લધુતમ અને મહત્તમ તાપમાનમાં સતત વધારો થતાં ગરમીનું પ્રમાણ વધ્યું; બેવડી ઋતુનો અનુભવ થશે
ખાસ-ખબર ન્યૂઝ રાજકોટ
- Advertisement -
ગુજરાતમાં સતત લધુતમ અને મહત્તમ તાપમાન વધી રહ્યું છે. તેવામાં લધુતમ અને મહત્તમ તાપમાન વચ્ચે 17થી 18 ડિગ્રી સેલ્સિયસનો ફેરફાર હોવાથી બેવડી ઋતુનો અનુભવ થાય છે. જ્યારે ચારેય મહાનગરોમાં ગરમીનો પારો 30 ડિગ્રીને પાર પહોંચતા ગુજરાતવાસીઓ ગરમીમાં શેકાશે. ફેબ્રુઆરી માસમાં હજુ પણ આ પ્રકારનું વાતાવરણ યથાવત્ રહેવાની આગાહી હવામાન વિભાગ દ્વારા કરવામાં આવી છે. લધુતમ અને મહત્તમ તાપમાન રાઈઝીંગ ટેન્ડેન્સીમાં રહેવાની શક્યતાઓ છે એટલે કે હજુ પણ આગામી પાંચથી સાત દિવસ દરમિયાન લધુતમ અને મહત્તમ તાપમાનમાં એકથી બે ડિગ્રી સેલ્સિયસનો વધારો થઈ શકે છે. બેવડી ઋતુનો અનુભવ થતાં ગુજરાતમાં વાઇરલ ઇન્ફેક્શનના કેસમાં પણ વધારો થવાની શક્યતાઓ છે. અગાઉ હવામાન નિષ્ણાંત અંબાલાલ પટેલના જણાવ્યા અનુસાર 14 ફેબ્રુઆરી બાદ રોગિષ્ટ ઋતુ શરૂ થશે જે સતત બે મહિના સુધી યથાવત્ રહેશે.
છેલ્લા 24 કલાક દરમિયાન રાજ્યમાં સૌથી ઓછું લધુતમ તાપમાન નલિયામાં 13.2 ડિગ્રી સેલ્સિયસ નોંધાયું હતું તથા સૌથી વધુ મહત્તમ તાપમાન રાજકોટમાં 34.4 ડિગ્રી સેલ્સિયસ નોંધાયું હતું. રાજ્યના મોટાભાગના જિલ્લાઓમાં લધુતમ અને મહત્તમ તાપમાન સામાન્યથી વધુ નોંધાઈ રહ્યું છે. તેવામાં અમદાવાદ શહેરમાં છેલ્લા 24 કલાક દરમિયાન લધુતમ તાપમાન 17.4 ડિગ્રી સેલ્સિયસ જ્યારે મહત્તમ તાપમાન 32.5 ડિગ્રી સેલ્સિયસ નોંધાયું હતું. આ ઉપરાંત વડોદરામાં લધુતમ તાપમાન 16.4 ડિગ્રી સેલ્સિયસ અને મહત્તમ તાપમાન 31.8 ડિગ્રી સેલ્સિયસ, રાજકોટમાં લધુતમ તાપમાન 15.4 ડિગ્રી સેલ્સિયસ અને મહત્તમ તાપમાન 34.4 ડિગ્રી સેલ્સિયસ તથા સુરતમાં લધુતમ તાપમાન 19.8 ડિગ્રી સેલ્સિયસ અને મહત્તમ તાપમાન 32 ડિગ્રી સેલ્સિયસ નોંધાયું હતું.
