રાજકોટમાં 2014માં હત્યા કરી નાસી છૂટેલો શખસ 11 વર્ષ પછી પકડાયો

સતત ત્રણ દિવસ સુધી જવાનોએ દૂધવાલા, નાળિયેરવાળા બની રેકી કરી હતી

ક્રાઈમ બ્રાન્ચે તીરૂનેલવેલીમાંથી વેશપલ્ટો કરી હત્યારાને ઝડપી લીધો હતો
ખાસ-ખબર ન્યૂઝ રાજકોટ

શહેરના મવડી વિસ્તારમાં રહેતા યુવકની હત્યા કરી 11 વર્ષથી ફરાર વોન્ટેડ આરોપીને ક્રાઈમ બ્રાન્ચે સતત ત્રણ દિવસ સુધી તમીલનાડુમાં વેશ પલ્ટો કરી દબોચી લઈ કાર્યવાહી હાથ ધરી હતી.રાજકોટ શહેર પોલીસ કમિશ્નર બ્રજેશકુમાર ઝા, અધિક પોલીસ કમિશ્નર મહેન્દ્ર બગરીયા, નાયબ પોલીસ કમિશ્નર (ક્રાઇમ) ડો. પાર્થરાજસિંહ ગોહિલ તથા મદદનીશ પોલીસ કમિશ્નર (ક્રાઇમ) ભરત બસીયા દ્વારા રાજકોટ શહેરમાં બનેલ ખુન, ખુનની કોશીષ તથા લુંટ તેમજ ઘરફોડ ચોરીઓ જેવા ભારે ગુનાઓ દાખલ થયેલા હોય અને તે અનડીટેકટ ગુન્હાઓ તેમજ તે ગુનાઓમાં લાંબા સમયથી નાસતા-ફરતા (વોન્ટેડ) આરોપીઓને શોધી કાઢવા અંગે સુચના આપી હતી. જે સુચના અન્વયે રાજકોટ શહેર ક્રાઈમ બ્રાન્ચના પોલીસ ઇન્સપેક્ટર એમ. આર. ગોંડલીયા સહિતની ટીમને ચોક્કસ હ્યુમન સોર્સીસ તેમજ ટેકનીકલ સોર્સીસની મદદથી સંયુકત રીતે બાતમી હકીકત મળેલ કે, રાજકોટ શહેર માલવીયાનગર પોલીસ સ્ટેશન વિસ્તારમાં આવેલ સમ્રાટ ઇન્ડસ્ટ્રીયલ એરીયામાં વિનિત એન્જીનીયરીંગ નામના કારખાના બહાર આજથી આશરે 11 વર્ષ પહેલા ગત તા.5 માર્ચ, 2014 ના રોજ મર્ડરનો બનાવ
બન્યો હતો. જે અનુસંધાને રાજકોટ શહેર માલવીયાનગર પોલીસ સ્ટેશનમાં મર્ડરનો ગુન્હો દાખલ થયો હતો અને આ ગુન્હાને અંજામ આપનાર આરોપી ગોવિંદ ખાન બનાવ બાદ નાસી ગયો હતો અને આરોપી છેલ્લા 11 વર્ષથી વોન્ટેડ હતો. જે આરોપી હાલ તમીલનાડુ રાજયના તીરૂનેલવેલી ખાતે હોવાની ચોકકસ હકિકત મળતા આરોપી બાબતે ઉપરોકત કાઈમ બ્રાન્ચ ટીમ તમીલનાડુ ખાતે તપાસમાં પહોંચી હતી. ટીમ દ્વારા 3 દિવસ સુધી આરોપીના રહેણાંક મકાન તેમજ કામવાળી જગ્યા આજુબાજુમાં વાસણ વેચનાર ફેરીયા તરીકે તેમજ નાળીયેરના વેપારીનો વેશપલટો કર્યો હતો. આ આરોપી બાબતે ચોકકસ હકિકત મેળવી ગુન્હાના વોન્ટેડ આરોપીને પકડી તેના વિરૂદ્ધ કાયદેસરની કાર્યવાહી કરી છે. આ સાથે જ આગળની કાર્યવાહી માટે માલવીયાનગર પોલીસ સ્ટેશનને આરોપી સોપવાની તજવીજ કરવામાં આવેલ છે.
આરોપી ગોવિંદ કાલુરામ ખાન (ઠકુરી), (ઉ.વ.45, ધંધો પ્રા. નોકરી, રહે. હાલ – 7 વસંતમ કોલોની, પહેલી શેરી, ગણેશ મંદીરની સામે, મહારાજ નગર, તીરુનેલવેલી, તમીલનાડુ) જેનુ મુળ વતન નેપાળના બેલૌરીનુ રામપુર છે. રાજકોટના ગોકુલધામમાં રહેતા ભીમસિંગ કાળુસિંગ સોનીના સસરા અને આરોપી ગોવિંદ કાલુરામ ખાન ઠકુરી બન્ને સાથે વિનિત એન્જીનીયરીંગ નામના કારખાનામાં નોકરી કરતા હતાં.
ત્યારે મૃતકની સગીરવયની પુત્રી કારખાનામાં કામ કરતા તેના નાના પાસે રમતા જતી હોય ત્યારે આરોપીએ સગીરવયની પુત્રી પર નજર બગાડી છેડતી કરતાં મૃતક ભીમસિંગ આરોપી ગોવિંદને સમજાવવા જતા શખસે છરીના ઘા ઝીંકી ભીમસિંગ નામના યુવકનું ઢીમ ઢાળી દઈ રફુચકકર થઈ ગયો હતો. જે અનુસંધાને લાંબા સમયથી નાસતા ફરતા વોન્ટેડ આરોપીઓને શોધી કાઢવા અધિકારીઓની સુચના અન્વયે ક્રાઈમ બાન્ચના પીએસઆઈ પરમાર અને ટીમે હ્યુમન સોર્સીસ તથા ટેકનીકલ સોર્સીસની મદદથી બાતમી મળી કે માલવીયાનગર પોલીસ મથકમાં 11 વર્ષ પુર્વેના નોંધાયેલ હત્યાના બનાવનો આરોપી હાલ તમીલનાડુના તીરૂનેલવેલીમાં હોવાની બાતમી આધારે ટીમ રવાના થઈ હતી. જેમાં સતત ત્રણ દિવસ સુધી વાસણ વેચનાર, ફેરીયા, નાળીયેરના વેપારી બની પોલીસે વેશ પલ્ટો કરી આરોપી ગોંવિદ કાલુરામ ખાન ઠકુરીને દબોચી લઈ માલવીયાનગર પોલીસને સોંપી કાર્યવાહી કરી હતી.