ટ્રમ્પના પુત્રએ અનંત-રાધિકા સાથે રાસ-ગરબાની રમઝટ બોલાવી

ડોનાલ્ડ ટ્રમ્પ જૂનિયરે ગણપતિ મંદિરમાં દર્શન કર્યાં, ‘વનતારા’ પ્રોજેક્ટની મુલાકાત લઈ પ્રાણી સંગ્રહાલય અને કુદરતી સૌંદર્યને નિહાળ્યું

ખાસ-ખબર ન્યૂઝ રાજકોટ

અમેરિકાના રાષ્ટ્રપતિ ડોનાલ્ડ ટ્રમ્પના પુત્ર ડોનાલ્ડ ટ્રમ્પ જુનિયર તેની ગર્લફ્રેન્ડ સાથે જામનગર આવી પહોંચ્યા હતા. તેઓ સાંજે જામનગર એરપોર્ટ પર ઊતર્યા હતા. એ બાદ ટટઈંઙ સુરક્ષા બંદોબસ્ત સાથે રિલાયન્સ દ્વારા સંચાલિત ‘વનતારા’ પ્રોજેક્ટ ખાતે જવા રવાના થયા હતા, જ્યાં વનતારાની મુલાકાત લીધી હતી. આ દરમિયાન તેમણે ગણપતિ મંદિરમાં દર્શન કર્યાં હતાં અને રાધિકા અને અનંત અંબાણી સાથે ગરબા પણ રમ્યા હતા. અમેરિકાના રાષ્ટ્રપતિ ડોનાલ્ડ ટ્રમ્પના પુત્ર જુનિયર ટ્રમ્પ અંબાણી પરિવારના આમંત્રણ પર જામનગર પહોંચ્યા હતા. તેમની આ મુલાકાત શહેર માટે એક વિશેષ પ્રસંગ બની રહી હતી.

રાધિકા અને અનંત અંબાણી સાથે ડોનાલ્ડ ટ્રમ્પના પુત્ર ડોનાલ્ડ ટ્રમ્પ જુનિયર તેની ગર્લફ્રેન્ડ ગરબે ઘૂમ્યા હતા. જામનગરમાં રાસ-ગરબાની રમઝટ બોલાવી હતી. મારું મન મોર બની થનગાટ કરે… સહિતના ગરબાના તાલે હાથમાં દાંડિયા લઈ રાસ-ગરબાની રમઝટ બોલાવી હતી.

અનંત અંબાણી સાથે મુલાકાત કર્યા બાદ જુનિયર ટ્રમ્પ વનતારા જોવા ગયા હતા. વનતારામાં તેમણે પ્રાણી સંગ્રહાલય અને કુદરતી સૌંદર્યને નિહાળ્યું હતું. અંબાણી પરિવારના પર્યાવરણ સંરક્ષણના વિઝનને નજીકથી જોયું હતું. આ મુલાકાતથી તેમને પ્રકૃતિ પ્રત્યેની ભારતીય સંસ્કૃતિની ઊંડાણપૂર્વકની સમજ મળી હતી.

વનતારાની મુલાકાત બાદ જુનિયર ટ્રમ્પે ત્યાં આવેલાં મંદિરોની પણ મુલાકાત લીધી હતી. તેમણે ગણપતિ મંદિર સહિતનાં ધાર્મિક સ્થળોએ પૂજા-અર્ચના કરી શાંતિ અને આધ્યાત્મિક ઊર્જાનો અનુભવ કર્યો હતો. આ સમગ્ર પ્રવાસ દરમિયાન જુનિયર ટ્રમ્પ ભારતીય પરંપરા, આતિથ્ય અને આધ્યાત્મિક વાતાવરણથી અત્યંત પ્રભાવિત થયા હતા. તેમણે આ અનુભવને અનોખો અને યાદગાર ગણાવ્યો હતો.
ઉલ્લેખનીય છે કે અમેરિકાના રાષ્ટ્રપતિ ડોનાલ્ડ ટ્રમ્પના પુત્ર ડોનાલ્ડ ટ્રમ્પ જુનિયર જામનગર આવ્યા એ પહેલાં પહેલીવાર તાજમહેલની મુલાકાત લીધી હતી, જ્યાં તેમણે ડાયના બેન્ચ પર તેમની ગર્લફ્રેન્ડ સાથે ફોટો પડાવ્યો હતો તેમજ મુઘલ સમ્રાટ શાહજહાં અને તેમનાં પત્ની મુમતાઝ મહેલની કબરની પણ મુલાકાત લીધી.