ધારાસભ્ય અને ચીફ ઓફિસરની હાજરીમાં 70 રૂપિયા જેટલો વેતન વધારો મંજૂર કરાયો
ખાસ-ખબર સંવાદદાતા
મોરબી નગરપાલિકાના 325 જેટલા રોજમદાર સફાઈ કર્મચારીઓ દ્વારા છેલ્લા ચાર દિવસથી જુદી જુદી ચાર માંગણીને લઈ શરૂ કરવામાં આવેલ હડતાલ અંતે ધારાસભ્ય અને ચીફ ઓફિસરની દરમિયાનગીરી બાદ 70 રૂપીયા જેટલો વેતન વધારો મંજુર કરવામાં આવતા સમેટાઈ ગઈ છે જો કે, સફાઈ કામદારોને કાયમી કરવાનો મામલો સરકારના હાથમાં હોય એક માંગ વણઉકેલ રહી હતી.
મોરબી નગરપાલીકાના 325 જેટલા રોજમદાર સફાઈ કર્મચારીઓ કાયમી નોકરી, વેતન વધારો અને હાજરી કાર્ડ, ઓળખપત્ર સહિતના પ્રશ્ને હડતાળ ઉપર ઉતરી જતા મોરબી શહેરની સફાઈ વ્યવસ્થાને માઠી અસર પડી હતી તો બીજી તરફ સફાઈ કામદારોની હડતાળ સમેટવા માટે ધારાસભ્ય કાંતિલાલ અમૃતિયા અને ચીફ ઓફિસરના સતત પ્રયાસો બાદ ગઈકાલે આગેવાનો સાથે બેઠક બાદ સ્કીલ્ડ સફાઈ કામદારોને 474 અને અનસ્કીલ્ડ કામદારોને રૂપિયા 452 વેતન આપવાનું નક્કી કરવામાં આવતા રૂપિયા 70 જેટલા વેતન વધારાને લઈ સફાઈ કામદારો દ્વારા સંતોષ વ્યક્ત કરવામાં આવ્યો હતો અને હડતાળ સમેટવામાં આવી હતી.
આ ઉપરાંત સફાઈ કામદારોને વેતન વધારો આપવામાં આવતા મોરબી નગરપાલિકાને મહિને 12.50 લાખ જેટલો બોજ વધ્યો છે અને આ વેતન વધારો એક ઓક્ટોબરથી અમલમાં મુકવામાં આવ્યો છે જો કે હડતાળ અન્વયે સફાઈ કામદારોને કાયમી કરવાની બાબત રાજ્ય સરકારના કાર્યક્ષેત્રમાં હોય એક મુદ્દો પેન્ડિંગ રહ્યો છે જોકે ગઈકાલે સફાઈ કામદારોની મોટાભાગની માંગ સ્વીકારવામાં આવતા આજથી તમામ સફાઈ કામદારો ફરી રાબેતા મુજબ કામે લાગી ગયા હતા અને નેતાઓના ઘરની સફાઈ માટે કોઈ પણ સફાઈ કામદારને વધારાની કામગીરી નહીં સોંપવામાં આવે તેવું પણ સમાધાન બેઠકમાં નક્કી થયું હતું.
