મોરબીમાં મહિલા સફાઈ કર્મચારી પર દુષ્કર્મ આચરનાર બંને હવસખોરો પર ચારેય બાજુથી ફિટકાર

વડવાળા યુવા સંગઠને કલેક્ટરને આવેદન પાઠવ્યું, પીડિતાને યોગ્ય ન્યાય આપવાની સાથે રાત્રી સફાઈ કરતી પાલિકાની મહિલાકર્મીઓને સુરક્ષા પુરી પાડવા માંગ

મોરબીના યંગ ઈન્ડિયા ગ્રુપે દુષ્કર્મની ઘટનાની ઉગ્ર નિંદા કરી

ખાસ-ખબર સંવાદદાતા
મોરબીના રવાપર નજીક રાત્રીના સફાઈ કરતી મહિલા પર બે નરાધમોએ દુષ્કર્મ આચર્યું હોવાની ઘટનાના ઘેરા પ્રત્યાઘાત પડ્યા છે જેમાં વડવાળા યુવા સંગઠન મોરબીએ કલેકટરને આવેદન આપી આ દુષ્કર્મના હીન કૃત્યને વખોડી કાઢી પીડિતાને યોગ્ય ન્યાય આપવા તેમજ બંને નરાધમોને આકરી સજા કરવાની માંગ ઉઠાવી છે.

વડવાળા યુવા સંગઠન મોરબીએ જીલ્લા કલેકટરને આવેદન આપીને જણાવ્યું હતું કે, રવાપર ગામ પાસે થોડા દિવસ પહેલા રાત્રી સફાઈ કરતી એક આધેડ વયની મહિલાને બે નરાધમોએ હવસનો શિકાર બનાવી હતી જેમાં બંને નરાધમોએ મહિલાને બળજબરીથી કારમાં અપહરણ કરી જઈને હેવાનીયતભર્યું દુષ્કૃત્ય આચર્યું હતું એટલું જ નહીં મહિલાને ઢોર માર પણ માર્યો હતો જો કે પોલીસે ત્વરિત કાર્યવાહી કરીને બંને આરોપીઓને ઝડપી લીધા હતા પરંતુ રાત્રીના સફાઈ કરતી મહિલા ઉપર આવું અધમ કૃત્ય આચરવું તે ઘણું જ શરમજનક કૃત્ય છે. આથી આ ધૃણાસ્પદ ઘટનાને વખોડી કાઢી પીડિતાને યોગ્ય ન્યાય આપવા તેમજ બંને નરાધમોને આકરી સજા કરવાની તેમજ રાત્રી સફાઈ કરનાર નગરપાલિકાની તમામ મહિલા કર્મચારીઓને સુરક્ષા પુરી પાડવાની માંગ ઉઠાવી છે.

સમાજની સુખાકારી માટે દિવસ રાત જોયા વગર ફરજ બજાવતા સફાઈ કર્મચારીઓને વડાપ્રધાન નરેન્દ્ર મોદીએ સફાઈ સૈનિકનું બિરુદ આપ્યું છે ત્યારે મોરબીમાં મધ્યરાત્રીએ ફરજ બજાવતા વૃદ્ધ મહિલા સફાઈ સૈનિકની એકલતાનો લાભ લઈને બે નરાધમ હવસખોરો દ્વારા અપહરણ કરી દુષ્કર્મ ગુજારવામાં આવતા આ હીંચકારી ઘટનાને મોરબીના યંગ ઇન્ડિયા ગ્રુપ દ્વારા સખત શબ્દોમાં વખોડી કાઢવામાં આવી છે અને રાત્રે તેમજ વહેલી સવારે નિષ્ઠા પૂર્વક ફરજ બજાવતા મહિલા સફાઈ કામદારોની એકલતાનો લાભ લઇ આવી ઘટનાનું પુનરાવર્તન ન થાય તે માટે મોરબી પાલિકા તંત્ર દ્વારા યોગ્ય સુપરવિઝન તેમજ ખાનગી કોન્ટ્રાકટર દ્વારા કામગીરી કરવામાં આવતી હોય તેવા કિસ્સામાં કોન્ટ્રાકટર દ્વારા પૂરતી સુરક્ષા વ્યવસ્થા ગોઠવવાની સાથે પોલીસ તંત્ર દ્વારા પણ મહિલા સફાઈ કર્મચારીઓની સુરક્ષા નિશ્ચિત કરવા માંગ ઉઠાવવામાં આવી છે.