ખાસ-ખબર ન્યૂઝ ગિર સોમનાથ, તા.29
જિલ્લામાં ચોમાસા દરમિયાન સંભવિત ભારે વરસાદ, પુરપ્રકોપ સહિતની કુદરતી આફતોને પહોંચી વળવા માટે એનડીઆરએફ બટાલીયન કમાંડર શ્રી વી.વી.એન પ્રસન્નાકુમારનાં માર્ગદર્શન હેઠળ એનડીઆરએફની 30 જવાનો સાથેની ટીમને સાઈકલોન સેન્ટર ભાલપરા ખાતે તૈનાત કરવામાં આવી છે. એનડીઆરએફ ટીમના ઈન્સ્પેકટર કૈલાશ બાથમે જણાવ્યું હતું કે, કોઈપણ કુદરતી આફત સમયે એનડીઆરએફના જવાનો બચાવ અને રાહત માટે સજ્જ હોય છે.
- Advertisement -
અત્યારે ચોમાસાની ઋતુ ચાલી રહી છે ત્યારે વેરાવળ શહેરના પાણી ભરાતા વિસ્તારો જેવા કે, જાલેશ્વર, ભીડિયા, ખારવાવાડ વગેરે જગ્યાઓએ જઈને એનડીઆરએફની ટીમ લોકોને જાગૃત કરવા સાથે સ્થળ સ્થિતિનું નિરિક્ષણ કર્યું હતું. જેથી આફત સમયે ત્વરિત પગલા લઈ શકાય. એનડીઆરએફની ટીમ રબ્બર બોટ, ઈલેક્ટ્રિક કટર, લાઈફ જેકેટ, વિવિધ પ્રકારના દોરડાઓ, લાઇફ સેવર રિંગ, ડીપ ડ્રાઇવ સ્યૂટ જેવા તમામ પ્રકારના સાધનોથી સજ્જ છે. જેથી કોઈપણ વિપરિત પરિસ્થિતિનું નિર્માણ થાય તો ઝડપથી લોકોને બચાવ કરી શકાય અને જાનમાલને થતું નુકસાન અટકાવવાના અસરકારક અને ઝડપી પગલાં લઈ શકાય.
