ચોમાસાની ઋતુમાં 24 કલાક કંટ્રોલરૂમ, વરસાદી પાણી ભરવાની સમસ્યા સહિતના મુદ્દે માર્ગદર્શન

જૂનાગઢ જિલ્લામાં પ્રી-મોન્સૂનની કામગીરીની સમીક્ષા બેઠક

ખાસ-ખબર ન્યૂઝ જૂનાગઢ
જૂનાગઢ જિલ્લા કલેકટર અનિલકુમાર રાણાવસિયાના અધ્યક્ષ સ્થાને ચોમાસા દરમિયાન કરવાની થતી પૂર્વ તૈયારીઓના આયોજનની સમીક્ષા કરવામાં આવી હતી. આ બેઠકમાં કલેકટરે ચોમાસા દરમિયાન રાઉન્ડ ધ ક્લોક કંટ્રોલરૂમ ચાલુ રાખવા, શહેરના જે વોર્ડમાં પાણી ભરાવાના પ્રશ્નો ઉદ્ભવે છે ત્યાં જરૂરી કામગીરી કરવા, ચોમાસા દરમિયાન શહેરમાં સ્વચ્છતા જળવાઈ રહે તે માટે જરૂરી પગલા લેવા, પીવાના પાણીની વ્યવસ્થા તથા ક્લોરીનેશન, ગટર, બુગદા સાફ કરાવવા અને વરસાદના પાણીના નિકાલની વ્યવસ્થા અંગે તા. 1 જૂનથી ફ્લડ સેલ કાર્યરત કરવા જરૂરી માર્ગદર્શન આપ્યું હતું.
આ ઉપરાંત ચોમાસા દરમિયાન શહેરમાં આવેલા મોટા હોર્ડિંગ્સ વરસાદના લીધે પડે નહીં અને જો પડે તો પડે તેમ હોય તો ઉતારવાની વ્યવસ્થા, શહેરી વિસ્તારમાં જર્જરિત મકાનોની યાદી, ફાયર અને શોધ બચાવના સંસાધનો ચકાસવા, ડેમનું પ્રી- મોનસુન ઇન્સ્પેક્શન, ગામડાઓમા આશ્રય સ્થાન તરીકે ઉપયોગ કરવા માટે શાળાઓની યાદી, પ્રાથમિક આરોગ્ય કેન્દ્રમાં વીજળી, દવા સહિતની સુવિધાઓ અંગે તેમજ ખાસ કરીને ઘેડ વિસ્તારમાં જ્યારે વરસાદના કારણે કેટલાક ગામડાઓ વિખુટા પડી જાય છે ત્યારે આ વિસ્તારમાં સગર્ભાઓની યાદી, પેરામેડિકલ સ્ટાફ, ઘેડવિસ્તાર માટે અનાજનો જથ્થો અગાઉથી ઉપલબ્ધ કરવા અંગે જરુરી સૂચનાઓ આપી હતી. તેમજ ઘેડ વિસ્તારમાં જે રસ્તાઓ ઉપર દર વર્ષે પાણી ભરાય છે તેની અગાઉથી ઓળખ કરવા અંગે પણ કલેક્ટરે સંબંધિત અધિકારીઓને માર્ગદર્શન આપ્યું હતું.

આ ઉપરાંત સિવિલ હોસ્પિટલ જૂનાગઢમાં પણ ઇમર્જન્સી સહિતની સેવાઓ, દવાનો જથ્થો, કંટ્રોલરૂમ સહિતની બાબતની સમીક્ષા કરવામાં આવી હતી. આ બેઠકમાં મનપા કમિશનર ડો. ઓમ પ્રકાશ, જિલ્લા વિકાસ અધિકારી નીતિન સાંગવાન ,અધિક કલેકટર એન. એફ. ચૌધરી ,પ્રાંત અધિકારીઓ ,મામલતદાર, તાલુકા વિકાસ અધિકારીઓ તેમજ વિવિધ વિભાગના અધિકારીઓ ઉપસ્થિત રહ્યા હતા.