જૂનાગઢ કૃષિ યુનિ. અને વેસ્ટર્ન સિડની યુનિ.વચ્ચે MoU પર હસ્તાક્ષર કર્યા

ખાસ-ખબર સંવાદદાતા
કૃષિ શિક્ષણ અને સંશોધનમાં ભાગીદારી માટે જૂનાગઢ કૃષિ યુનિવર્સીટીએ આઈ.સી.એ.આર. પુરસ્કૃત રાષ્ટ્રીય કૃષિ ઉચ્ચ શિક્ષણ કાર્યક્રમ-આઈ.ડી.પી. યોજના હેઠળ વેસ્ટર્ન સિડની યુનિવર્સિટી, સિડની, ઓસ્ટ્રેલિયા સાથે તા.18 સપ્ટે. ન્યુ દિલ્હી ખાતે એક સમજૂતી કરાર (એમઓયુ) પર હસ્તાક્ષર કર્યા છે. આ કરારનો હેતુ કૃષિ ક્ષેત્રે શૈક્ષણિક અને સંશોધન પ્રયાસોને પ્રોત્સાહન આપવાનો છે અને જૂનાગઢ કૃષિ યુનિવર્સિટીના સ્નાતક, અનુસ્નાતક અને પીએચડી વિદ્યાર્થીઓ માટે ડ્યુઅલ ડિગ્રી પ્રોગ્રામ શરૂ કરવાનો છે. દુનિયાની અલગ અલગ બાજુઓ પરની બે પ્રતિષ્ઠિત સંસ્થાઓની આ સીમાચિહ્નરૂપ ભાગીદારી વિવિધ કૌશલ્યો અને પરિપ્રેક્ષ્યોથી સજ્જ નવી પેઢીને વિકસિત કરશે તથા આ સંયુક્ત પહેલ દ્વારા વિદ્યાર્થીઓને એક વ્યાપક અને સર્વગ્રાહી શૈક્ષણિક અનુભવનો લાભ મળશે.આ ભાગીદારી એ શૈક્ષણિક લાભો ઉપરાંત, કૃષિ વિજ્ઞાનના ક્ષેત્રમાં ભારત અને ઓસ્ટ્રેલિયા વચ્ચેના સંબંધોને મજબૂત કરીને આંતરરાષ્ટ્રીય સહકાર અને પરસ્પર સમજણની ભાવનાને પ્રોત્સાહન આપવાનો પ્રયાસ છે. આ સમારોહમાં વેસ્ટર્ન સિડની યુનિ.ના કુલપતિ પ્રો.બારને ગ્લોવર અને જૂનાગઢ કૃષિ યુનિ. કુલપતિ ડો. વી. પી. ચોવટીયા ઉપરાંત કુલસચિવશ્રી ડો. પી.એમ. ચૌહાણ અને નિયામક (આઈ.ટી.) ડો. કે.સી. પટેલ એ હાજરી આપી હતી.