હે પાર્થ, હૃદયની તુચ્છ દુર્બળતા ત્યજી દઈને તું ઊભો થા. તને આવી નબળાઈ શોભા નથી દેતી.

કથામૃત :
જાપાનમાં રહેતા સોઇચિરો નામના એક ઇજનેરે કારમાં વપરાતા પિસ્ટનની ખાસ ડિઝાઈન તૈયાર કરી. આ પિસ્ટનની ડિઝાઈન તૈયાર કરવામાં એણે પોતાની જાત હોમી દીધી હતી. રાત-દિવસના ઉજાગરા પછી તૈયાર કરેલી આ ડિઝાઈન સોઇચિરો માટે સર્વસ્વ હતું. પિસ્ટનની ડિઝાઈન લઇને એ તે સમયની કાર ઉત્પાદનમાં અવલ્લ ગણાતી ટોયેટો કંપનીના એન્જિનિયર્સને મળ્યો. સોઇચિરોનું સપનું હતું કે ટોયેટો કંપની એની ડિઝાઈન સ્વીકારે અને ડિઝાઈન મુજબના પિસ્ટન પુરા પાડવાનો કંપની તરફથી એમને ઓર્ડર મળે. કંપનીના ઇજનેરોએ ડિઝાઈન પર નજર નાંખ્યા વગર જ ડિઝાઈનને રીજેક્ટ કરી દીધી. સોઇચીરો હિંમત હાર્યા વગર વારંવાર કંપનીનો સંપર્ક કરતા રહ્યા. વારંવારના પ્રયત્નોના પરિણામરુપે એ ટોયેટો કંપનીના ટોપ મેનેજમેન્ટને મળવામાં અને સમજાવવામાં સફળ રહ્યા. કંપની તરફથી એમની ડિઝાઈન સ્વીકારવામાં આવી અને પિસ્ટન પુરા પાડવાનો ઓર્ડર આપવામાં આવ્યો. સોઇચિરોને પોતાનું સપનું સાકાર થતું હોય એમ લાગ્યું. પોતાની બધી જ સંપત્તિનું રોકાણ કરીને પિસ્ટન બનાવવા માટેની ફેકટરી નાંખી. હજુ તો ઉત્પાદન શરૂ થાય એ પહેલા જાપાનમાં ભયંકર ભૂકંપ આવ્યો અને ઉભી થયેલી ફેકટરી જમીનદોસ્ત થઇ ગઇ. ફેકટરી પડી ભાંગી પણ સોઇચિરોની હિંમત અણનમ હતી. એણે સગાસંબંધીઓ અને મિત્રો પાસેથી ઉછીના નાણા લઇને ફરીથી નવી ફેકટરી ઉભી કરી. ભગવાન પણ જાણે કે એની કસોટી કરતા હોય એમ ફેકટરી તૈયાર થઇ તે જ સમયે બીજુ વિશ્વયુદ્ધ શરૂ થયું. એક બોંબ સોઇચિરોની ફેકટરી પર પડ્યો અને બધુ જ ખતમ થઇ ગયું. આ માણસ હિંમત હાર્યા વગર ફરીથી મંડી પડ્યો. બેંક પાસેથી લોન મેળવીને ત્રીજીવાર ફેકટરી ઊભી કરી. પિસ્ટનનું ઉત્પાદન પણ શરૂ થઇ ગયું પણ હવે એક નવી સમસ્યા આવી. સમયસર પિસ્ટન પૂરા ના પાડવાને કારણે ટોયેટો કંપનીએ પિસ્ટન પૂરા પાડવાનો ઓર્ડર જ રદ કરી દીધો. સોઇચિરોએ પોતાની મુશ્કેલી સમજાવી પણ કંપની તરફથી કોઇ પ્રતિભાવ ના મળતા પિસ્ટનનો ઉપયોગ કરવા પોતે જ હવે કાર બનાવશે એમ નક્કી કર્યું. આ માટે એણે ઘણો સંઘર્ષ કરવો પડ્યો પણ પોતાના બનાવેલા પિસ્ટનનો ઉપયોગ કરવા માટે સોઇચિરો હોન્ડાએ સ્થાપેલી કાર ઉત્પાદન કરનારી કંપની હોન્ડા આજે ટોયેટોથી પણ આગળ નીકળી ગઇ છે.

નિષ્ફળતા દરેકના જીવનમાં આવે છે પણ જે માણસ નિષ્ફળતાથી ડરી જવાના બદલે નિષ્ફળતાઓને જ ડરાવી દે છે એને સફળતા વરમાળા પહેરાવે છે. જે માણસ હતાશા કે નિરાશાને ખંખેરીને ઊભો થાય છે, તેને ભગવાન સાથ આપે છે અને જેની સાથે ભગવાન હોય એનો હંમેશા વિજય થાય છે.

અનુભવામૃત
કોઈપણ સફળતા અંતિમ નથી અને કોઈપણ નિષ્ફળતા અંત નથી. માંડ્યા રહેવાનું ઝનૂન જ મહત્ત્વનું છે. -વિન્સ્ટન્ટ ચર્ચિલ