નથી જીવવા દેતી, નથી મરવા દેતી” વીડિયો બનાવી યુવકે ગટગટાવી ઝેરી દવા

પત્ની અને તેના પ્રેમી સહિત 4 સામે ગુનો દાખલઃ કોઠારીયા રોડના અમીત પઠાણ આપઘાત કેસમાં મોટો ખુલાસો: પત્ની તેના પ્રેમી સાથે ભાગી ગયા બાદ ધમકાવતી હોવાથી યુવકે જિંદગી ટૂંકાવી

રાજકોટના કોઠારીયા મેઈન રોડ પર વિવેકાનંદનગરમાં રહેતા અમીતભાઈ મહેબુબખાન પઠાણ ઉ.37ને તેની પત્ની રેશ્મા, પત્નીના પ્રેમીં કિશન અને બે બેનો તસલીમ અને ઈરફાનાએ ધમકાવી ત્રાસ આપતા ગઈ તા. ૬નાં ફોનમાં વીડિયો બનાવી ઝેરી પાવડર પી લઈ આપઘાત કરી લીધાનું ખુલતા ભક્તિનગર પોલીસ મથકમાં ફરિયાદ નોંધાઇ છે.યુવકને મરવા મજબુર કરવા અંગે મૃતકના પિતરાઈ ભાઈ બાબરીયા કોલોનીમાં રહેતા અબઝલ પઠાણએ ચારેય સામે નોધાવેલી ફરિયાદમાં જણાવ્યું કે તેના કાકાના દિકરા ભાઈ અમીતના લગ્ન 17 વર્ષ પહેલા ચોટીલાની રેશ્મા સાથે થયા હતા. તેને સંતાનમાં એક પુત્ર અને પુત્રી છે. લગ્નના ચારેક વર્ષ બાદ દંપતી વચ્ચે અણબનાવ બનતા બંનેએ છુટાછેડા લીધા હતા પરંતુ રેશ્મા અમીતભાઈ સાથે રહેવા આવી ગઈ હતી. રેશ્મા પાંચ-છ વખત કોઈને કોઈની સાથે જતી રહેતી હતી. અને બે-ત્રણ મહિનામાં પરત આવી જતી હતી. જેના કારણે અમીતભાઈ પરેશાન રહેતા હતા. છેલ્લા ત્રણેક માસ પહેલા રેશ્મા તેના બંને બાળકોને સૂતા મુકીને રાત્રે કિશન ગમારા સાથે જતી રહી હતી. અમીતભાઈ તેની વાત કરતા હતા. બીજી તરફ રેશ્મા ફોન કરી હેરાન કરતી હતી. જ્યારે કિશન પણ ફોન કરી રેશ્મા અને તેના સંતાનો બાબતે ધમકાવતો હતો. ત્યાર બાદ ગઈ તા. 6નાં અમીતભાઈએ ઝેરી દવા પી આપઘાત કરી લીધો હતો.અમીતભાઈનો ફોન ચેક કરતા તેમાં એક વીડિયો જોવા મળ્યો હતો. જેમાં મારી ઘરવાળી રેશ્મા ત્રણ મહિનાથી વહી ગઇ છે, મને બધી રીતે હેરાન કરે છે, છોકરા જોઈએ છે, જો છોકરા જોઈતા હોય તો ભાગી હતી શું કામ ? હવે મારે જે પગલા ઉપાડવા પડે છે, નથી મને જીવવા દેતી, નથી મને મરવા દેતી, હવે જે કાંઈ થાય તેની જવાબદારી રેશ્મા, કિશન અને તેની બહેન તસલીમ અને ઈરફાના. આ લોકો બધા ભેગા થઈને મને શાંતિથી રહેવા દેતા નથી. જેથી મારે આ પગલા ઉપાડવા પડે છે કહી જિંદગી ટુંકાવી હોવાનું ખુલતા અંતે ફરિયાદ નોંધાવી હતી.