બ્રિટનનાં રાણી એલિઝાબેથ દ્વિતીયની આ 17 ફોટામાં જુઓ સફર

બ્રિટનનાં રાણી એલિઝાબેથ દ્વિતીયનું નિધન થયું છે. તેમણે 6 ફેબ્રુઆરી 1952ના રોજ તેમના પિતા કિંગ જ્યોર્જના મૃત્યુ પછી બ્રિટનનું શાસન સંભાળ્યું હતું, ત્યારે તેઓ માત્ર 25 વર્ષનાં જ હતાં. ત્યારથી તેમણે 70 વર્ષ સુધી શાસન કર્યું. તેમણે 2 દિવસ પહેલાં જ યુકેના 15મા પીએમ લિઝ ટ્રસને શપથ અપાવ્યા હતા.

એલિઝાબેથ દ્વિતીય બ્રિટિશ ઇતિહાસમાં સૌથી લાંબું શાસન કરનાર પ્રથમ મહિલા રાજા છે. અહીં એક્સક્લૂસિવ ફોટા દ્વારા જાણો રાણીની સફર…

1947: એલિઝાબેથે પોતાનું જીવન સમાજ સેવા માટે સમર્પિત કરી દીધું હતું

પ્રિન્સેસ એલિઝાબેથે 21 વર્ષની ઉંમરે રાષ્ટ્રને પ્રથમ સંબોધન કર્યું હતું. તેઓ દક્ષિણ આફ્રિકાના પ્રવાસે ગયા હતા. એ સમયે દક્ષિણ આફ્રિકા બ્રિટિશ સામ્રાજ્યનો ભાગ હતું. તેમણે પોતાના સંબોધનમાં કહ્યું હતું કે હું મારું આખું જીવન સમાજ અને પરિવારની સેવામાં સમર્પિત કરું છું. આપણે બધા એક પરિવારનો ભાગ છીએ. એ સમયે તેઓ રાણી નહીં, પણ રાજકુમારી હતાં.

1953: તાજપોશી
ફેબ્રુઆરી 1952 માં બધું બદલાઈ ગયું. એલિઝાબેથના પિતા કિંગ જ્યોર્જ, જેઓ લાંબા સમયથી બીમાર હતા, તેમનું નિધન થયું. હવે બ્રિટનને નવાં રાણી મળવાનાં હતાં. એલિઝાબેથ II એ માત્ર 25 વર્ષની વયે બ્રિટનનું શાસન સંભાળ્યું. જૂન 1953માં તેમનો સત્તાવાર રીતે રાજ્યાભિષેક થયો હતો. આ કાર્યક્રમ પહેલીવાર ટીવી પર બતાવવામાં આવ્યો હતો. આ દરમિયાન એલિઝાબેથે કહ્યું હતું કે- મારી પાસે આ નવી જવાબદારીનો બહુ ઓછો અનુભવ છે. મારાં માતા-પિતા જે રીતે બધું સંભાળતાં હતાં, હું પણ એ જ રીતે કામ કરીશ. આ પ્રસંગે હું દિલથી તમારા બધાનો આભાર માનવા માગું છું.

1957: અમેરિકાનો પ્રથમ પ્રવાસ
રાણી એલિઝાબેથ દ્વિતીયે તેમના જીવનકાળ દરમિયાન 90 દેશનો પ્રવાસ કર્યો હતો. તેમણે ભારત, રશિયા, દક્ષિણ આફ્રિકા જેવા દેશો સાથેના સંબંધોને મજબૂત બનાવવામાં મહત્ત્વની ભૂમિકા ભજવી હતી 1951માં એલિઝાબેથ યુએસ પ્રમુખ હેરી એસ. ટ્રુમેન મળ્યાં હતાં. એ સમયે તેઓ રાજકુમારી હતાં. 1957માં રાણી એલિઝાબેથ IIએ અમેરિકાનો સત્તાવાર પ્રવાસ કર્યો. આ દરમિયાન તેમણે તત્કાલીન રાષ્ટ્રપતિ ડ્વાઇટ ડી. આઇઝનહોવર સાથે મુલાકાત કરી હતી.

1957: ટીવી પર પ્રથમ સંબોધન
રાણી એલિઝાબેથ દ્વિતીયે ક્યારેય ઈન્ટરવ્યુ આપ્યો નહોતો, પરંતુ તેઓ કોઈ ને કોઈ રીતે પોતાના વિચારો લોકો સુધી પહોંચાડતા હતા. તેઓ સારી રીતે જાણતા હતા કે લોકો સાથે સંબંધો કેવી રીતે જાળવવા. તેઓ દર વર્ષે ક્રિસમસના દિવસે ભાષણ આપતાં હતાં, એ બ્રિટિશ હોલિડે પરંપરા હતી. 1957માં રાણી એલિઝાબેથે પહેલીવાર ટીવીના માધ્યમથી લોકોને સંબોધન કર્યું હતું.

1965: બકિંગહામ પેલેસ ખાતે ‘બીટલમેનિયા’
ઓક્ટોબર 1965માં લોકપ્રિય મ્યુઝિક બેન્ડ ‘ધ બીટલ્સ’ના સભ્યો રાણીને મળવા બકિંગહામ પેલેસ પહોંચ્યા હતા. બેન્ડના સભ્યો જોન લેનન, પોલ મેકાર્ટની, જ્યોર્જ હેરિસન અને રિંગો સ્ટારની એક ઝલક જોવા માટે લોકો ઊમટી પડ્યા હતા. મહેલના દરવાજા પર ચઢીને લોકો અંદર જવાનો પ્રયાસ કરી રહ્યા હતા. રાણીના ઘરની બહાર પોલીસ-બંદોબસ્ત ગોઠવવામાં આવ્યો હતો. રાણીએ બેન્ડ સભ્યોનું સન્માન કર્યું હતું. પોલ મેકાર્ટનીએ રાણીને મળ્યા પછી કહ્યું – તેઓ ખૂબ મૈત્રીપૂર્ણ હતા.

1966: એબરફાન ખાણ આપત્તિ
21 ઓકેટોબર 1966માં સાઉથ વેલ્સના ગોમ એબરફાનમાં ભારે વરસાદ બાદ ભૂસ્ખલન થયું હતું. એમાં 144 લોકોનાં મોત થયાં હતાં. મરનારમાં મોટા ભાગનાં બાળકો હતાં. આ દુર્ઘટનાએ દેશને હચમચાવી નાખ્યો. રાણી એલિઝાબેથ II પીડિતોની મુલાકાત માટે 8 દિવસ બાદ પહોંચ્યા હતા, એ બાદ તેમને ટીકાઓનો સામનો કરવો પડ્યો હતો.

1969: એપોલો 11ના અવકાશયાત્રીઓ સાથે મુલાકાત

ચંદ્ર પર પ્રથમ પગ મૂકનાર નીલ આર્મસ્ટ્રોંગ, બઝ એલ્ડ્રિન અને માઈકલ કોલિન્સ, ગ્લોબલ ગુડવિલ ટૂર દરમિયાન 14 ઓક્ટોબર 1969 માં બકિંગહામ પેલેસ ખાતે રાણી એલિઝાબેથ II ને મળ્યા હતા. આ દરમિયાન એક રમૂજી ઘટના બની હતી. આનું વર્ણન કરતાં આર્મસ્ટ્રોંગે કહ્યું હતું – હું એ દિવસે ખૂબ જ બીમાર હતો, હું કાર્યક્રમમાં ન જવા વિશે વિચારી રહ્યો હતો, પરંતુ હું ગયો અને રાણીને મળતો હતો ત્યારે મને તેમની સામે ઉધરસ આવી હતી. કોલિન્સ પણ સીડી પર પડી ગયો હતો.

1970: પ્રથમ શાહી યાત્રા
તેમની પ્રથમ શાહી મુલાકાત દરમિયાન રાણી એલિઝાબેથ દ્વિતીયે સદીઓની પરંપરા તોડી હતી. તેમણે લોકોને દૂરથી હાથ લહેરાવવાને બદલે નજીક આવી અભિવાદન કર્યું. પ્રથમ શાહી મુલાકાત 1970માં ઓસ્ટ્રેલિયાની હતી. આ દરમિયાન તેઓ સિડનીમાં લોકોની વચ્ચેથી પસાર થયાં હતાં.

1981: ચાર્લ્સ અને ડાયનાના લગ્ન
29 જુલાઈએ 1981માં પ્રિન્સ ચાર્લ્સ અને ડાયના સ્પેંસરના લગ્ન થયા હતા. તેમની એક ઝલક જોવા માટે સેન્ટ્રલ લંડનમાં લોકોની ભીડ ઊમટી પડી હતી. લોકો પ્રિન્સેસ ડાયનાને પસંદ કરતા હતા, પરંતુ તેમની અને ચાર્લ્સ વચ્ચે કોઈ મીઠાશ નહોતી. લગ્નનાં 11 વર્ષ બાદ 1992માં બંનેએ છૂટાછેડા લઈ લીધા હતા.

1986: ચીનનો પ્રવાસ કરનારાં પ્રથમ મહારાણી
1986માં એલિઝાબેથે ચીનની મુલાકાત લીધી હતી. બ્રિટિશ રાણી ચીનની મુલાકાતે આવી હોય તેવો આ પ્રથમ પ્રસંગ હતો. તેમના પ્રથમ પ્રમુખ, રિચર્ડ એમ. નિક્સન અને વડાપ્રધાન માર્ગરેટ થેચર ચીનની મુલાકાતે ગયા હતા. આ મુલાકાતને બ્રિટન દ્વારા રાજદ્વારી પ્રયાસ તરીકે જોવામાં આવી હતી.

1996: નેલ્સન મંડેલાનું સ્વાગત
જુલાઈ 1996માં દક્ષિણ આફ્રિકાના પ્રમુખ નેલ્સન મંડેલા 4 દિવસની મુલાકાતે બ્રિટન આવ્યા હતા. મંડેલાની મુલાકાત દરમિયાન તેમની અને રાણીની વચ્ચે ગાઢ મિત્રતા બંધાઈ ગઈ હતી. રાણીએ મંડેલાને બકિંગહામ પેલેસમાં આમંત્રણ આપ્યું હતું. આ સિવાય બંને સેન્ટ્રલ લંડનમાં પણ ફરતા જોવા મળ્યા હતા.

1997: ડાયનાનું મોત
ડાયના 31 ઓગસ્ટ 1997 ના રોજ પેરિસમાં ડિનર માટે કારમાં નીકળ્યા હતા, ત્યારે તેમની કારનો અકસ્માત થયો હતો અને તેઓ મૃત્યુ પામ્યા. આ સમાચાર સાંભળીને ડાયનાને ચાહનારા લાખો લોકોને આઘાત લાગ્યો હતો. આ સમાચાર વિશે રાણી એલિઝાબેથની પ્રતિક્રિયા ઘણી પાછળથી આવી, જેના પછી શાહી પરિવારને ટીકાઓનો સામનો કરવો પડ્યો હતો.

2007: પ્રથમ ટીવી સંબોધનને 50 વર્ષ
વર્ષ 2007એ રાણી એલિઝાબેથ IIના પ્રથમ ટેલિવિઝન સંબોધનનાં 50 વર્ષ પૂરાં થયાં હતાં. આ દરમિયાન તેમણે એક ભાષણ આપ્યું હતું. ભાષણમાં તેમણે કહ્યું હતું કે- વૃદ્ધત્વની એક વિશેષતા એ છે કે તમે તમારી આસપાસ થઈ રહેલા ફેરફારોને જુઓ અને અનુભવો છો. 50 વર્ષ પહેલાં જે બન્યું હતું એને યાદ કરીને અત્યારસુધી જે ફેરફારો થયા છે એની પ્રશંસા કરી શકાય. તમે એ પણ જાણો છો કે શું બદલાયું નથી.

2012: લંડન ઓલિમ્પિક
2012 લંડન ઓલિમ્પિકના ઉદઘાટન સમારોહમાં રાણી એલિઝાબેથ IIએ લોકોને આશ્ચર્યચકિત કર્યા હતા. તે પ્રખ્યાત જાસૂસ જેમ્સ બોન્ડનું પાત્ર ભજવનાર અભિનેતા ડેનિયલ ક્રેગ સાથે સમારોહમાં પહોંચ્યાં હતાં. એક વીડિયોમાં બતાવવામાં આવ્યું હતું કે જેમ્સ બોન્ડ (ડેનિયલ ક્રેગ) બ્રિટનનાં રાણીને લેવા મહેલમાં ગયા. બંને ત્યાં હેલિકોપ્ટરમાં સાથે બેઠા અને સ્ટેડિયમ જવા રવાના થયા. હેલિકોપ્ટર હવામાં હતું ત્યારે રાણી અને જેમ્સ બોન્ડ પેરાશૂટ વડે હેલિકોપ્ટરમાંથી છલાંગ લગાવી હતી. અલબત્ત, આ માટે રાણીના બોડી ડબલનો ઉપયોગ કરવામાં આવ્યો હતો.

2020: પ્રિન્સ હેરી અને મેગન માર્કલે શાહી પરિવારમાંથી અલગ થઈ ગયા​​​​​​​
બ્રિટનના રાજવી પરિવારના પ્રિન્સ હેરી અને મેઘન માર્કલે 2018માં લગ્ન કર્યા હતા. ઓક્ટોબર 2019માં એવું જાણવા મળ્યું કે શાહી પરિવાર અને આ બંને વચ્ચે બધું બરાબર નથી. આખરે મીડિયાની અટકળો સાચી પડી અને 9 જાન્યુઆરી 2020ના રોજ બંનેએ શાહી પરિવારથી અલગ થવાની જાહેરાત કરી. આ પછી જ દંપતીએ ‘રોયલ હાઇનેસ’નું બિરુદ અને શાહી પરિવાર દ્વારા આપવામાં આવતી તમામ સુવિધાઓ છોડી દીધી હતી.

2021: પ્રિન્સ ફિલિપનું મોત
પ્રિન્સ ફિલિપનું 9 એપ્રિલ 2021ના રોજ નિધન થયું હતું. તેઓ 99 વર્ષના હતા. રાણી એલિઝાબેથ દ્વિતીય અને તેમના લગ્નને 73 વર્ષ પૂર્ણ થયાં હતાં. ઈંગ્લેન્ડમાં કોરોના વાઇરસને કારણે લોકડાઉન દરમિયાન તે લંડનના વિન્ડસર કેસલમાં રાણી સાથે રહેતા હતા.