રાજકોટમાં વધુ એક કારખાનેદાર ડિજિટલ એરેસ્ટનો ભોગ બન્યા
જાગૃતતા વચ્ચે સાયબર ક્રાઈમ પોલીસ મથકમાં કારખાનેદારે નોંધાવી ફરિયાદ
ખાસ-ખબર ન્યૂઝ રાજકોટ
- Advertisement -
રાજકોટમાં વધુ એક ડિજિટલ અરેસ્ટનો કિસ્સો પોલીસ ચોપડે નોંધાયો છે જેમાં કારખાનેદારને ઈડીના નામે વોટ્સએપ કોલ કરી 7 કલાક ડિજિટલ અરેસ્ટ રાખી ફોટા વાળું વોરન્ટ મોકલી 5.35 લાખ રૂપિયા પડાવી લીધાની રાજકોટ શહેર સાયબર ક્રાઇમ પોલીસ સ્ટેશનમાં ફરિયાદ નોંધાઈ છે.
રાજકોટના કાલાવડ રોડ પર પ્રદ્યુમન પાર્કમાં રહેતા અને જી.આઈ.ડીસીમાં કાસ્ટિંગની ભઠી ચલાવતા પ્રવિણભાઈ ધીરજભાઈ ઉંધાડ ઉ.47એ બી.એન.એસ કલમ319(2), 308(2), 336(2)(3). 351(2), 340(2), 204, 127 તથા આઈ.ટી એક્ટ કલમ 66(ડી) મુજબ સાયબર ક્રાઇમ પોલીસ સ્ટેશનમાં નોંધાવેલી ફરિયાદમાં જણાવ્યું હતું કે ગઇ તા.29/1/2025 ના રોજ હું મારા કારખાના ઉપર હતો તે દરમ્યાન સવારે 9:54 વાગ્યે મારા ફોનમાં વોટસએપ કોલ આવેલ જેમા સામેના માણસે તેની ઓળખાણ અરેસ્ટિંગ ઓફિસર નીરજ કુમાર, એસસીસ્ટન્ટ ડિરેક્ટર, ડાયરેક્ટોરેટ ઓફ એન્ફોરસમેન્ટ (ઈડી) મુંબઈ તરીકે ઓળખાણ આપી હતી આ વ્યક્તિએ મને જણાવેલ કે તમારા નામે ઇસ્યુ થયેલ સિમકાર્ડ વાપરનાર વ્યક્તિએ તમારા નામે કેનેરા બેંકમાં ખાતું ખોલાવી ગેરકાયદેસર નાણાકિય વહિવટો કરેલા છે જેને અમે પકડ્યો છે જેથી તમારા બેંકના ખાતાની ચકાસણી કરવાની છે. તેમ વાત કરી એક અજાણ્યા વ્યક્તિનો ફોટો મોકલ્યો હતો જે મેં જોયો અને હું સામેના વ્યક્તિને ઓળખતો નથી અને મેં આવુ કોઈ મારા નામનું સિમ કાર્ડ કઢાવેલ ન હોઈ તેમજ હું કોઇ ઓનલાઈન નાણાકિય વ્યવહાર કરતો નથી તેમ જણાવેલ જેથી સામેની વ્યક્તિએ મને કાયદાકિય બાબતે ડરાવેલ અને મારા વોટસએપમાં મારા નામનું મારા ફોટા સાથેનું ડીજીટલ અરેસ્ટ વોરંટ મોકલી તમને અરેસ્ટ કરવામાં આવેલ છે તેમ જણાવી જે વોરંટ મેં જોતા તેમા સહી સિકકા કરેલ હતા જેથી હું ખુબ જ ગભરાઈ ગયેલ અને તેમના કહેવા મુજબ હુ કરવા લાગેલ હતો વધુમાં પ્રવિણભાઈએ જણાવ્યું કે, આ વ્યક્તિએ આરટીજીએસથી મારા ખાતામાં રહેલ બધા પૈસા વેરિફિકેસન કરવા માટે તેમના ખાતામાં નાખવા જણાવેલ તેમના બેંક એકાઉન્ટ નંબર લખાવેલ જેના એકાઉન્ટ ધારક કૌશ્તી અજયકુમાર હતા ઓઢવ બ્રાંચ અમદાવાદનું બેંક એકાઉન્ટ હતું એકાઉન્ટમાં રૂ.5,35,000નુ આરટીજીએસ કરવા જાણાવેલ ફોન ચાલુ રાખવા અને બીજા કોઇને વાત ન કરવા ધમકી આપી હતી.
જેથી હું મારા કારખાનેથી નિકળી મારા ઘરે જઈ, ચેકબુક લઈ ઘર નજીક આવેલ રાજનગર ચોકમાં એસબીઆઈ બેંકમાં જઈ સામે વાળી વ્યક્તીના કહેવા મુજબ ચાલુ ફોને મારા બેંક એકાઉન્ટમાંથી 5,35,000નું આરટીજીએસ કર્યું હતું ફોન ચાલુ રહેવા દેવાનું જણાવી ઘરે જઈને એક રૂમમાં એકલા બેસી રહેવા અને કોઈની પણ સાથે વાત ન કરવા ધમકી આપી હતી મેં તે મુજબ જ કરેલ તે પછી અડધો કલાક પછી આ વ્યક્તિએ તથા અન્ય એક મહિલાએ મારી સાથે વાત કરેલ. મને જણાવેલ કે તમારા બેંન્ક એકાઉન્ટનું વેરીફિકેશન થઈ ગયેલ છે અમારી કસ્ટડીમાં રહેલ વ્યક્તિ સાથે તમારે કોઈ પણ પ્રકારની લેતી-દેતી નથી જેથી તમને અમે ડિજિટલ અરેસ્ટમાંથી મુક્ત કરીએ છીએ. અડધો કલાકમાં તમારી રકમ તમારા એકાઉન્ટમાં પાછી આવી જશે ત્યારબાદ પોણા ચારેક વાગ્યે મારો મિત્ર સંજયભાઈ નારણભાઈ કોરાટ મારા ઘરે આવતા મેં આ બધી વાત કરતા તેમણે મને મારી સાથે છેતરપીંડી થયેલ હોવાનું જણાવતા મે આ સામેવાળી વ્યક્તિના મોબાઈલમાં ફોન કરતાં ફોન બંધ આવતો હોય જેથી અમે રાજકોટ તાલુકા પોલીસ સ્ટેશનમાં જઈ ઓનલાઈન 1930માં ફરીયાદ કરતાં ફરિયાદ પરથી ગુનો નોંધી પીઆઇ આર. જી. પઢિયારે વધુ તપાસ હાથ ધરી હતી.