ઇલેક્શન રિઝલ્ટ: બૂકીઓ કમાયા, પંટરો ધોવાયા, અબજો ગુમાવ્યા

ખાસ-ખબર ન્યૂઝ નવી દિલ્હી

અબ કી બાર 400 પારના સૂત્રને આધારે પંટરોને આંધળા બની ભાજપ પર નસીબ અજમાવવાનું ભારે પડયું

લોકસભાની ચૂંટણી આ વખતે બૂકી આલમમાં પણ હોટ ઈશ્યૂ બની હતી. બૂકી બજારમાં તમામ તબક્કાના મતદાન બાદ ખૂલેલા ભાવો અને તેના પર અસંખ્ય પંટરોએ ખેલેલા કરોડોના સટ્ટામાં આજે પરિણામ જાહેર થતાં ભાજપનો વિજય તો થયો છે પરંતુ જે પ્રમાણે ભાજપના ભાવો સટ્ટાબજારમાં ખૂલ્યા તે જોતા બૂકીઓ કમાયા છે અને પંટરોને રાતા પાણીએ રોવાનો વારો આવ્યો છે. નોંધનીય છે કે, અબ કી બાર 400 પારના સૂત્રને આધારે પંટરોને આંધળા બની ભાજપ પર નસીબ અજમાવવાનું ભારે પડ્યું છે. બીજી તરફ, દુબઇના મોટા ગજાના કેટલાક પંટરોએ પહેલાંથી જ ભાજપની બેઠકો નહીં આવે તેવો સોદા કરતા તેઓ અબજો રૂપિયા કમાઇ ગયા છે.

ઇલેક્શન જાહેર થયું ત્યારે જ બૂકીઓએ ભાજપની બેઠકો પરના ભાવ જારી કર્યાં હતા. જેમાં સૌથી પ્રથમ ભાવ ખૂલતા એકલા ભાજપ (ગઠબંધન વગર) 337-339 સીટ પર ફેવરિટ હતો. ત્યારબાદ દુબઇના મોટા પંટરોએ અબજો રૂપિયામાં ખાવા (ભાજપ આટલી સીટ નહીં જીતે)નું શરૂ કર્યું હતું. તેથી થોડા દિવસો બાદ ભાજપના ભાવ 310-312 સીટ પર આવી ગયા હતા. તમામ તબક્કાની ચૂંટણી પત્યાબાદ એક્ઝિટ પોલ પણ ભાજપની તરફે આવ્યા હતા ત્યારે ફરી બેઠકોના ભાવ વધી 315-317 સુધી પહોંચી ગયા હતા. આજે મતગણતરી શરૂ થઇ ત્યારે ભાજપનો ભાવ 315 પર શરૂ થયો હતો. ત્યારબાદ ભાવ ઘટતા ઘટતા એક તબક્કે 240 બેઠક પર પહોંચી ગયો હતો. પરંતુ ત્યારબાદ 253-254 બેઠકો સુધી ભાવ પહોંચ્યો હતો અને બપોરે બૂકીઓએ સોદા લેવાનું બંધ કર્યું હતું.

આમ એક તબક્કે ભાજપની બેઠકો 337-339એ શરૂ થઇ 240 સુધી પહોંચી ગઇ હતી. ભાજપ 400 બેઠકો પાર કરશે તેવું સુત્ર હોવાને કારણે પંટરોએ શરૂઆતથી અંત સુધી (ઇલેક્શનના દિવસે બપોરે 11 સુધી) એકલા ભાજપની બેઠકો આવશે તેમ જાણી પૈસા લગાવ્યા હતા. પરંતુ પંટરોના અબજો રૂપિયા ડુબી ગયા છે અને બૂકીઓ માલા માલ થઇ ગયા છે.

ગુજરાતમાં ભાજપની 26 એ 26 બેઠકો ભાજપ જીતવા માટે શરૂઆતથી જ સટ્ટા બજારમાં ફેવરિટ હતો. જેથી શરૂઆતમાં ભાજપ 26 સીટ જીતશે તેનો ભાવ 40 પૈસા ખૂલ્યો હતો એટલે 100 રૂપિયા લગાવો તો 40 મળે અને સીટ ન આવે તો 100 જાય. આ ભાવ 65 પૈસા સુધી ગયો હતો. આમ ભાજપ 26 જીતવા ફેવરિટ હતી. જેથી પંટરોએ અબજો રૂપિયા લગાવ્યા હતા. પરંતુ એક સીટ ભાજપ હારતા પંટરોના પૈસા ડૂબી ગયા છે.

આ વખતે પહેલાંથી જ ભાજપ ફેવરિટ હતો અને કોંગ્રેસ દૂર દૂર સુધી મેદાનમાં ન હતી. જેથી ઇલેક્શન જાહેર થયા બાદ સટ્ટા બજારમાં કોંગ્રેસની 61-63 બેઠકો આવશે તેના ભાવ ખૂલ્યા હતા. આ ભાવ વધતા વધતા ઇલેક્શનના દિવસે બપોરે 12 વાગ્યા સુધી 100 સુધી પહોંચી ગયા હતા. પરંતુ કોંગ્રેસની ઓછી બેઠકો આવશે તે માની લોકોએ પૈસા લગાવ્યા ન હતા. જેથી ઓછા સોદા થયા હતા.

ભાજપના તમામ ઉમેદવારોમાં અમેઠી બેઠક, કે જયાંથી સ્મૃતિ ઇરાની સ્પર્ધામાં હતા, તે બેઠક સટ્ટા બજારમાં ફેવરિટ હતી. સટ્ટા બજારમાં ઉમેદવારોના ભાવ ખૂલ્યા ત્યારે અમેઠી બેઠકનો ભાવ 25 પૈસા હતો. ત્યારબાદ તે ભાવ વધી 45 પૈસા સુધી પહોંચી ગયો હતો. જેથી પંટરોએ અબજો રૂપિયા આ બેઠક પર લગાવ્યા હતા પરંતુ સ્મૃતિ ઇરાની હારી જતે અંતે કોઇને કશું મળ્યું નહીં અને બૂકીઓ કમાઇ ગયા હતા.

ગુજરાતમાં 25 સીટ ભાજપ જીતી ગયુ છે અને એક માત્ર સીટ ગેનીબેહન કોંગ્રેસમાંથી જીત્યા છે. સટ્ટાબજારમાં જયારે ભાવ ખૂલ્યા ત્યારે ગેનીબહેનની સામે રેખાબહેન જીતવા માટે ફેવરિટ હતા. સટ્ટાબજારમાં રેખાબહેન જીતે તે બેઠક પર ભાવ 30-37 પૈસા હતા. ગેનીબહેન ફેવરિટ ન હતા. લોકોએ હરીફ પર પૈસા લગાવ્યા હતા પરંતુ ગેનીબહેન જીતી જતા રેખાબહેનની જીત પર લગાવેલા પૈસા ખોવાનો વારો આવ્યો છે.