ટેટ-1ની 85% અને ટેટ-2 ની 89% ઉમેદવારોએ આપી પરીક્ષા

રાજય પરીક્ષા બોર્ડ દ્વારા પરિણામ તૈયાર કરવા કાર્યવાહી

ખાસ-ખબર સંવાદદાતા
રાજયની પ્રાથમિક શાળાના દિવ્યાંગ વિદ્યાર્થીઓ માટે ખાસ શિક્ષકોની ભરતી કરવા રાજય પરીક્ષા બોર્ડ દ્વારા ટેટ-1 અને ટેટ-2 લેવામાં આવી હતી. જેમા ટેટ-1માં 85 ટકા અને ટેટ-2 માં 89 ટકા ઉમેદવારો પરીક્ષા આપવા માટે હાજર રહ્યા હતા.પરીક્ષા માટે અમદાવાદની 8 જેટલી શાળાઓમાં કેન્દ્રો નકકી કરાયા હતા. પરીક્ષા પૂર્ણ થતા હવે રાજય પરીક્ષા બોર્ડ દ્વારા પરિણામ તૈયાર કરવા અંગેની કાર્યવાહી હાથ ધરવામાં આવી છે.

રાજયની પ્રાથમિક શાળાના દિવ્યાંગ વિદ્યાર્થીઓ માટે ખાસ શિક્ષકોની ભરતી કરવા માટે રાજય સરકાર દ્વારા નિર્ણય લેવામા આવ્યો હતો. જેના પગલે પ્રાથમિક શાળાના શિક્ષકોની જેમ જ ખાસ શિક્ષકો માટે પણ ધોરણ 1 થી 5 માટે ટેટ-1 અને ધો.6 થી 8 માટે ટેટ-2 લેવાનો નિર્ણય કરાયો હતો. આ બંને પરીક્ષા માટે 23 ફેબ્રુ્રઆરીથી ઓનલાઈન ફોર્મ ભરવાની કાર્યવાહી શરૂ થઈ હતી. આ પરીક્ષા 25 મેના રોજ લેવામા આવી હતી. તેના માટે અમદાવાદ શહેરની કુલ 8 શાળાઓમા આ પરીક્ષા વ્યવસ્થા ગોઠવવામા આવી હતી.જયાં ટેટ-1 ની પરીક્ષા માટે કુલ 2273 જેટલા ઉમેદવારો નોંધાયા હતા. જેમાંથી પરીક્ષાના દિવસે 1927 ઉમેદવારો ગેરહાજર રહ્યા હતા.

આમ ટેટ-1 ની પરીક્ષામાં 84.78 ટકા ઉમેદવારો પરીક્ષા આપવા માટે આવ્યા હતા.ટેટ-2 ની પરીક્ષા માટે 2034 ઉમેદવારો નોંધાયા હતા. જેમાંથી પરીક્ષા વખતે 1803 ઉમેદવારો હાજર રહ્યા હતા અને 231 ઉમેદવારો ગેરહાજર રહ્યા હતા. આમ, ટેટ-2 ની પરીક્ષામાં 88.64 ટકા જેટલી હાજરી નોંધાઈ હતી.ટેટ-1માં વિવિધ હેતુલક્ષી મળી 150 પ્રશ્નો પૂછાયા હતા અને તેના માટે ઉમેદવારોને 90 મીનીટનો સમય અપાયો હતો.