ઈમિગ્રેશનના નવા નિયમો
વિઝા આપતા પહેલા ડિજિટલ ઇતિહાસ અને વર્તનની ચકાસણી કરશે એમ્બેસી
- Advertisement -
તમે એક પ્રકારના વિઝા મેળવીને અમેરિકામાં પ્રવેશો એટલે તમને એ પ્રકારનું સ્ટેટસ પ્રાપ્ત થાય છે. જો તમારે બીજા પ્રકારના વિઝા ઉપર જે સ્ટેટસ પ્રાપ્ત થયું હોય એ કાર્ય કરવું હોય તો તમે અમેરિકામાં રહીને જ તમારું ‘સ્ટેટસ ચેન્જ’ કરી શકો છો. નોન-ઈમિગ્રન્ટમાંથી ઈમિગ્રન્ટ, ‘સ્ટેટસ એડ્જસ્ટ’ કરવાની માગણી પણ કરી શકો છો. તમને અમેરિકામાં રહેવા માટે જેટલો સમય આપવામાં આવ્યો એથી વધુ સમય રહેવું હોય તો ‘એક્સટેન્શન ઓફ સ્ટે’ની પણ માગણી કરી શકો છો.
તમારા લાભ માટે ઈમિગ્રન્ટ વિઝાનું પિટિશન દાખલ કરવામાં આવ્યું હોય એ મંજૂર થયું હોય અને ત્યાર બાદ તમને વિઝા મળે એ પહેલાં પિટિશરનું મૃત્યુ થયું હોય તો તમે એ મૃત પિટિશનરની જગ્યા અન્ય કોઈને આપવામાં આવે એવી ‘સબસ્ટિટ્યુશન’ની અરજી પણ કારણો દર્શાવીને કરી શકો છો.
તમારા લાભ માટે જે ઈમિગ્રન્ટ વિઝાનું પિટિશન દાખલ કરવામાં આવ્યું હોય છે અને તમારી જોડે તમારા સંતાનોને પણ ડિપેન્ડન્ટ વિઝા માટે સ્પોન્સર કરવામાં આવ્યા હોય, પણ એમની ઉંમર વધી જતા એમને ‘ડિપેન્ડન્ટ ઈમિગ્રન્ટ વિઝા’ મળી ન શકે. આવા સંજોગોમાં ‘ધ ચાઈલ્ડ સ્ટેટસ પ્રોટેક્શન એક્ટ’ હેઠળ જે દિવસે પિટિશન દાખલ કરવામાં આવ્યું હોય અને જે દિવસે એ એપ્રૂવ્ડ થયું હોય એટલો સમય તમે તમારી બાળકની ઉંમરમાંથી બાદ કરી શકો છો. અને એમ કરતાં એની ઉંમર એકવીસ વર્ષ કરતાં ઓછી હોય તો એને ઈમિગ્રન્ટ વિઝા મળી શકે છે.
અમુક સંજોગોમાં તમે તમારાં સંતાન માટે જે પિટિશન દાખલ કરતા હોય એની જે પ્રાયોરિટી ડેટ હોય એ તમારા પિટિશન જે તારીખ હતી એ જ હોવી જોઈએ એ ‘રિટેન્શન ઓફ પ્રાયોરિટી ડેટ’ની માગણી પણ કરી શકો છો.
તમે કંઈ ખોટું કર્યું હોય અને અમેરિકામાં પ્રવેશવા ઉપર તમારી સામે પાબંદી લગાડવામાં આવી હોય તો તમે માફી માગીને ‘વેવર’ની અરજી કરીને એમાંથી છૂટકારો મેળવી શકો છો. વેવરની અરજી બે પ્રકારની હોય છે: ‘નોન-ઈમિગ્રન્ટ વેવર’ તેમ જ ‘ઈમિગ્રન્ટ વેવર’. તમે જો કોઈ અમેરિકન સિટિઝનને રૂબરૂમાં મળ્યા હોવ અને એની જોડે અમેરિકામાં લગ્ન કરવા ઈચ્છતા હોવ તો કે-1 વિઝા મેળવીને અમેરિકામાં પ્રવેશીને એમની જોડે લગ્ન કરીને ગ્રીનકાર્ડ મેળવી શકો છો.
આમ અમેરિકામાં ટૂંક સમય માટે યા કાયમ રહેવા માટે જુદી જુદી રીતો, જુદા જુદા પ્રકારના વિઝાઓ ઉપલબ્ધ છે. તમારે એમાંના કયા વિઝાની તમને જરૂર છે એ જાણી લેવું જોઈએ. ત્યાર બાદ એ મેળવવાની લાયકાતો શું છે એ પણ સમજી લેવી જોઈએ અને પછી જ વિઝાની અરજી કરવી જોઈએ.
હવેથી અમેરિકાની સરકાર વિઝા આપવાની બાબતમાં અને વિઝાધારકોને અમેરિકામાં પ્રવેશવા દેવાની બાબતમાં ખૂબ જ કડક વલણ અખત્યાર કરતું થઈ ગયું છે. તેઓ તમારા સોશિયલ મિડિયા એકાઉન્ટને પણ ચોકસાઈભરી રીતે તપાસે છે. તમારો આગલો-પાછલો ઈતિહાસ જાણવાની કોશિશ કરે છે. તમે અમેરિકા માટે યોગ્ય વ્યક્તિ છો કે નહીં એની ચકાસણી કરે છે. જો એમને એવું લાગે કે તમે અમેરિકાના માથે બોજા રૂપ બની જશો, ‘પબ્લિક ચાર્જ’ બનશો તો તેઓ તમને અમેરિકામાં પ્રવેશવા નહીં દે. એક વાત બરાબર સમજી લો, અમેરિકા ભલે ઈમિગ્રન્ટોનો દેશ કહેવાતો હોય, પણ આજે કોઈ પણ ઈમિગ્રન્ટે અમેરિકામાં પ્રવેશવું હોય તો એ માટે એ લાયક છે કે નહીં એ એણે પુરવાર કરવાનું રહેશે.
