રાજકોટમાં દસ્તાવેજો સાથે ચેડાં કરવાના કેસમાં સીટની રચના, છ ટીમો દોડાવાઈ

હર્ષ સોનીના ફ્લેટમાંથી સ્ટેમ્પ, મશીન,CPU કબજે: જયદીપ ચાર દિવસના રિમાન્ડ પર
ડીસીપીના સુપરવિઝન હેઠળ પ્રનગર સેક્ધડ પીઆઇ તમામ કામગીરી સંભાળશે
ખાસ-ખબર ન્યૂઝ રાજકોટ

રાજકોટ શહેરની સબ રજીસ્ટ્રાર કચેરી-ઝોન 1માં કોન્ટ્રાક્ટ બેઝથી નોકરી કરતાં કર્મચારીએ અગાઉ નોકરી કરી ચૂકેલા એક શખ્સ સહિતના બે જણા સાથે મળી પૂર્વયોજીત કાવત્રુ રચી કચેરીના કોમ્પ્યુટરમાં રહેલા હસ્તલેખિત 1956થી 1972ની સાલના 17 દસ્તાવેજોમાં છેડછાડ કરી ખોટા દસ્તાવેજો બનાવી તેનો ખરા તરીકે ઉપયોગ કર્યા હોવાનું સામે આવતા ચકચાર મચી જવા પામી છે. પોલીસે હાલ સબ રજિસ્ટ્રાર કચેરીમાં ફરજ બજાવતા કોમ્પ્યુટર ઓપરેટર સહિત 3 સામે ફરિયાદ નોંધી સુપરવાઇઝર જયદિપ ઝાલાની ધરપકડ કરી બાકીના બંને શખસોને ઝડપી પાડવા ચક્રો ગતિમાન કર્યા છે જૂના દસ્તાવેજોનો નાશ કરી કોમ્પ્યુટરમાં રહેલી કોપીમાં મિલ્કતના સ્થળ અને નામો ફેરવી ખોટા દસ્તાવેજોના આધારે જે તે જુનીપુરાણી મિલ્કતો-જમીનો વેંચી મારવાનું જબરૂ કાવત્રુ ઘડયાનું સામે આવ્યું છે પ્રદ્યુમનનગર પોલીસે હર્ષ સોનીના ફલેટમાંથી બોગસ દસ્તાવેજો, મશીન, સિપિયું સહિતની સામગ્રી કબ્જે કરી જયદીપના ચાર દિવસના રિમાન્ડ મેળવી વધુ તપાસ હાથ ધરી છે આ કેસમાં ડીસીપીના સુપરવિઝન હેઠળ સીટની રચના કરવામાં આવી છે તેમજ આરોપીઓને પકડવા જુદા જુદા ત્રણ પોલીસ સ્ટેશનની બે બે ટીમ મળી છ ટીમો બનાવવામાં આવી છે. રાજકોટની સબ રજીસ્ટ્રાર કચેરીમાં રજ બજાવતા અતુલભાઈ મધુભાઈ દેસાઈએ સબ રજીસ્ટ્રાર કચેરીમાં કરાર આધારિત કામ કરતા ત્રણ કર્મચારીઓ હર્ષ સાહેલીયા ઉર્ફે હર્ષ સોની, જયદીપ ઝાલા અને કિશાન ડી. ચાવડા (વકીલ) સામે પ્ર.નગર પોલીસ સ્ટેશનમાં આઈપીસી કલમ 420, 465, 467, 468, 471, 477, 447, 120-બી તેમજ 34 મુજબ નોંધાવેલી ફરિયાદમાં જણાવ્યું હતું કે, 15 મહિનામાં ત્રણ કર્મચારીઓએ કાવતરૂ રચી હસ્ત લીખીત દસ્તાવેજોના ડેટા ડિલીટ કરી 17 બોગસ દસ્તાવેજો બનાવી સાચા ઠેરવવા કૃત્ય આચરી સ્કેનીંગ કોમ્પ્યુટરમાં ખોટા દસ્તાવેજો ચડાવી સરકારી દસ્તાવેજોનો નાશ કરી નાખ્યો હતો. ફરિયાદ બાદ પોલીસે જયદીપ ઝાલાની ધરપકડ કરી હતી દરમિયાન આ અંગે ડીસીપી ઝોન-2 જગદીશ બાંગરવાએ જણાવ્યું હતું કે,સવારે પ્ર.નગર પીઆઈ ઝણકાત સહિતે ત્રણ પૈકી હર્ષ સોની જે બીલખા પ્લાઝામાં નવમાં માળે ફ્લેટમાં રહેતો હોય તે બંધ ફ્લેટની જડતી લેતા તેમાંથી નકલી દસ્તાવેજો બનાવવાનું છાપખાનું ઝડપાયું છે.

પોલીસે ફ્લેટમાંથી દસ્તાવેજો બનાવવામાં ઉપયોગમાં લેવામાં આવતી મશીનરી, સબ રજીસ્ટ્રાર કચેરીના સ્ટેમ્પ, સિલ્વર પેપર, ખોટા પેપર, પીસીયું સહિતની છ થેલા ભરીને સામગ્રી મળી આવતા પોલીસે ગુનાના કામે તમામ સાહિત્ય કબજે લીધું હતું આ ટોળકીએ કરોડો રૂપિયાની જમીનના બોગસ દસ્તાવેજ બનાવ્યા હોવાની શંકાએ મૂળ સુધી પહોંચવા પોલીસ કમિશનર બ્રજેસ ઝાની સૂચનાથી ડીસીપી જગદીશ બાંગરવાના સુપરવિઝન હેઠળ સીટની રચના કરવામાં આવી છે જેમાં પ્રનગર સેક્ધડ પીઆઇ ડોબરિયા મુખ્ય અધિકારી રહેશે તેમજ આરોપીઓને પકડવા માટે ત્રણ પોલીસ સ્ટેશનની બે બે સહિત કુલ છ ટીમો બનાવવામાં આવી છે જેમાં કાગળિયાના જાણકાર કાબેલ રાઇટરોનો પણ સમાવેશ થાય છે.

કઈ કઈ જમીનના દસ્તાવેજોમાં કર્યા ચેડાં
મઘરવાડાની મિલ્કત વીરજી સવજીના નામની હતી જેમને કચરા ઉર્ફે કરશન સવાભાઇને દસ્તાવેજ કરી આપેલ હતો. જે દસ્તાવેજમાં ચેડા કરી વેચનાર તરીકે સરોજબેન રૂદ્રદત રાવલ (રહે. પ્રહલાદ પ્લોટ) અને ખરીદનાર મનહરલાલ નૌતમલાલ કોટેચા (રહે. બાન્દ્રા રોડ, મુંબઇ)ના નામનો કરી નાંખ્યો હતો.
મવડીમાં આવેલ ખેતીની જમીનનો દસ્તાવેજ રવજી હિરાના નામનો છે તે ગોંડલના બંધીયા ગામના બહાદુર સિપાઇ નામનો કરી નાખ્યો હતો.
કાલાવડ રોડ આવેલ જુના સર્વે નં. 449ની જમીનના પ્લોટ નં. 40માં લક્ષ્મણભાઇ વેલજીભાઇ (રહે. મનહર પ્લોટ, શેરી નં.10)નો દસ્તાવેજ હતો તેમાં ચેડા કરી દેવેન્દ્ર કાંતલિાલ સંઘવી (રહે. રાજકોટ)નો કરી નાખ્યો હતો.
જામનગર રોડ પર આવેલ 514 પૈકીના પ્લોટ નં.1માં સુશીલાબેન ગીરધરલાલ (રહે. રાજકોટ)ના નામના દસ્તાવેજ સાથે ચેડા કરી સુરેશ દેવજી પરમાર (રહે. અમરનગર, રાજકોટ)ના નામનો કરી નાખ્યો હતો.
રૈયાના સર્વે નં. 14ના પ્લોટ નં. 18ની જમીનનો દસ્તાવેજ કરશનભાઇ હરીયાભાઇ અસ્વાર (રહે. રાજકોટ)ના નામનો છે તેમાં પણ ચેડા કરી દસ્તાવેજ બદલાવાનો પ્રયાસ થયેલ હતો.
વોર્ડ નં.6 માં ભકિતનગર ટ્રાફીક સર્કલથી મનહર પ્લોટવાળા રસ્તે આવેલ દસ્તાવેજ નાગરીક સહકારી બેન્ક લી.નામનો હતો તેમાં ચેડા કરી કરશન હરીયા અસ્વારના નામનો કરી નાખ્યો હતો.
માધાપરમાં આવેલ મિલકતનાં દસ્તાવેજોમાં ગુલાબચંદ છગનલાલનું નામ હતું જેમાં ચેડા કરી જયસુખ નાનજી જોગીના નામનો દસ્તાવેજ બનાવી નાખ્યો હતો.
જીયાણાની મિલકતમાં દસ્તાવેજ શીવા પાંચાના નામનો હતો જેમાં ચેડા કરી જયસુખ નાનજી જોગીનાં નામનો બનાવી નાખ્યો હતો.
રામપરામાં આવેલ મિલકતમાં કાના રામભાઈના નામનો દસ્તાવેજ હતો જેમાં ચેડા કરી ઉસ્માન ઈબ્રાહીમ કચરા (રહે.નહેરૂનગર) ના નામનો કરી નાખ્યો હતો.
માંડા ડુંગરમાં આવેલ ઔદ્યોગીક એરીયા પાસે સ.નં.157/21 જમીન 3=15 એકરમાં શાંતીલાલ ખોડા, નારણ ખોડા, ધનજી ખોડાના નામનો દસ્તાવેજ હતો જેમાં ચેડા કરી રસુલ નરશી રહે.વાગણા ના નામનો બનાવી નાખ્યો હતો.
રૈયાનાં સર્વેનં.25 પ્લોટ નં.1/બીની જમીનમાં ગીરધરલાલ અમરશીભાઈના નામનો દસ્તાવેજ હતો જેમાં ચેડા કરી રમેશ પુરૂષોતમ મોદી રહે.મુંબઈનાં નામનો બનાવી નાખ્યો હતો.
રાજકોટનાં સર્વે નં.66 પૈકીની જમીન 10 એકરમાં દસ્તાવેજ ભગવાનજી ચુનીલાલના નામનો હતો તેમાં ચેડા કરી રણછોડ રાઘવજી પપડસાળા રહે.હેમાળનાં નામનો બનાવી નાખ્યો હતો.
રાજકોટના સર્વે નં.66 ની ખેડવાણ જમીન 4 એકર 17 ગુઠા જે પ્રમુખભાઈ રવજીભાઈનાં નામનો હતો તેમાં ચેડા કરી રણછોડ રાઘવજી પપડસાળા રહે.હેમાળનાં નામનો દસ્તાવેજ કરી નાખ્યો હતો.
રાજકોટના સર્વે નં.66 પૈકીની 8 એકર જમીનમાં પણ ખોટા દસ્તાવેજ બનાવી પપડસાળા રણચોડ રાઘવજીના નામનો દસ્તાવેજ કરી નાખ્યો હતો.
રૈયાનાં સર્વે નંબર 25 માં પ્લોટ નં.1 બીમાં રામજી સવજી, હેમકુંવરબેન દામજીનાં નામની મિલકત હતી તેમાં ચેડા કરી રમેશ પુરૂષોતમ મોદીના નામનો દસ્તાવેજ બનાવી નાખ્યો હતો.