ચેન્નઈને પાંચ વિકેટે હરાવીને રાજસ્થાન ક્વૉલિફાયર-1માં પ્રવેશ્યું

24મીએ કોલકાતામાં ક્વોલિફાયર વનમાં ગુજરાત વિ. રાજસ્થાન: અણનમ 40 રન ફટકારનાર અશ્ર્વિન મેન ઓફ ધ મેચ : મોઈન અલીની 93 રનની ઈનિંગ એળે ગઈ

ખાસ-ખબર સંવાદદાતા

રાજસ્થાન રોયલ્સે જયસ્વાલના 59 અને અશ્વિનના 23 બોલમાં અણનમ 40 રનની મદદથી ચેન્નાઈને બે બોલ બાકી હતા, ત્યારે પાંચ વિકેટથી હરાવીને આઇપીએલ ક્વોલિફાયર વનમાં પ્રવેશ મેળવી લીધો હતો. હવે 24મી મે ના રોજ કોલકાતામાં રમાનારી ક્વોલિફાયર-વનમાં રાજસ્થાન અને ગુજરાત વચ્ચે મુકાબલો ખેલાશે. જેમાં જીતનારી ટીમ ફાઈનલમાં પ્રવેશશે, જ્યારે હારનારી ટીમને ક્વોલિફાયર-ટુમાં રમવાની તક મળશે. રાજસ્થાને જીતવા માટેના 151ના ટાર્ગેટને 19.4 ઓવરમાં પાંચ વિકેટ ગુમાવીને પાર પાડયો હતો.
ચેન્નાઈ સામેની જીત સાથે રાજસ્થાનના 18 પોઈન્ટ થયા હતા. જોકે તેમનો રનરેટ વધુ સારો હોવાથી તેઓએ 18 પોઈન્ટ સાથે રહેલા લખનઉને ત્રીજા ક્રમે ધકેલ્યું હતુ. હવે લખનઉ તારીખ 25મી મે ને બુધવારે એલિમિનેટરમાં રમશેે. જ્યાં તેનો સામનો બેંગ્લોર કે દિલ્હી સામે થશે.
અગાઉ મોઈન અલીએ 57 બોલમાં 13 ચોગ્ગા અને 3 છગ્ગા સાથે 93 રનની વિસ્ફોટક ઈનિંગ રમી હોવા છતાં ચેન્નાઈ રાજસ્થાન સામેની આઇપીએલ ટી-20માં છ વિકેટે 150 રન જ નોંધાવી શક્યું હતુ. ચેન્નાઈની શરૃઆત જબરજસ્ત રહી હતી અને તેણે પ્રથમ 10 ઓવરમાં 94 રન ફટકાર્યા હતા. જોકે રાજસ્થાનના બોલરોએ કમબેક કરતાં આખરી 10 ઓવરમાં માત્ર 56 રન જ આપ્યા હતા. ચહલ અને મેકોયે બે-બે વિકેટ ઝડપી હતી.
મુંબઈના બ્રેબોર્ન સ્ટેડિયમમાં રમાયેલી આઇપીએલ મેચમાં ચેન્નાઈના કેપ્ટન ધોનીએ ટોસ જીતીને પ્રથમ બેટિંગ પસંદ કરી હતી. ચેન્નાઈએ ઋતુરાજની વિકેટ માત્ર બે રનના સ્કોર પર ગુમાવી હતી. જોકે મેદાન પર ઉતરતા જ મોઈન અલીએ ઝંઝાવાત જગાવ્યો હતો. મોઈને માત્ર 19 જ બોલમાં અડધી સદી પૂર્ણ કરી હતી. તેણે કોન્વે (16) સાથે 83 રનની ઓપનિંગ ભાગીદારી કરી હતી. જોકે ત્યાર બાદ રાજસ્થાને કમબેક કર્યું હતુ. એક તબક્કે 85/1નો સ્કોર ધરાવતી ચેન્નાઈની ટીમ 95/4 પર ફસડાઈ હતી. મોઈન અલી અને ધોનીએ 52 બોલમાં 52 રન નોંધાવ્યા હતા.ધોનીના 28 બોલમાં 26 રન હતા. મેકોયે 4 ઓવરમાં માત્ર 20 રન આપતાં બે વિકેટ ઝડપી હતી. જ્યારે ચહલે 26 રનમાં બે બેટ્સમેનને આઉટ કર્યા હતા.

મુંબઈ સામે દિલ્હી માટે આજે કરો યા મરોનો જંગ

આઈપીએલ 2022ની લીગનાં છેલ્લા સપ્તાહની સૌથી જરૂરી અને રોમાંચક મેચ આજે સાંજે 7.30 કલાકે મુંબઈ ઈન્ડિયન્સ અને દિલ્હી કેપિટલ્સની વચ્ચે રમાશે.મુંબઈના વાનખેડે સ્ટેડિયમ પર યોજાનારી આ મેચનું પરિણામ આવ્યા બાદ આ વર્ષે પ્લે ઑફ્ફમાં સ્થાન મેળવનારી ચાર ટીમોની તસવીર સ્પષ્ટ થઈ જશે. રિષભ પંતની કેપ્ટન્સી ધરાવતી દિલ્હી કેપિટલ્સ માટે પ્લે ઑફ્ફમાં સ્થાન પ્રાપ્ત કરવા પોઈન્ટ ટેબલ પર સૌથી નીચે ઝૂલી રહેલી મુંબઈ ઈન્ડિયન્સને પરાજીત કરવી પડશે. આમ બીજા શબ્દોમાં કહીએ તો દિલ્હી કેપિટલ્સનું ભાગ્ય હવે મુંબઈ ઈન્ડિયન્સના હાથમાં છે. લગભગ ક્વાર્ટર ફાઈનલ જેવા મુકાબલામાં દિલ્હીએ મુંબઈને તમામ મોરચે શાનદાર પ્રદર્શન કરીને પરાજીત કરવું પડશે. દિલ્હી માટે આ મુકાબલો અત્યંત મહત્ત્વપૂર્ણ છે ત્યારે મુંબઈ ઈન્ડિયન્સ સીઝનની છેલ્લી મેચ જીત સાથે પૂર્ણ કરવા આતુર છે. જો કે પાંચ વાર આઈપીએલ ચેમ્પિયન મુંબઈ ઈન્ડિયન્સ માટે આ જીતનું કોઈ મહત્ત્વ નહીં હોય. રોયલ ચેલેન્જર્સ બેંગ્લોરે ગુજરાતને હરાવી પ્લે ઑફ્ફમાં પહોંચવાની આશા જીવંત રાખી છે. જો કે, આના માટે આજની મેચમાં મુંબઈ સામે દિલ્હીનો પરાજય થવો જરૂરી છે.