ક્રાઇમ બ્રાન્ચના નામે તોડ કરવા ગયેલા શખ્સ સામે ગુનો

‘તમે દારૂ વેચો છો, હું ડીસીબીમાંથી આવું છું’ કહી રોફ જમાવ્યો

લોકોએ પીછો કરતાં ઍક્ટિવા સહિત પટકાયો: પોલીસે કરી ધરપકડ
ખાસ-ખબર ન્યૂઝ રાજકોટ

રાજકોટના ચુનારાવાડ પાસે આજી નદીના કાંઠે બાપાસીતારામનગરમાં રહેતા વિજયભાઇ વિનુભાઇ ગોહેલએ પોલીસની ઓડખ આપી રોફ જમાવવા નીકળેલા અજાણ્યા શખ્સ સામે થોરાળા પોલીસમાં નોંધાવેલી ફરિયાદમાં જણાવ્યું હતું કે, રાત્રીના એકાદ વાગ્યે તેના મામાના દીકરા પરાગ સાથે ચુનારાવાડમાં બેઠા હતા અને વાતો કરતા હતા તે દરમિયાન એક્ટિવા ચાલક ત્યા ધસી આવ્યો હતો અને ઉભો રહીને કહેવા લાગેલ કે મોડી રાત સુધી કેમ જાગો છો ઘરે જઇને સુઇ જાવ જેથી મારા મામાનો દીકરો પરાગ આ શખ્સને કહેલ કે તમે કોણ છો, અને ક્યાથી આવો છો જેથી આ શખ્સે તેની ઓળખ ક્રાઇમબ્રાંચ પોલીસ સ્ટેશનમાંથી આવું છું અને હું ત્યા પોલીસ તરીકે ફરજ બજાવું છું અને કહેવા લાગેલ કે તમે દારૂનો ધંધો કરો છો, અમો દારૂનો ધંધો કરતા નથી તેવું કહેતા તે શખ્સ ઉશ્કેરાઇ જઇને મને કહેવા લાગેલ કે ચાલ મને તું તારું મકાન બતાવ મારે તારા ઘરની તલાસી લેવી છે. જેથી તેને પોલીસ હોવાનું સમજી મારા ઘેર લઇ ગયો હતો અને તેને મારા ઘરની તલાસી લીધી હતી અને અહી કોણ-કોણ દારૂ વેચે છે. જેથી મે તેને અમારી આજુબાજુવાળા કોઇ દારૂ વેચતા નથી તેમ જણાવ્યું હતું. બાદમાં તેને કહેલ કે તમે ડીસીબી પોલીસ મથકમાં ફરજ બજાવો છો તો તમારું આઇકાર્ડ તો બતાવો જેથી આ શખ્સ ગલ્લાતલ્લા કરવા માંડયો હતો અને તેનું એક્ટિવા લઇને ભાગી ગયો હતો.

દરમિયાન લોકો એકઠા થઇ ગયા હતા અને તેનો પીછો કર્યો હતો જેથી એક્ટીવા કેસરી હિન્દ પુલ પર સ્લિપ થતા લોકાએ પકડી પોલીસને જાણ કરતા થોરાળા પોલીસ મથકના પીઆઇ વાઘેલા સહિતે તેની સામે ગુનો નોંધી આરોપીની ધરપકડ કરી હતી.