વાત એક તરંગી બુદ્ધિશાળીની..

સિદ્ધાર્થ રાઠોડ

પ્રસ્થાન:
પ્રખર મેધાનો અર્થ થાય કે કોઈ ગહન વાતને સાવ સરળ શબ્દોમાં ઉતારી દેવાની ક્ષમતા
– ચાર્લ્સ બૂકોવ્સ્કી

અમુક અમુક ફિલ્મ એવી બની જતી હોય છે કે તેના જોનરમાં તે લેન્ડમાર્ક ગણાઈ જતી હોય છે. આવી જ એક અદભુત ફિલ્મ છે ‘ગુડ વિલ હન્ટિંગ’. ગસ વેન સેંટે ડિરેક્ટ કરેલી ફિલ્મનો પટકથા રિયલ લાઈફમાં બેસ્ટ ફ્રેન્ડ્સ એવા મેટ ડેમન અને બહેન અફલેકે લખી છે તથા ફિલ્મમાં પણ તેવા જ કિરદાર તેમણે નિભાવ્યા છે. તેના સિવાય ફિલ્મમાં રોબિન વિલિયમ્સ, મિની ડ્રાઈવર અને સ્ટેલન સ્કર્સગાર્ડ જેવા અભિનેતાઓએ પણ મહત્વના પાત્ર ભજવ્યા છે. આખી ફિલ્મ તો ક્લાસિક છે જે અને તેના ઘણાબધા સીન થેરાપી સેશન જેવા છે એટલે બધુ તો આખા લેખમાં સમાવી શકાય તેમ નથી પણ તેમાંથી એક યાદગાર સીન અહી યાદ કર્યો છે. સીનના બેકગ્રાઉન્ડની વાત કરીએ તો વિલ(મેટ ડેમન) એક પ્રખર મેધાવી પણ તુંડમિજાજી છોકરો છે કે જેની સાથે મનોવિજ્ઞાનના શિક્ષક એવા પ્રોફેસર શોન મેગવાયર વાત કરતા હોય છે. શોન દ્વારા વિલને કહેવાયેલો આ આખો સંવાદ મનને શાતા આપતી કોઈ ઠંડા પવનની લહેરખી જેવો છે. હવે, ઓવર ટુ પ્રોફેસર શોન…
તેથી જો મેં તને કલા વિશે પૂછ્યું હોત તો તે મારી સામે દરેક કલા વિશેના પુસ્તકની બારીકીઓ ધરી દીધી હોત. માઈકલએન્જેલો, તને તો એના વિશે ઘણી ખબર છે. (તેના) જીવન દરમિયાન કરેલું કામ, રાજકીય મહત્વાકાંક્ષાઓ, તેનાં પોપ સાથેના સંબંધો, જાતીય અભિગમ બરોબર? પણ હું શરત મારુ છું કે તું મને એ નહિ કહી શકે કે સીસ્ટિન ચેપલ(ચર્ચ) ની અંદર કેવું લાગે છે. તે હકીકતમાં ક્યારેય ત્યાં ઉભા રહીને અને ઊંચી નજર કરીને તે મનોરમ્ય છત નિહાળી નથી. (તે ચર્ચની છત પરના ચિત્રો માઈકલએન્જેલોએ બનાવ્યા છે.)

જો હું તને સ્ત્રીઓ વિશે પૂછું તો તું તારી માનીતી સ્ત્રીઓ વિશેનો મોટો ચોપડો બતાવીશ. તેમાંથી ઘણીઓને તે તારી સાથે સૂવડાવી પણ હશે. પણ તું મને કહી નહિ શકે કે એક સ્ત્રીની બાજુમાં (માત્ર સૂઈને નહિ પણ) ઉઠીને ખરેખર ખુશ થવું કેવું લાગે છે. તું એક અઘરો કેસ છો. અને હું તને યુદ્ધ વિશે પૂછું તો બને કે તું શેક્સપિયરને મારી સામે ફેંક,”તૂટે નહિ ત્યાં સુધી વધુ એકવાર વહાલા સાથીઓ.” પણ તું ક્યારેય એકેય યુદ્ધની નજીકેય ફરક્યો નથી, તે ક્યારેય તારા પરમમિત્રનું માથું તારા ખોળામાં રાખ્યું નથી, તેને પોતાનો છેલ્લો શ્વાસ લેતા, મદદ માટે તારી સામે મીટ માંડતાં જોયો નથી. જો હું તને પ્રેમ વિશે પૂછીશ તો તું મને સોનેટ કાવ્ય સંભળાવીશ. પણ તું ક્યારેય કોઈ છોકરીની સામે જોઇને (તેની નજરોથી) લાચાર નહિ થઈ ગયો હોય. એવી કોઈ છોકરીને નહિ જાણતો હોય જે પોતાની આંખોથી તને તોળી શકે, એવું લાગે કે જાણે ભગવાને ખાલી તમારા માટે પૃથ્વી પર કોઈ પરી મૂકી હોય જે તમને નરકની ગર્તામાંથી પણ બચાવી શકે.

અને તું એ પણ નહિ જાણતો હોય કે તેના માટે ફરિશ્તા બનવું કેવું લાગે છે, (તે) સ્ત્રીને એવો પ્રેમ કરવો, સદાય તેની સાથે રહેવું, કોઈપણ સ્થિતીમાં, કેન્સરમાં પણ. અને તું એ જાણતો નથી કે એ અનુભવ કેવો હોય જ્યારે બે મહિના સુધી હોસ્પિટલમાં તમે બેઠા-બેઠા સૂઈ જતાં હોય, તેનો હાથ પકડીને કારણ કે ડોક્ટરને તમારી આંખમાં વંચાતું હોય કે “મુલાકાતનો સમય” શબ્દો તમારા માટે નથી. તું જાણતો નથી કે સાચી ખોટ શું છે કારણ કે એ ત્યારે જ વર્તાય છે જ્યારે તમે કોઈ વ્યક્તિને તમારી પોતાની જાત કરતાંય વધારે પ્રેમ કર્યો હોય. અને મને શક છે કે તે ક્યારેય કોઈ વ્યક્તિને એટલો પ્રેમ કર્યો હોય. અને પોતાની સામે જો….મને તું કોઈ બુદ્ધિશાળી, આત્મવિશ્વાસથી ભરપૂર માણસ નથી લાગતો…મને તો તું એક ઘમંડી, કાયર એવો છોકરો લાગે છે. પણ તું પ્રચંડ બુદ્ધિપ્રતિભા ધરાવે છે, વિલ. તેની કોઈ ના નથી પાડતું. કોઈપણ તારા ઊંડાણને પામી શકે તેમ નથી. પણ તું મારા વિશે બધું જાણતો હોવાનું ધારી લે છે કારણ કે તે મારી એક પેઇન્ટિંગ જોઈ અને તે મારા સૂકા પાંદડા જેવા જીવનને કચડી નાખ્યું. તું એક અનાથ છો, સાચું? આ ફિલ્મ મારા માંટે તો કલ્ટ ક્લાસિક છે જ.

પૂર્ણાહુતિ:
એવું કોઈ જિનિયસ મગજ નથી હોતું કે જેમાં થોડુંઘણું પાગલપન જોવા ન મળે

– એરિસ્ટોટલ