પોલીસ દ્વારા સ્લોગન અને મોકડ્રિલ દ્વારા લોકોમાં જાગૃતિ લાવવાનો પ્રયાસ કરાયો
ખાસ-ખબર સંવાદદાતા
દેશભરમાં 75માં ગણતંત્ર દિવસની ઉજવણી કરવામાં આવી હતી ત્યારે રાજકોટ શહેર પોલીસ દ્વારા પ્રજાસત્તાક પર્વને લઈને કાર્યક્રમ યોજાયો હતો, જેમાં પોલીસ પરેડની સાથે વિદ્યાર્થીઓનો સાંસ્કૃતિક કાર્યક્રમ પણ યોજાયો હતો. આ તકે પોલીસ કમિશનરે રામરાજ્યની સ્થાપનાની હાંકલ કરી હતી. આ તકે મુસાફરો ભરેલી બસને હાઈજેક કરતા 2 આતંકવાદીઓને ઠાર મરાયા હતા તો બોમ્બ ડિસ્પોઝ કરી મુસાફરોને બચાવી લેવાયા હતા. જોકે, બાદમાં તે મોકડ્રીલ હોવાનુ જાહેર થયું હતુ.
રાજકોટનાં પોલીસ હેડ ક્વાટર ખાતે સ્થિત પોલીસ પરેડ ગ્રાઉન્ડમાં અલગ-અલગ પ્લાટૂનમાં પોલીસ જવાનો તેમજ સ્ટુડન્ટ કેડેટ દ્વારા અદભૂત પરેડ કરવામા આવી હતી. આ તકે વાહનો ચલાવતા મોબાઈલ પર વાત ન કરવા, સાયબર ક્રાઇમથી એલર્ટ રહેવા ઉપરાંત મદ્યપાન કરી વાહન ન ચલાવવા, સીટ બેલ્ટ ફરજિયાત બાંધવા સહિતનાં સ્લોગન દર્શાવવામાં આવ્યા હતા.
- Advertisement -
આ તકે પોલીસ કમીશ્નર રાજુ ભાર્ગવે જણાવ્યું હતું કે, ભારત દેશને આઝાદી અપાવવા માટે અનેક સ્વાતંત્ર્ય કુરબાની આપી છે. જેથી આ પવિત્ર ધરતી પર જન્મવાનું ગૌરવ છે. આ તકે તેમણે કહ્યું કે, 500 વર્ષ બાદ ભગવાન શ્રીરામની પુન: સ્થાપના થઈ છે અને અયોધ્યામાં રામ મંદિરનો પ્રાણ પ્રતિષ્ઠા મહોત્સવ થયો છે ત્યારે ભારત દેશના બંધારણમાં પણ રામરાજ્યની કલ્પના કરવામાં આવી છે. જેથી આપણું રાજ્ય અને શહેર રામરાજ્યની માફક બને તે જરૂરી છે આ પ્રકારના રામરાજ્યમાં તમામ લોકો કોઈપણ જાતના ભય વિના સુખ અને શાંતિથી રહી શકે છે અને શાસકો પણ ભગવાન રામની જેમ રાજ્યનો કારભાર ચલાવે તે જરૂરી છે.
આ દરમિયાન શાળાઓના વિદ્યાર્થીઓ દ્વારા અદભુત સાંસ્કૃતિક કાર્યક્રમ પ્રસ્તુત કરવામાં આવ્યા હતા. જેમાં વાહન ચલાવતા મોબાઈલ પર વાત કરતા હોય તો અકસ્માત સર્જાય તે પ્રકારની લોકોને જાગૃત કરતી કૃતિ રજૂ કરવામાં આવી હતી. ત્યારબાદ અચાનક પોલીસ પરેડ ગ્રાઉન્ડમાં બોમ્બ બ્લાસ્ટ થયો હતો અને તુરંત જ પોલીસ અને બોમ્બ ડિસ્પોઝ કરતી ક્વિક રિસ્પોન્સ પોલીસ ટીમ આવી પહોંચી હતી આ દરમિયાન આતંકવાદીઓએ બસ હાઈજેક કરી લીધી હતી. જેથી તેમાં બેસેલા મુસાફરો ડરી ગયા હતા.
આ દરમિયાન ક્વીક રિસ્પોન્સ ટીમના પોલીસ જવાનો તુરંત ત્યાં પહોંચી ગયા હતા અને બસમાં મુસાફરોને બંધક બનાવતા 2 આતંકવાદીને ઠાર મારી દીધા હતા અને 1 આતંકવાદીને ઝડપી પાડ્યો હતો. આ દરમિયાન એક પોલીસ જવાન પણ ઘાયલ થયો હતો. જોકે બાદમા આ મોકડ્રીલ હોવાનુ જાહેર થતાં ઉપસ્થિત સૌ કોઈએ હાશકારો લીધો હતો.
