ગુજરાતમાં પાંચ દિવસ ભારે વરસાદનું એલર્ટ

 અપરએર સાયક્લોનિક સરક્યુલેશન તથા ટ્રફના પ્રભાવ હેઠળ ભારે વરસાદની આગાહી

ખાસ-ખબર સંવાદદાતા
નૈઋત્ય ચોમાસાએ દેશના તમામ રાજ્યોને કવર કરી લીધા છે ત્યારે ગુજરાત સહિત અનેક રાજ્યોમાં સિસ્ટમ સક્રિય થઇ છે. ગુજરાતમાં આગામી પાંચ દિવસ માટે ભારે વરસાદનુંં એલર્ટ જાહેર કરવામાં આવ્યું છે.સૌરાષ્ટ્રનાં મોટાભાગના જિલ્લાઓ ઉપરાંત દક્ષિણ-ઉતર ગુજરાતમાં પણ ભારેથી વ્યાપક વરસાદ થવાની આગાહી કરવામાં આવી છે.સમગ્ર દેશમાં ચોમાસુ બેસી ગયું છે. અત્યાર સુધી જુદા-જુદા રાજ્યોમાં વારાફરતી વરસાદ થતો હતો પરંતુ હવે એકસાથે ડઝન રાજ્યોમાં ભારેવરસાદની આગાહી કરવામાં આવી છે. 6 થી 8 જુલાઈ દરમ્યાન અમરેલી, ભાવનગર, બોટાદ, દેવભૂમિ દ્વારકા, પોરબંદર, જૂનાગઢ, ગીર સોમનાથ, રાજકોટ સહિત સૌરાષ્ટ્રના તમામ જીલ્લા તથા દક્ષિણ-ઉતર ગુજરાત માટે એલર્ટ.

દિલ્હી, મધ્યપ્રદેશ, રાજસ્થાન,હિમાચલ પ્રદેશ, બિહાર, ઝારખંડ, મહારાષ્ટ્ર અને ગુજરાતમાં ભારે વરસાદની આગાહી ઉપરાંત અમુક ભાગોમાં પૂર પરિસ્થિતિ સર્જાવાની પણ ચેતવણી હવામાન વિભાગ દ્વારા આપવામાં આવી છે. હવામાન વિભાગના સુત્રોએ જણાવ્યું છે કે, દક્ષિણ ગુજરાતથી મહારાષ્ટ્રના દરિયા સુધી ટ્રફ સર્જાયો છે ઉપરાંત અપર એર સાયક્લોનિક સરક્યુલેસન સક્રિય છે જેનાથી ચોમાસાને ગતિ મળશે. હવામાં ભેજ વધારા સાથે ગુજરાત ઉપરાંત પાડોશી રાજ્યોનાં બોર્ડર ભાગોમાં પણ ભારે વરસાદ થવાની શક્યતા છે.

ત્યાં સુધી આવતા પાંચ દિવસમાં સૌરાષ્ટ્ર ઉપરાંત દક્ષિણ અને ઉતર ગુજરાતમાં વ્યાપક વરસાદ થવાની સંભાવના છે. 6 જુલાઈના રોજ બોટાદ, અમરેલી, ભાવનગર, અમદાવાદ, ખેડા, પંચમહાલ, વડોદરા, છોટા ઉદેપુર, ભરુચ,નર્મદા, સુરત, તાપી અને ડાંગમાં ભારે તથા વલસાડ, નવસારી અને દમણમાં વ્યાપક વરસાદની શક્યતા છે. 7મી જુલાઈએ દેવભૂમિ દ્વારકા, પોરબંદર, જૂનાગઢ, ગિર સોમનાથ, બોટાદ, અમરેલી, ભાવનગર, આણંદ, વડોદરા, ભરુચ, સુરત અને વલસાડ-નવસારીમાં ભારે વરસાદની શક્યતા છે.

અનેક જિલ્લાઓમાં NDRFની ટીમો તૈનાત કરી
8 જુલાઈએ બોટાદ, અમરેલી, ભાવનગર, નવસારી, તાપી, ડાંગ, વલસાડમાં ભારે તથા ભરુચ અને સુરતમાં ધોધમાર વરસાદની આગાહી કરવામાં આવી છે. સિસ્ટમ સક્રિય હોવાને કારણે અને ભારે વરસાદની શક્યતાને ધ્યાનમાં રાખીને લોકોને સાવચેત રહેવાની તાકીદ કરવામાં આવી છે. ઉપરાંત ગમે તેવી પરિસ્થિતિનો સામનો કરવા માટે સૌરાષ્ટ્ર, ઉતર ગુજરાત અને દક્ષિણ ગુજરાતમાં એનડીઆરએફની ટીમો તૈનાત કરી દેવામાં આવી છે. દરમિયાન, ગુજરાતમાં છેલ્લા 24 કલાક દરમિયાન 31 જિલ્લાનાં 155 તાલુકામાં હળવો-મધ્યમ વરસાદ નોંધાયો હતો. સૌથી વધુ અઢી ઇંચ વરસાદ નવસારીમાં નોંધાયો હતો. દક્ષિણ ગુજરાતના તમામેતમામ જિલ્લાઓમાં વરસાદ પડ્યો હતો. રાજ્યમાં અત્યાર સુધીનો સરેરાશ 125.14 મીમી વરસાદ નોંધાયો છે જે સિઝનના કુલ વરસાદના 14.72 ટકા થાય છે.

ગિરનાર પર 10 ઇંચ : સૌરાષ્ટ્રમાં હજુ મેઘકૃપાની પ્રતિક્ષા
સૌરાષ્ટ્ર-ગુજરાતમાં ગઇકાલથી વરસાદનું જોર ફરી ઓછું થયું છે અને ઠેર ઠેર 0 થી 2.5, ઇંચ જેટલો જ વસરાદ પડવા પામ્યો છે. જોકે ગત શનિવાર-રવિવાર દરમ્યાન જૂનાગઢનાં ગિરનાર પર્વત અને જંગલમાં 10 ઇંચ જેટલો વરસાદ પડી જ પામ્યો છે. ગિરનાર ઉપર ધોધમાર વરસાદ પડતા એક શિલા પડી ગઇ હતી. તો જુનાગઢમાં નરસિંહ મહેતાનાં ચોરા પાસે મેમણ સમાજનાં કબ્રસ્તાન ઉપર વિજળી પડતા વાયરીંગ બળી ગયું હતું.