આવ ભાઈ હરખા, આપણે બેઉ સરખા
મહિલા કેળવણી નિરીક્ષકની ગંભીર ફરિયાદનો હજુ પણ નિવેડો નહીં, આચારસંહિતાનું ફાલતું કારણ આગળ ધરાય છે
- Advertisement -
ખાસ-ખબર ન્યૂઝ રાજકોટ, તા.16
રાજકોટ નગર પ્રાથમિક શિક્ષણ સમિતિના ચેરમેન વિક્રમ પુજારા અને શાસનાધિકારી કિરીટ પરમારની આપ ખુદશાહીના કારણે માનસિક અને શારીરિક ત્રાસનો ભોગ મહિલા બનેલ કેળવણી નિરીક્ષક ન્યાય માટે વલખા મારી રહ્યા છે છતાં પરિણામ હજુ સુધી શૂન્ય છે.
ભાજપ આગેવાનના ઈશારે આચારસંહિતાનું કારણ ધરી મહિલા કેળવણી નિરીક્ષકને ન તો દિનેશ સદાદિયા, શૈલેષ પાડલીયા, દિપક સાગઠિયા પોલીસ ફરિયાદ કરવાની મંજૂરી આપવામાં આવે છે કે ન તો દિનેશ સદાદિયા, શૈલેષ પાડલીયા, દિપક સાગઠિયા પર કોઈ કડક કાર્યવાહી કરવામાં આવી રહી છે. બનાવની વિગત અનુસાર મહિલા કેળવણી નિરીક્ષક દ્વારા ચેરમેન અને શાસનાધિકારીને કરવામાં આવેલી અરજી સંદર્ભે ગત 16 માર્ચના રોજ હિયરીંગ ગોઠવવામાં આવ્યું હતું. શિક્ષણ સમિતિમાં ફરિયાદી મહિલા કેળવણી નિરીક્ષક વિરુદ્ધ આરોપી દિનેશ સદાદિયા સહિતના કરાયેલા હિયરીંગમાં શાસનાધિકારી કિરીટ પરમારે ઘણા નિયમ ભંગ કર્યા હોવાનું માલૂમ પડે છે. આ સંદર્ભે પણ મહિલા કેળવણી નિરીક્ષકે અરજી કરવા છતાં કોઈ જ પગલાં ભરવામાં આવ્યા નથી.
- Advertisement -
પ્રાપ્ત માહિતી અનુસાર ગત તા. તા. 9/11/2023ના રોજ મહિલા કેળવણી નિરીક્ષક દ્વારા તા. 8/11/2023ની શાળા નં. 78ની રૂબરૂ મુલાકાત લેવામાં આવી હતી. આ મુલાકાત દરમિયાન શિક્ષક સંઘના પ્રમુખ – સી.આર. સી. દિનેશ સદાદિયા તથા યુ.આર.સી શૈલેષ પાડલીયા દ્વારા શિસ્તભંગ કરવામાં આવ્યું હતું. મહિલા કેળવણી નિરીક્ષકના સ્કૂટરના ટાયરમાં છરી/બ્લેડ વડે પંચર પાડી નાખ્યું હતું અને ગેરવાજબી વર્તન કર્યું હતું. દિનેશ સદાદિયા છેલ્લા ઘણા મહિનાઓથી મહિલા કેળવણી નિરીક્ષકને માનસિક હેરાન કરતો હોય આ મામલે મહિલા કેળવણી નિરીક્ષક દ્વારા શાસનાધિકારીને ગત. તા. 9/11/2023ના રોજ અરજી કરવામાં આવી હતી. આ અરજી અન્વયે ગત 16 માર્ચે કરવામાં આવેલા હિયરીંગ પણ નિયમ વિરુદ્ધ હતું. શાસનાધિકારી કિરીટ પરમારે મહિલા કેળવણી નિરીક્ષક સાથે મોટા અવાજે વાત કરી તેને ડરાવી-ધમકાવી હતી. ત્યારબાદ મહિલા કેળવણી નિરીક્ષકની માનસિક અને શારીરિક હાલત ખરાબ થઈ જતા તેઓએ પ્રાથમિક શિક્ષણ નિયામક ગાંધીનગર, મ્યુનિસિપલ કમિશનર રાજકોટ, જિલ્લા શિક્ષણાધિકારી રાજકોટ સહિત સંબંધિત વિભાગ સમક્ષ તેમની પજવણી કરનાર શખ્સો વિરુદ્ધ પોલીસ ફરિયાદ કરવા અંગે મંજૂરી માંગી છે. જોકે આ સમગ્ર મામલે ભાજપ આગેવાનના ઈશારે હજુ સુધી કોઈ જ પ્રક્રિયા હાથ ધરવામાં આવી નથી જે ચોંકાવનારી બાબત છે.
નિયમ વિરુદ્ધ હીયરિંગ પણ થયું અને હવે તેનું રેકોર્ડિંગ પણ કિરીટ પરમાર આપતા નથી !
પુજારા અને પરમારે ક્યા પ્રકારે સત્તાનો દુરુપયોગ કર્યો?
-મહિલા કેળવણી નિરીક્ષકે અરજી કર્યા બાદ ચેરમેન પુજારા કે શાસનાધિકારી પરમારે નિયમ મુજબ ત્રણ મહિના સુધી કોઈ જ કાર્યવાહી કરી ન હતી.
– મહિલા કેળવણી નિરીક્ષક દ્વારા હિયરીંગના ઓડિયો-વિડીયો ફૂટેજ માંગવામાં આવ્યા, છતાં અપાયા નહીં. દિનેશ, શૈલેષ અને દિપક વિરુદ્ધ પોલીસ ફરિયાદની મંજૂરી પમ માંગવામાં આવી છતાં મંજૂરી અપાઈ નથી.
– મહિલા કેળવણી નિરીક્ષકના હિયરીંગ દરમિયાન નિયમ મુજબ એકપણ મહિલા સભ્ય કે મહિલા અધિકારી કે મહિલા કર્મચારીને હાજર રાખવામાં આવ્યા નહતા.
– હિયરીંગ દરમિયાન શાસનાધિકારી કિરીટ પરમારે ફરિયાદી મહિલા કેળવણી નિરીક્ષક સાથે આરોપી જેવું અત્યંત ગેરવાજબી વર્તન કર્યું હતું અને ધમકી પણ આપી હતી કે, પહવે તમારાથી નોકરી કેમ થશે તે હું પણ જોઉં છું.થ
– આરોપી દિનેશ, શૈલેષ, દિપકને બચાવવા માટે શાસનાધિકારી કિરીટ પરમારે ગોઠવેલું હિયરીંગ ગેરવાજબી છે, સત્તા ન હોવા છતાં હિયરીંગ કર્યું અને જે અરજી સંદર્ભે હિયરીંગ ગોઠવ્યું તેમાં તેની ચર્ચા જ ન કરી.
– શિક્ષણ સમિતિમાં મહિલા કેળવણી નિરીક્ષકની પજવણી કરવામાં હોવા છતાં સમગ્ર મામલે તપાસ સમિતિની રચના કેમ ન કરવામાં આવી. મહિલા સભ્યોની આવારા તત્વો દ્વારા કરવામાં આવતી પજવણીની ફરિયાદ બાદ પણ મહિનાઓ સુધી કોઈ પગલાં ભરવામાં આવ્યા નથી.
– વિદ્યાના ધામમાં એક મહિલા કેળવણી નિરીક્ષક સાથે છેલ્લા ઘણા મહિનાઓથી મામાના ભાણીયા અને તેના સાગરિતો દ્વારા કરવામાં આવી રહેલું ગેરવર્તન અને માનસિક પજવણી મામલે પક્ષના હોદ્દેદારો પણ કેમ કશું કરી રહ્યા નથી.
