નાનું-મોટું મહાભારત દરેક કુટુંબમાં ભજવાતું જ હોય છે, જેમાં કૈકેયીથી માંડીને ભિષ્મ સુધીના પાત્રોના પડછાયાં અને પ્રતિકૃતિ પણ જડતી રહે છે. બોમન ઈરાની જેવા તગડાં એકટરની ઓટીટી પ્લટેફોર્મ (ડિઝની-હોટસ્ટાર) પર ડેબ્યુ કરાવતી વેબસિરિઝ માસુમ પણ એક કૌટુંબિક કોઠા-કબાડાને બયાન કરતું થ્રિલર છે. પંજાબના લોકાલ પર સેટ થયેલી માસુમ મર્ડર મિસ્ટરીની જેમ ઉઘડે છે પણ ખરેખર તો એ એક માસુમ લવસ્ટોરી છે. ચેતવણી : લવસ્ટોરી શબ્દ વાંચીને કોઈએ ગેરસમજ ન કરવી કારણકે એક બ્રિટિશ શો પરથી પ્રેરિત માસૂમ આમ જૂઓ તો આ બાપ-દીકરી વચ્ચેના શંકાના દાયરામાં ભડક્તી આગની કહાણી છે.
ગુણવંત નર્સિગ હોમ ચલાવતાં ડૉ. બલરાજ કપૂર (બોમન ઈરાની) ની શાખ અને ઈજ્જત એવી ખમતીધર છે કે તેને આમ પ્રજા પાર્ટી ચૂંટણીની ટિકિટ માટે પસંદ કરે છે અને ચૂંટણી લડવા માટે પચાસ લાખની રોકડ આપે છે પણ… એ જ વખતે ડૉ. બલરાજ કપૂરની પેરેલિસિસગ્રસ્ત પત્ની આકસ્મિક રીતે પલંગ પરથી પડી જવાથી મૃત્યુ પામે છે.
અનુસંધાન પાના નં. 15
બોમન ઈરાની માસુમનું સૌથી મોટું જમાપાસું છે અને ડૉ. બલરાજ કપૂર તરીકે તેમણે ભલભલા એકટરને ટક્કર મારે તેવો અભિનય ર્ક્યો છે, સગી દીકરી પોતાને પત્નિનો હત્યારો માને છે, તેનો અંદેશો પામી ગયા પછી પણ પુત્રી સાથેના વહેવાર દર્શાવવામાં બોમન ઈરાનીએ કમાલ કરી છે
- Advertisement -
પત્નીનું નામ ગુણવંત (ઉપાસના સીંઘ) છે અને તેના નામે જ ડૉ. કપૂર નર્સિગ હોમ ચલાવે છે… પલંગગ્રસ્ત પત્નીની સુશ્રૃષા માટે તેમણે નર્સ પણ રાખેલી છે. પતિને છોડીને આવી ગયેલી દીકરી (મંજરી ફડનવીસ) અને તેનો પુત્ર યુવાન પુત્ર (વીર રાજવંત સિંહ) પણ છે છતાં ગુણવંતના મૃત્યુ સમયે ઘરમાં માત્ર ડૉ. બલરાજ કપૂર જ હાજર હતા અને આ દુઘર્ટના બને છે. માતાના મૃત્યુના સમાચાર જાણીને દિલ્હી રહેતી નાની દીકરી સના (સમારા તિજોરી, દિપક તિજોરીની પુત્રી ) ઘરે આવે છે પણ તેને ગળા સુધી વિશ્વાસ છે કે માતાનું આકસ્મિક મૃત્યુ નથી થયું પણ હત્યા થઈ છે. સનાને ડાઉટ છે કે, આ હત્યા તેના પિતા ડૉ. બલરાજ કપૂરે (બોમન ઈરાની) જ કરી છે…
ઘરે પહોંચ્યા પછી સનાને ખબર પડે છે કે (ચૂંટણી લડવા માટે આવેલી) તોતિંગ રકમની પણ માતાના મૃત્યુ દરમિયાન જ ચોરી થઈ છે પણ પિતા પોલીસ ફરિયાદ કરતાં નથી. પત્ની ગુણવંત પલંગ પરથી પડીને મૃત્યુ પામી ત્યારે પિતા ડૉ. કપૂર એક ઈમરજન્સી પેશન્ટ માટે તેના ઘરે ગયા હતા, એવી વાત પણ જૂઠી હોવાનું સનાને ખબર પડે છે…જો કે (આપણા સિવાય એટલે કે દર્શકો સિવાય) ઘરમાં કોઈને ખબર નથી કે ઘરની તિજોરીમાંથી ચોરાયેલાં પૈસા પુત્ર (વીર રાજવંત સિંહ) એ જ તફડાવ્યાં હતા અને એ રકમનો થેલો તે તેના બોયફ્રેન્ડને આપી આવ્યો છે. બન્ને ગે (સમલિંગી) છે. વિદેશ ભાગી જવાનું પ્લાનિંગ કરી રહ્યાં છે અને…
ઘરભંગ થઈને આવેલી ડૉ. કપૂરની મોટી દીકરી પણ છે. પિતા પાસે રહેવું કે પતિ પાસે ચાલ્યા જવું, એ નક્કી તે નથી કરી શક્તી. આવા અંદર-અંદર ગૂંચવાયેલાં પરિવારની માસુમ ની કથા (લેખક- સત્યમ ત્રિપાઠી) છે. ડિરેકટર મિહિર દેસાઈએ એવી ખુબીથી માસુમ નું ડિરેકશન ર્ક્યું છે કે, સત્ય જાણવાની આપણી તાલાવેલી અંત સુધી બરકરાર રહે છે. ડિરેકટર ઓફ ફોટોગ્રાફી (ડીઓપી) વિવેક શાહની છે. બોમન ઈરાનીના દાદુ એક્સપ્રેશન તેમણે ખુબીથી ઝીલ્યાં છે, એ સ્વીકારવું રહ્યું. (વિવેક શાહ આપણા ચિંતક-લેખક ગુણવંત શાહના પુત્ર છે.) બોમન ઈરાની માસુમનું સૌથી મોટું જમાપાસું છે અને ડૉ. બલરાજ કપૂર તરીકે તેમણે ભલભલા એકટરને ટક્કર મારે તેવો અભિનય ર્ક્યો છે. સગી દીકરી પોતાને પત્નિનો હત્યારો માને છે, તેનો અંદેશો પામી ગયા પછી પણ પુત્રી સાથેના વહેવાર દર્શાવવામાં બોમન ઈરાનીએ કમાલ કરી છે તો પત્ની ઉપાસના સીંઘને આપણે કપિલ શર્માના શોમાં કોમેડી કરતાં જોયા છે પણ અહીં નાનકડાં પાત્રમાં પણ એ અલગ ઈમેજ ઉભી કરી શક્યાં છે.
માસુમની કથા આમ તો પિતા-પુત્રી વચ્ચેની છે અને પુત્રી સનાના પાત્રમાં સમારા તિજોરીએ પણ સરસ કામ ર્ક્યું છે પરંતુ પંજાબી પોલીસમેન તરીકે મનુ રીશી ચઢૃા વેડફાયા હોય એવું લાગે છે. આ પોલીસમેન સિરિઝના ઓપિનિંગમાં જ આપે છે એટલે એવી ધારણાં બને કે છેલ્લે કશુંક જરૂરથી બનશે… એક વખત તો પુત્રી સના માતાની હત્યા થઈ હોવાની એફઆઈઆર લખાવવાની વાત પણ આ પોલીસમેનને કરે છે પણ…
શું ગુણવંત કપૂરનું મૃત્યુ આકસ્મિક હતું ? શું પતિએ જ તેની હત્યા કરી હતી ? દીકરા કે મોટી દીકરી કે હડધૂત થયેલાં જમાઈની કોઈ ભૂમિકા હતી અને બિમાર ગુણવંત કપૂરની હત્યા થઈ તો શા માટે થઈ ? માસુમ આ તમામ પ્રશ્નોના જવાબ તો આપે જ છે પણ આ સિરિઝનો બીજો ભાગ બને, એ માટેનો ટવિસ્ટ પણ ઉમેરવામાં આવે છે. છેલ્લાં એપિસોડના એન્ડ ટાઈટલ વખતે રિમોટનો ઉપયોગ ના કરતાં, ટવિસ્ટ ત્યાર પછી દર્શાવાયો છે
ડ્રાઇવિંગ લાયસન્સ અને સેલ્ફી
મલયાલી ફિલ્મના સુપરસ્ટાર હરિન્ને (પૃથ્વીરાજ સુકુમારન) પોતાની ફિલ્મનો કલાઈમેક્સ શૂટ કરીને પત્નીના એડવાન્સ્ડ બોડી ચેકઅપ માટે અમેરિકા જવું છે પણ કલાઈમેક્સ વખતે તેણે કાર ચલાવવાની હોવાથી ડ્રાયવીંગ લાયસન્સની કોપી આપવાની છે. હરિન્ને રિન્યુ કરાવવા માટે ડ્રાયવીંગ લાયસન્સ એજન્ટને આપ્યું છે પરંતુ એજન્ટ દૂબઈ ગયો છે તેથી… તાત્કાલિક ડ્રાયવીંગ લાયસન્સ મેળવવું જરૂરી છે એટલે છેડાં લગાવીને આરટીઓના ડ્રાયવીંગ ઈન્સ્પેકટર કુરૂવીલા (સુરજ વેનીરામુડ) ને ભલામણ કરવામાં આવે છે. સુપરસ્ટાર હરિન્નનો પાક્કો ફેન કુરૂવીલા (ખાનગી રાહે) તાબડતોબ લાયસન્સ કાઢી આપવા તૈયાર છે પણ તેની રિક્વેસ્ટ છે કે એક વખત સુપરસ્ટાર તેની આરટીઓ સ્થિત ઓફિસમાં આવે અને સેલ્ફી ખેંચાવે.
ગરજના માર્યો સુપરસ્ટાર હરિન્ન એ શરત મંજૂર રાખે છે એટલે આરટીઓ ઈન્સ્પેકટર કુરૂવીલા એ દિવસે પોતાના ટીનએજ પુત્રને પણ ઓફિસે સાથે લઈ આવે છે કે જેથી સુપરસ્ટારને મળી શકાય અને યાદગિરી તરીકે એક સેલ્ફી લઈ શકાય પણ… એ પછી એવું બને છે કે ચાહક કુરૂવીલા સુપરસ્ટાર હરિન્ન સાથે ટશન થઈ જાય છે, પણ પછી શું થાય છે ? લડાઈ કેવી આગળ વધે છે ? હરિન્ન આરટીઓ ઈન્સ્પેકટર કેવી લેફટ રાઈટ લે છે અને અંતમાં શું થાય છે ર019 માં આવેલી ડિરેકટર લાલ જૂનિયરે બનાવેલી મલાયલમ ફિલ્મ ડ્રાયવીંગ લાયસન્સ એક હિટ ફિલ્મ હતી. તેનો વિષય વેગળો હતો અને ઘટનાઓ એવી છે કે જે સામાન્ય રીતે આપણે સિનેમના પરદે જોઈ નથી. એમેઝોન પ્રાઈમ પર હિન્દી ભાષામાં પણ જોવા મળી શક્તી ડ્રાયવીંગ લાયસન્સ ની વાત અહીં સકારણ ઉખેળવામાં આવી છે કારણકે આ જ ફિલ્મ હિન્દી ભાષામાં પણ બની રહી છે, જેનું નામ સેલ્ફી છે. સુપરસ્ટાર અને આરટીઓ ઈન્સ્પેકટરનું કિરદાર તેમાં અક્ષ્ાયકુમાર અને ઈમરાન હાશ્મી ભજવી રહ્યા છે. સેલ્ફી રિલિઝ થાય ત્યારે ટિકિટ ખર્ચવી કે કેમ, એ નક્કી કરવા માટે પણ ડ્રાયવીંગ લાયસન્સ જોવા જેવું છે
