વિજય માલ્યા અને નીરવ મોદી જેવા ભાગેડુઓની 15,000 કરોડની સંપતિ જપ્ત કરાઈ: નાણા રાજ્ય મંત્રી પંકજ ચૌધરીએ આપી માહિતી

-વિદેશ ભાગી ગયેલા આ 19 પાસે 4000 કરોડ લેણાં નીકળે છે

વિજય માલ્યા અને નીરવ મોદી જેવા ભાગેડુ આર્થિક અપરાધીઓને સંડોવતા 19 કેસોમાં રૂ. 15,000 કરોડથી વધુની સંપત્તિ જપ્ત કરવામાં આવી છે અને જાહેર ક્ષેત્રની બેંકોને પરત કરવામાં આવી છે. જો કે, આ આંકડો છેતરપિંડીઓમાં સામેલ કુલ 40,000 કરોડના ભંડોળના ત્રીજા ભાગ કરતાં થોડી વધુ રકમ છે. મંગળવારે રાજ્યસભામાં નાણા રાજ્ય મંત્રી પંકજ ચૌધરીએ આ માહિતી આપી હતી.

અમલીકરણ નિર્દેશાલયે 19 વ્યક્તિઓ સામે ફ્યુજિટિવ ઇકોનોમિક ઓફેન્ડર્સ એક્ટ, 2018) હેઠળ અરજીઓ દાખલ કરી છે. જેમાંથી વિજય માલ્યા, નીરવ મોદી, નીતિન જયંતિલાલ સાંડેસરા, ચેતન જયંતિલાલ સાંડેસરા, દિપ્તી ચેતન જયંતિલાલ સાંડેસરા, હિતેશ કુમાર નરેન્દ્રભાઈ પટેલ, જુનૈદ ઈકબાલ મેમણ, હાજરા ઈકબાલ મેમણ, આસિફ ઈકબાલ મેમણ અને રામચંદ્રન વિશ્વનાથન નામના 10 લોકોને સક્ષમ અદાલતો દ્વારા ભાગેડુ જાહેર કરવામાં આવ્યા છે. તેમ તેમણે આર્થિક અપરાધીઓ સામેની કાર્યવાહી અંગેના પ્રશ્નના જવાબમાં જણાવ્યું હતું.

આ મામલાઓમાં સામેલ છેતરપિંડીની રકમ 40,000 કરોડ રૂપિયાથી વધુ છે, એમ તેમણે ઉમેર્યું હતું. “તારીખ સુધીમાં, રૂ. 15,113.02 કરોડની સંપત્તિ જપ્ત કરવામાં આવી છે અને જાહેર ક્ષેત્રની બેન્કોને પરત કરવામાં આવી છે. વધુમાં, એફઈઓએ હેઠળ ઉક્ત ભાગેડુ ના સંબંધમાં રૂ. 873.75 કરોડની સંપત્તિ પણ જપ્ત કરવામાં આવી છે,” મંત્રીએ જણાવ્યું હતું.

દરમિયાન, ભાગેડુ હીરાના અબજોપતિ નીરવ મોદીના કાકા મેહુલ ચોકસીની માલિકીની ગીતાંજલિ જેમ્સ શિડ્યુલ્ડ કોમર્શિયલ બેંકોના ટોચના વિલફુલ ડિફોલ્ટર છે. ગીતાંજલિ જેમ્સ પર 31 માર્ચ, 2023ના રોજ બેંકોના 8,738 કરોડ રૂપિયા બાકી છે.

કુલ મળીને, ટોચના 50 વિલફુલ ડિફોલ્ટરોએ આ વર્ષે 31 માર્ચના રોજ શેડ્યુલ્ડ કોમર્શિયલ બેંકોના રૂ. 87,295 કરોડના દેવાના બાકી છે. રાજ્યસભામાં અન્ય એક પ્રશ્નના જવાબમાં નાણાં રાજ્યમંત્રી ભગવત કરાડ દ્વારા આ માહિતી આપવામાં આવી હતી.

અન્ય ટોચના વિલફુલ ડિફોલ્ટર્સમાં એરા ઇન્ફ્રા એન્જિનિયરિંગને રૂ. 5,750 કરોડ, આરઈઆઈ એગ્રોને રૂ. 5,148 કરોડ, એબીજી શિપયાર્ડે રૂ. 4,774 કરોડ અને કોનકાસ્ટ સ્ટીલ એન્ડ પાવરને રૂ. 3,911 કરોડના લેણાનો સમાવેશ થાય છે.

આ ઉપરાંત, રોટોમેક ગ્લોબલ પ્રાઈવેટને રૂ. 2,894 કરોડ, વિન્સમ ડાયમંડ્સ એન્ડ જ્વેલરીએ રૂ. 2,846 કરોડ, ફ્રોસ્ટ ઇન્ટરનેશનલને રૂ. 2,518 કરોડ, શ્રી લક્ષ્મી કોટસિનને રૂ. 2,180 કરોડ અને ઝૂમ ડેવલપર્સ પ્રાઇવેટને રૂ. 2,66 કરોડ, આ બેંકના રૂ. 6 કરોડના લેણાં બાકી છે.