ખાસ-ખબર ન્યૂઝ જૂનાગઢ, તા.9
જૂનાગઢ જિલ્લામાં પ્રાકૃતિક ખેતીનો વ્યાપ વધે તે માટે સતત જુદા જુદા સ્તરે પ્રયાસો કરવામાં આવી રહ્યા છે. પ્રાકૃતિક ખેતીના પ્રત્યક્ષ લાભોની જાણકારી મળે અને પ્રાકૃતિક ખેતી અપનાવે તે માટે જિલ્લાના ખેડૂતોને પ્રાકૃતિક કૃષિ ના પ્રશ્નોનું નિરાકરણ મળે તે માટે જુદી-જુદી તાલીમોનું આયોજન કરવામાં આવે છે, ઉપરાંત જિલ્લામાં આવેલા જુદા-જુદા મોડલ ફાર્મની મુલાકાત કરાવી ખેડૂતોને તેના માટે ની માહિતી પૂરી પાડવામાં આવે છે.
જૂનાગઢ જિલ્લામાં ઉત્પાદિત પ્રાકૃતિક જણસીના નમુનાઓ એકત્ર કરી કૃષિ યુનિ.અંતર્ગત ફૂડ ટેસ્ટિંગ લેબોરેટરી ખાતે ચકાસણી કરવામાં આવી હતી જેમાં જિલ્લા માંથી જણસીના નમૂનારૂપે ફળ, અનાજ અને કઠોળના નમુના એકત્ર કરવામાં આવ્યા હતા આ દરેક નમૂનાને યોગ્ય રીતે પેક કરી ફૂડ ટેસ્ટિંગ લેબોરેટરી ખાતે લાવવામાં આવ્યા હતા.બાદમાં વિવિધ સ્તરે તેની વૈજ્ઞાનિક ઢબે ચકાસણી કરવામાં આવી હતી.આ નમૂના ઉપર નિયત પદ્ધતિ મુજબ પેસ્ટીસાઈડ રેસીડ્યુઅલ ટેસ્ટ કરવામાં આવ્યા હતા. આ પેસ્ટીસાઈડ રેસિડ્યુઅલ ટેસ્ટમાં ખાદ્ય પદાર્થોમાં જુદા-જુદા 228 પ્રકારના જંતુનાશકોનું પ્રમાણ છે કે નહી તેની ચકાસણી કરવામાં આવે છે.
આ સંપૂર્ણ ચકાસણીને એક સપ્તાહ જેટલો સમય લાગે છે, જેમાં જિલ્લાના 19 જેટલા પ્રાકૃતિક કૃષિ પેદાશોના પરીક્ષણના પરિણામો આનંદદાયક આવેલા છે. જેમાં 19 માંથી 19 નમૂનામાં 228 પ્રકારના જંતુનાશકોની લેસ માત્ર હાજરી જોવા મળેલ નથી. જેનો મતલબ એ છે કે પ્રાકૃતિક કૃષિ પદ્ધતિથી ઉત્પાદિત અનાજ, ફળ, શાકભાજી પણ આરોગ્ય માટે માનવ સ્વાસ્થ્ય, પશુ તથા પક્ષી માટે એકદમ અનુકૂળ છે.
