ઈંગ્લેન્ડે આપેલા 384ના લક્ષ્યાંક સામે ઑસ્ટ્રેલિયાએ વિનાવિકેટે 135 રન બનાવી લીધા: આજે છેલ્લા દિવસે જીત માટે તેને 249 રનની જરૂર
ઈંગ્લેન્ડ-ઑસ્ટ્રેલિયા વચ્ચે એશેઝ શ્રેણીની પાંચમી અને અંતિમ ટેસ્ટ મેચ અત્યંત રોમાંચક બની ગઈ છે. લંડનના કેનિંગ્ટન ઓવલમાં રમાઈ રહેલી આ ટેસ્ટ મેચના ચોથા દિવસે ઈંગ્લેન્ડ તરફથી અપાયેલા 384 રનના લક્ષ્યાંકનો પીછો કરવા ઉતરેલી ઑસ્ટ્રેલિયન ટીમે ઈંગ્લેન્ડને જોરદાર જવાબ આપ્યો છે.
- Advertisement -
વિસ્ફોટક ઓપનર ડેવિડ વૉર્નર અને ઉસ્માન ખ્વાજાએ સદીની અણનમ ભાગીદારી કરી મેચને રોમાંચક બનાવી દીધી છે. બન્નેએ વરસાદથી પ્રભાવિત આ મેચના ચોથા દિવસે સ્ટમ્પ સુધીમાં 135 રન બનાવી લીધા છે અને હાલ બન્ને ક્રિઝ પર અડીખમ છે.
વરસાદને કારણે ચોથા દિવસની રમત વહેલી પૂર્ણ કરવી પડી હતી. પાંચમા અને અંતિમ દિવસે મતલબ કે આજે ઑસ્ટ્રેલિયાને 249 રનની જરૂર છે અને તેની 10 વિકેટ હાથ પર છે તો 98 ઓવર તેની પાસે પડી છે. ઑસ્ટ્રેલિયન ટીમ પાંચ મેચની શ્રેણીમાં 2-1થી આગળ છે. શ્રેણીની ચોથી ટેસ્ટ ડ્રો રહી હતી. જો આ ટેસ્ટ કદાચ ઑસ્ટ્રેલિયા હારી પણ જાય છે તો શ્રેણી 2-2ની બરાબરીએ પૂર્ણ થશે. આવામાં એશેઝ ઉપર હક્ક તો ઑસ્ટ્રેલિયાનો જ રહેશે.
દરમિયાન ઑસ્ટ્રેલિયન ઓપનર ઉસ્માન ખ્વાજાએ ટેસ્ટ કરિયરમાં પાંચ હજાર રન પૂર્ણ કરી લીધા છે. તે 130 બોલમાં આઠ ચોગ્ગાની મદદથી 69 રન બનાવીને અણનમ છે તો ડેવિડ વૉર્નર 99 બોલમાં નવ ચોગ્ગાની મદદથી 58 રને રમી રહ્યો છે. આ પહેલાં ઈંગ્લેન્ડની બીજી ઈનિંગ 395 રને પૂર્ણ થઈ હતી. ઈંગ્લેન્ડ વતી બીજી ઈનિંગમાં પૂર્વ કેપ્ટન જો રુટ નવ રને પોતાની સદી ચૂક્યો હતો. જ્યારે ઓપનર જૈક ક્રાઉલીએ 73 રન બનાવ્યા હતા. ઑસ્ટ્રેલિયા વતી બીજી ઈનિંગમાં અનુભવી ફાસ્ટ બોલર મીચેલ સ્ટાર્ક અને ટૉડ મર્ફીએ ચાર-ચાર વિકેટ ખેડવી હતી. જ્યારે જોશ હેઝલવૂડ-પેટ કમિન્સના હાથમાં એક-એક વિકેટ આવી હતી.
