અશ્વો, કેશરીયા ધ્વજ તથા સમાજના મહાનુભાવોની ઉપસ્થિતિ સાથે શિસ્તબધ્ધ શોભાયાત્રાએ રાજકોટના રાજમાર્ગો પર સંસ્કારીતાની ઝાંખી કરાવી
ખાસ-ખબર સંવાદદાતા
ક્ષત્રિય પર્વ વિજયાદશમી નિમિતે રાજકોટ શહેરમાં ક્ષત્રિય સમાજની સામુહિક શસ્ત્ર પુજન સાથે ભવ્ય શોભાયાત્રા નીકળી હતી. શ્રી ચંદ્રસિંહજી (ભાડવા) સ્ટડી સર્કલ દ્વારા આયોજીત શસ્ત્ર પુજન- શોભાયાત્રા પ્રસંગે રાજકોટ ઠાકોર સાહેબ માંધાતાસિંહજી જાડેજા એ પોતાના પ્રેરક ઉદૃબોધનમાં વિશાળ સંખ્યામાં ઉપસ્થિતિ ક્ષત્રિય સમુદાયને જણાવ્યુ હતુ કે શસ્ત્ર સાથે શાસ્ત્ર પુજન પણ પ્રવર્તમાન યુગ અને ભાવિ પેઢી માટે અતિઆવશ્યક છે. શસ્ત્ર એ ક્ષાત્રની ભુજાબળ શક્તિપ્રેરક સ્ત્રોત છે આવી જ રીતે શાસ્ત્ર પુજનથી માં સરસ્વતી, જ્ઞાનની સાધનાની ઉર્જાનો સ્ત્રોત છે બંને સંયોગ ખુબજ અગત્યનો છે. ક્ષત્રિયોએ શસ્ત્ર બળ સાથે જ્ઞાન બળમાં પણ એટલુજ સક્ષ્મ બનવું પડે ક્ષત્રિયો સમગ્ર સમાજને સાથે લઈને વિકાસના પથ પર ચાલનારા ગુણો સાથેનો સમાજ છે.
વિજયાદશમી પર્વને અનુલક્ષી કાર્યક્રમનો શ્રી હરભમજીરાજ ગરાસિયા છાત્રાલય ખાતેથી આરંભ થયેલ હતો શહેરભર માંથી તેમજ નજીકના ગામો માંથી પંરપંરાગત પોશાકો, શસ્ત્રો સાથે વિશાળ સંખ્યામાં યુવાનો,ભાઈઓ, વડીલો હાજર રહ્યા હતા છાત્રાલય ખાતે ભુદેવો દ્વારા વૈદિક મંત્રોચાર સાથે હાજર સૌ કોઇને સામુહિક શસ્ત્ર પુજન કરાવાયુ હતુ.
શસ્ત્ર પુજન બાદ હરભમજીરાજ ગરાસિયા છાત્રાલય ખાતેથી ઠા.સા.માંધાતાસિંહજી તેમજ યુવરાજ સાહેબ જયદિપસિંહજી (રામરાજા) ની આગેવાનીમાં રાજપુતી પોષાકોમા માં જગંદબાના નાદ સાથે વિશાળ શોભાયાત્રા નીકળી હતી. શિસ્ત બધ્ધ શોભાયાત્રા રાજકોટના રાજમાર્ગો પરથી પેલેસ રોડ સ્થિત આશાપુરા માતાજીના મંદિર ખાતે પંહોચી હતી જ્યા પુજન વિધિ કરાઇ હતી ત્યારબાદ રાજકોટ પેલેસ ખાતે બહોળી સંખ્યામાં હાજર ક્ષત્રિય સમુદાયની વચ્ચે રાજપરીવાર આયોજીત શસ્ત્ર, શાસ્ત્ર,અશ્વ, વાહન પુજન વિધિ ભુદેવોના મંત્રોચાર સાથે યોજાયેલ હતી. પેલેસ ખાતે મણિયાર ગૃપ દ્વારા સુંદર તલવાર રાસ રજુ કરાયેલ હતો ત્યારબાદ શ્રી હરભમજીરાજ ગરાસિયા છાત્રાલય ના વિધાર્થી ઓ દ્વારા તલવારબાજીના કૌશલ્ય રજુ કર્યા હતા હવામાં છન છન વિંઝાતી તલવારો કાંડાના કૌવતે થોડી ક્ષણોનો હાજર બહોળા સમુદાયને યુધ્ધ સમરાગંણમાં વિઝાંતિ તલવારોની પ્રતિતિ કરાવી હતી. તલવારબાજીના કૌશલ્યની છાત્રોને વિરેન્દ્રસિંહ જાડેજા (પાળ) દ્વારા માત્ર છ દિવસના જ ટૂંકા સમયમાં તાલિમ અપાઇ હતી.ક્ષત્રિય છાત્રોની તલવાર બાજીએ સૌને મંત્ર મુગ્ધ કરી દિધા હતા.આ પ્રંસગે ખાસ રાણી સાહેબ કાદંબરીદેવી,રાજકુમારી મૃદુલાકુમારી,યુવરાણીસાહેબ શીવાત્મિકાદેવી તેમજ રાજપરીવારના અન્ય સભ્યો અને ભગિની સંસ્થાના બહેનો પણ ઉપસ્થિત રહ્યા હતા.તેમજ ભગીની સેવા ફાઉન્ડેશને પણ બહેનોનું શસ્ત્રપુજન રણજીતવિલાસ પેલેસમાં વિધી-વિધાન સાથે કર્યુ હતું.
શસ્ત્ર પુજન શોભયાત્રાના આ અવસરમાં ઠાકોર સાહેબ માંધાતાસિંહજી જાડેજા સાથે સમાજના અગ્રણી તથા ક્ષત્રિય સમાજના જાહેર ક્ષેત્ર તથા સંસ્થાના વિવિધ અગ્રણીઓ ઉપસ્થિત રહ્યા હતા. કાર્યક્રમને ભવ્ય સફળતા અપાવવા બદલ શ્રી ચંદ્રસિંહજી (ભાડવા) સ્ટડી સર્કલની કાર્યવાહક સમિતિ દ્વારા સૌનો આભાર વ્યક્ત કરી હર હંમેશ સામાજીક કાર્યક્રમોમાં સૌનો સાથ – સહયોગ મળતો રહેશે તેવી અપીલ કરાયેલ હતી.
