પાંચાળભૂમિનું નગર વિંછીયા વિકાસની હરણફાળ થકી પ્રગતિના પંથે

રૂા.૨ કરોડ ૪૧ લાખથી વધુના ખર્ચે નિર્માણાધીન વિંછીયા તાલુકા પંચાયત ભવનનું ખાતમુહૂર્ત કરતા મંત્રી કુંવરજીભાઇ બાવળીયા

રાજકોટ – સૌરાષ્ટ્રની પવિત્ર પાંચાળ ભૂમિ પર આવેલ જસદણ તાલુકામાંથી વિછીંયા તાલુકો અલગ અસ્તીત્વમાં આવ્યાને હજુ જુજ સમય જ થયો છે. પરંતુ છેલ્લા ત્રણ વર્ષમાં વિંછીયા પંથકમાં રાજય સરકારની રાહબરી હેઠળ અનેક વિકાસના માળખાકીય કામો શરૂ થયેલા હોઇ આ વિસ્તારમાં વિકાસે ઉડીને આંખે વળગે તેવી હરણફાળ ભરી છે.

આજરોજ રાજયના પાણી પુરવઠામંત્રી કુંવરજીભાઇ બાવળીયાના હસ્તે વિંછીયા ખાતે રૂા. ૨ કરોડ ૪૧ લાખથી વધુના ખર્ચે નિર્માણાધીન તાલુકા પંચાયત ભવનનું ખાતમુહૂર્ત સંપન્ન કરાયું હતું.

આ તકે ઉપસ્થિત ગ્રામજનોને સંબોધતા મંત્રી બાવળીયાએ આ વિસ્તારમાં થયેલી રસ્તા, શિક્ષણ, પાણી, વિજળી, આરોગ્ય અને વહિવટી માળખાકિય વિકાસ કામગીરીની વિગતો આપતા જણાવ્યું હતું કે વિંછીયા તાલુકો જસદણથી અલગ થયો ત્યારથી આ વિસ્તારમાં વહિવટી તંત્રને અનુરૂપ જરૂરી સુવિધાઓ ઉપલબ્ધ કરાવવી એ પડકાર હતો, પણ મુખ્યમંત્રી રૂપાણીની રાહબરી હેઠળની રાજય સરકારે માત્ર ત્રણ વર્ષના ગાળામાં આ વિસ્તારની કાયાપલટ કરવાની નેમ સાથે અનેક વિકાસના કામોની હારમાળા સર્જી છે.

મંત્રીએ પ્રજાલક્ષી વિકાસ કામોની માહિતી આપતા ઉમેર્યું હતુ કે, ‘‘સૌની’’ યોજના અન્વયે આ વિસ્તારમાં સિંચાઇની સુવિધા અને પીવાના પાણી માટે વિશેષ પાઇપલાઇન અને આનુષંગીક માળખાકીય કામોને મંજુર કરી આ વિસ્તારના ડેમો અને તળાવોને નર્મદાના પાણી વડે ભરવાની મહત્વાકાંક્ષી યોજના પ્રગતિ હેઠળ છે. તાલુકા પંચાયતના નવા ભવન ઉપરાંત ટુંક સમયમાં જ રૂા. ૯.૫૦ લાખના ખર્ચે આઇ.ટી.આઇ. સહિત સાયન્સ સ્ટ્રીમની નવી માધ્યમિક અને ઉચ્ચતર માધ્યમિક શિક્ષણ સંસ્થા બનવાની છે. રૂા. ૨૨ લાખના ખર્ચે નવું પંચાયત ભવન બની રહયું છે. રૂા. ૯.૨૫ કરોડથી વધુના ખર્ચે  ‘‘વાસ્મો’’ યોજના હેઠળ વિંછીયા ગામને ચાર ઝોનમાં વહેંચી પીવાના પાણીની યોજનાનું કામ પ્રગતિમાં છે. ગટરના પાણીના નીકાલ માટે રૂા. ૧૭ કરોડના ખર્ચે ભુગર્ભ ગટર યોજના અને રૂા. ૫ કરોડના ખર્ચે સુએઝ ટ્રીટમેન્ટ પ્લાન્ટ પણ કાર્યરત થનાર છે. આ ઉપરાંત, દર ત્રણ ગામ દીઠ એક પેટા આરોગ્ય કેન્દ્રની કામગીરી હાલ ચાલી રહી છે. નવા સામુહિક કેન્દ્રની કામગીરી પણ પ્રગતિમાં છે.  આમ, સર્વગ્રાહી રીતે જોઇએ તો આઝાદી પછીના હાલના છેલ્લા ત્રણ વર્ષમાં વિછીંયાએ વિકાસની હરણફાળ ભરી છે.

રૂા. ૨.૪૧ કરોડના ખર્ચે તૈયાર થનાર તાલુકા પંચાયતના બે માળના આ સંકુલમાં ગ્રાઉન્ડ ફલોર પર ૧૧ અને પહેલા માળે ૧૧ મળી કુલ ૨૨ રૂમો બનશે જેમાં તમામ શાખાઓ અને પદાધિકારીઓ, ટી.ડી.ઓ. તથા પ્રમુખની અલાયદી અને આધુનિક સુવિધાસભર બેઠક વ્યવસ્થા ઉપલબ્ધ બનશે. ગ્રાઉડ ફલોર ૬૧૦ અને ફર્સ્ટ  ફલોર પર ૫૮૦ મળી કુલ ૧૧૯૦ ચો.મી. બીલ્ટ અપ એરીયા ધરાવતા આ સંકુલમાં તમામ માળખાકીય સુવિધા સાથે ૧૭૫ મીટર લાંબી કમ્પાઉન્ડ વેાલ અને અંદર સી.સી. રોડ પણ ઉપલબ્ધ કરાવાશે.

આ તકે પ્રાંત અધિકારી પ્રિયંક ગલચર સહિતના અગ્રણીઓએ પ્રસંગિક પ્રવચનો કર્યા હતા. કાર્યક્રમના પ્રારંભે તાલુકા ભાજપ પ્રમુખ અશ્વીનભાઇ સાંકળીયાએ ઉપસ્થિત સૌનું શાબ્દીક સ્વાગત કર્યું હતું જયારે આભારવીધી તાલુકા વિકાસ અધિકારી સોલંકીએ કરી હતી. આ પ્રસંગે જિલ્લા પંચાયતના ઉપપ્રમુખ સવીતાબેન વાછાણી, માર્કેટીંગ યાર્ડના પ્રમુખ કડવાભાઇ જોગરાજીયા, તાલુકા પંચાયત સભ્યો સર્વ હાજાભાઇ સાંબડ, પ્રવિણભાઇ મીઠાપરા, દેવરાજભાઇ ગઢદરા, જિલ્લા ભાજપ ઉપપ્રમુખ ખોડાભાઇ ખસીયા, સહિત વિછીંયા અને આસપાસના ગામના સરપંચ ઓ અને અગ્રણીઓ ઉપસ્થીત રહ્યા હતા.