 ગણી રકમ પેનલ્ટી સ્વરૂપે સરકાર વસૂલશે અને તેમની હોસ્પિટલને પણ પ્રધાનમંત્રી જન આરોગ્ય યોજનામાંથી સસ્પેન્ડ કરવામાં આવી હતી અને વિવાદાસ્પદ નિહિત બેબી કેર હોસ્પિટલને રાજ્યના આરોગ્ય કમિશનર વિભાગ દ્વારા રૂપિયા 6,54,79,500 રૂપિયાનો દંડ ફટકારવામાં આવ્યો હતો. નિહિત બેબી કેર હોસ્પિટલ દ્વારા બાળકોના રિપોર્ટ સાથે છેડછાડ કરી આયુષ્યમાન કાર્ડ યોજનાનો દુરુપયોગ કરવાનું કૌભાંડ આચરવામાં આવ્યું હતું. ડોક્ટર હિરેન મશરુ દ્વારા ખોટા રિપોર્ટ આયુષ્યમાન પોર્ટલ પર અપલોડ કરી છેતરપિંડી આચરવામાં આવી હતી. એને લઇ નિહિત બેબી કેર હોસ્પિટલ સામે સરકારે કડક પગલા લીધાં હતાં અને થોડા સમય પૂર્વે સરકારે આ હોસ્પિટલને આયુષમાન યોજનાની સુવિધા આપતી હોસ્પિટલ્સના લિસ્ટમાંથી રદ કરી દીધી હતી. અત્રે ઉલ્લેખનીય છે કે નિહિત બેબી કેર હોસ્પિટલના તબીબ ડો. હિરેન મશરૂએ બાળકોના ખોટા રિપોર્ટ બનાવી સરકાર પાસેથી 2 કરોડથી વધુની રકમ અયોગ્ય રીતે હાંસલ કરી હતી. તેણે સ્વસ્થ બાળકોને બીમાર બતાવ્યાં હતાં. આ માટે તેણે લેબ સાથે પણ સાઠગાંઠ કરી હતી. આરોગ્ય વિભાગ દ્વારા હોસ્પિટલમાં તપાસ કરવામાં આવતાં આ સમગ્ર કૌભાંડનો ઘટસ્ફોટ થયો હતો.