કરમની આ તો કેવી કઠણાઈ? જ્યાં પિતા નોકરી કરતા હતા ત્યાં જ પુત્રને લાવવામાં આવ્યો અને અંતે મૃત જાહેર કરાયો
ખાસ-ખબર સંવાદદાતા
રાજકોટમાં લાલ બહાદુર શાસ્ત્રી સ્કૂલમાં પરીક્ષા આપતી વખતે ધો.12નો વિદ્યાર્થી ચક્કર ખાઇ બેભાન થઈ ઢળી પડ્યો હતો, આથી સાથી વિદ્યાર્થીઓ અને શિક્ષકોમાં દોડધામ મચી ગઈ હતી. વિદ્યાર્થીને તાત્કાલિક હોસ્પિટલ ખસેડાયો હતો, પરંતુ ફરજ પરના તબીબે તેને મૃત જાહેર કરતાં પરિવારને જાણ કરવામાં આવી હતી. આથી પરિવારજનો હોસ્પિટલે દોડી આવ્યા છે. હાલ તો વિદ્યાર્થીનું મોત હાર્ટ-એટેકથી થયાની શંકા વ્યક્ત કરવામાં આવી રહી છે. વિદ્યાર્થીનું નામ મુદિત અક્ષયભાઈ નડિયાપરા છે. પુત્રના મોતથી પિતા હોસ્પિટલમાં ભાંગી પડ્યા હતા.
- Advertisement -
મુદિતને માત્ર સામાન્ય શરદીની તકલીફ હતી. પાંચ પિરિયડ પૂરા થયા બાદ રિસેસ હતી. ત્યાર બાદ પરીક્ષા આપવા ક્લાસમાં બેઠો હતો ત્યારે અચાનક ચક્કર ખાઇની ઢળી પડ્યો હતો. સવારે અંગ્રેજીના પિરિયડમાં સારી રીતે વાંચ્યું હતું. તેની તબિયત ખરાબ હોય તેવું શિક્ષકોને જરા પણ લાગતું નહોતું. મુદિત નડિયાપરાની ઉંમર 17 વર્ષ છે અને ધો. 12 કોમર્સમાં અભ્યાસ કરતો હતો. મુદિતના પિતા અક્ષયભાઈ રાજકોટ સિવિલ હોસ્પિટલમાં સિક્યોરિટી તરીકે ફરજ બજાવે છે.
સિવિલ હોસ્પિટલમાં જ સિક્યોરિટી તરીકે ફરજ બજાવતા પિતા અક્ષયભાઈને કયા ખબર હતી કે તે જ્યાં ફરજ બજાવે છે ત્યાં એના દીકરાનો મૃતદેહ આવશે. તેઓએ હોસ્પિટલમાં રડતા રડતા ભારે હૈયે જણાવ્યું હતું કે, મુદિત સ્કૂલે ગયો હતો, જ્યાં તેને ચક્કર આવતા પડી ગયો અને બેભાન થઈ ગયો હતો. બીજી તો કોઈ તકલીફ નહોતી, માત્ર તેને શરદીની એલર્જી હતી. પરિવારમાં ચાર સભ્યો હતા, હવે માત્ર ત્રણ જ રહ્યાં છે.
ભગવાનની આગળ આપણું શું ચાલે?
- Advertisement -
ક્લાસ ટીચર દક્ષાબેને જણાવ્યું હતું કે, મુદિત એકદમ બરોબર હતો. નાસ્તો-પાણી કરીને તે પરીક્ષાની તૈયારી કરી રહ્યો હતો. આજે અમારે છઠ્ઠા અને સાતમાં પિરીયડમાં ગુજરાતી વિષયની એકમ કસોટી લેવીની હતી. જે દરમિયાન તે અચાનક ઢળી પડ્યો હતો. જેથી અમે તાત્કાલિક પાણી છાંટીને ઓસી રૂમમાં લઈ ગયા હતા. જ્યાં પહેલા ટીચરોએ સીપીઆર જેવી બેઝિક ટ્રીટમેન્ટ કરીને 108ને બોલાવી હતી. જે બાદ 108ની મદદથી વધુ સારવાર માટે સિવિલ હોસ્પિટલમાં લઈ આવ્યા હતાં.
ડોક્ટરોએ ઇસીજી અને તમામ સારવાર કરી હતી. બાદમાં ડોક્ટરે કહ્યું કે, આમાં કોઈ ચાન્સ છે નહીં તેવો રિપોર્ટ આપ્યો હતો. મુદિત બહુ જ ડાહ્યો વિદ્યાર્થી હતો. કોઈ દિવસ તેના ક્લાસ ટીચર દક્ષાબેને મુદિતની બીમારી અંગે ક્યારેય ફરિયાદ કરી નહોતી. પરંતુ તેની જિંદગી હોય તેમ બિચારો ભગવાનને ઘરે સીધાવ્યો છે.
હાર્ટ-એટેક આવે તે પહેલાના સંકેતો
– અચાનક બહુ જ ગરમી લાગવી અને પરસેવો વળવો.
– જોર જોરથી નસકોરા બોલવા. ઘણીવાર ઊંઘ તૂટવી.
– છાતી પર દબાણ લાગવું. છાતી પર કોઇએ અચાનક જ ભાર મૂકી દીધો તેવું ફીલ થવા લાગે.
– માથુ, પેટનો ઉપરનો ભાગ, પીઠ, ડાબો હાથ, ગરદન કે દાંતમાં કોઇ પણ કારણ વિના દર્દ અનુભવાય.
– ડાબી તરફથી પાંસળીઓની આસપાસ અથવા છાતીના વચ્ચેના ભાગમાં દુ:ખાવો થવો અને બાદમાં આપમેળે દુ:ખાવો બંધ થઇ જવો.