આજે શરદપૂનમની રાતે ‘માડી’ ગરબામાં આખું શહેર ઝૂમી ઉઠશે

રાજકોટિયનોને જાહેર આમંત્રણ, શહેર એકસાથે ગરબા રમી ઇતિહાસ રચશે

રેસકોર્સમાં યોજાનારા પાર્થિવ ગોહીલના કાર્યક્રમની તૈયારીની મુલાકાત લેતા ડો.ભરત બોઘરા

ખાસ-ખબર સંવાદદાતા
આયોજકો દ્વારા રાજકોટ શહેરના શૈક્ષણીક, સામાજિક, રાજકીય, મેડિકલ, ઉદ્યોગજગત તેમજ વ્યવસાયિક ક્ષેત્રના 600થી વધુ વી.વી.આઇ.પી અને 3000થી વધુ વી.આઇ.પી મહેમાનો અને આગેવાનોને ખાસ નિમંત્રિત કરાયા છે. તેમના માટે બાલભવનના ગેઇટથી પ્રવેશ અપાશે તેમજ તેમના વાહનોના પાર્કિંગ માટે ઇન્ડોર સ્ટેડિયમ અને રમેશભાઇ પારેખ રંગદર્શન ખાતે પાર્કીંગની વ્યવસ્થા કરવામાં આવી છે. ખેલૈયાઓ અને જાહેર જનતા માટે પોલીસ કમિશ્નર દ્વારા જાહેર કરેલ જાહેરનામા અનુસાર ચૌધરી હાઇસ્કૂલ ગ્રાઉન્ડ, માધવરાવ સિંધિયા ક્રિકેટ ગ્રાઉન્ડ પાસે, બહુમાળી ભવનની અંદર, ફનવર્લ્ડની સામેની શેરીમાં, એરપોર્ટ રોડ પર આરાધના સોસાયટીથી ગીતગુર્જરી સોસાયટીના બગીચા પાસે અને પોલીસ હેડકાર્ટર ખાતે પાર્કીંગ કરી શકાશે.
ઉપસ્થિત મહાનુભાવો 1 લાખ લોકોને ’મારું રાજકોટ ડ્રગ્સ મુક્ત રાજકોટ’નો સંકલ્પ કરાવશે. ભારતીય જનતા પાર્ટી ગુજરાત પ્રદેશ અધ્યક્ષ સી. આર. પાટીલ, ગૃહ રાજ્યમંત્રી હર્ષ સંઘવી સહીતના મહાનુભાવો કાર્યક્રમમાં એક લાખ શહેરીજનોને ’મારું રાજકોટ ડ્રગ્સ મુક્ત રાજકોટ’નો સંકલ્પ કરાવી અને એક લાખથી વધુ લોકોમાં ડ્રગ્સ મુક્તિ અંગેની જાગૃતિ ફેલાવી ઇતિહાસ રચશે.
એક લાખથી વધુ ખેલૈયાઓ એકઠા થઈ વિશ્વ વિક્રમ બનાવશે. જેની તૈયારીની સમીક્ષા પ્રદેશ ભાજપ ઉપાધ્યક્ષ ડો.ભરત બોઘરા સહિતના ભાજપના પદાધિકારીઓએ કરી હતી.

‘માડી’ ગરબામાં ભવ્ય, અદભૂત અને ઐતિહાસિક નઝારો નિહાળવા રાજકોટવાસીઓને જાહેર નિમંત્રણ પાઠવાયું છે. આ કાર્યક્રમ તમામ ખેલૈયાઓ અને નગરજનો માટે નિ:શુલ્ક છે. તેથી કાર્યક્રમના મુખ્ય આયોજકો પ્રદેશ ભાજપના ઉપાધ્યક્ષ ડો. ભરતભાઈ બોઘરા, શહેર ભાજપાના અધ્યક્ષ મુકેશભાઈ દોશી, રાજકોટ સ્વનિર્ભર શાળા સંચાલક મંડળના પ્રમુખ ડી. વી. મહેતા, મહામંત્રી પરિમલભાઈ પરડવા તેમજ ઇન્ક્રેડીબલ ગૃપના અતુલભાઇ વાઘેલા, યોગેશભાઈ સોલંકી તેમજ અલ્કેશભાઇ ચાવડા તમામ નગરજનોને આ ભવ્ય કાર્યક્રમ માણવા નિમંત્રીત કરે છે. કોઇપણ શહેરીજન પાસે પાસ ન હોય તો પણ કાર્યક્રમમાં પ્રવેશ આપવા આયોજકો દ્વારા નિર્ણય કરાયો છે.
રેસકોર્ષ ગ્રાઉન્ડમાં તમામ તૈયારીઓ પૂર્ણ થઇ ગઇ છે. બોલીવુડ સિંગર પાર્થિવ ગોહીલ તેમના સાજીંદાઓ સાથે સાંજે 7 વાગ્યાથી ગરબા પર રાજકોટવાસીઓને ડોલાવશે. આકર્ષક અને કલાત્મક સ્ટેજ તથા અલ્ટ્રા મોર્ડન સાઉન્ડ સિસ્ટમની અદભુત વ્યવસ્થા સાથે 5 લાખ સ્ક્વેર ફીટમાં એક સાથે 1 લાખથી વધુ શહેરીજનો ગરબા રમી શકે તે માટે ભવ્ય અને આકર્ષક સ્ટેજ, અદ્યતન સાઉન્ડ સિસ્ટમ, માઇક, એલ.ઇ.ડી, લાઇટીંગ વગેરે વ્યવસ્થાઓ કરવામાં આવી છે. આયોજકોમાં ખેલૈયાઓને આવકારવા અદમ્ય ઉત્સાહ વર્તાય રહ્યો છે. આજે સાંજે 7 વાગ્યે કાર્યક્રમ શરુ કરી દેવાશે. તમામ લોકોને જોડાવા અપીલ કરવામાં આવે છે.

પાર્થિવ ગોહિલના સંગાથે ઉજવણીમાં ઉમટી પડવા રાજકોટવાસીઓને હાકલ કરતા રાજુભાઈ ધ્રુવ
વડાપ્રધાન મોદી અને રાજકોટ વચ્ચે પરસ્પર લાગણીભર્યો આત્મિય સંબંધનું ઉદાહરણ એટલે ગરબાની ઉજવણી

ખાસ-ખબર સંવાદદાતા
લોકહૃદય સમ્રાટ અને સર્વાધિક લોકપ્રિય વિશ્વનેતા વડાપ્રધાન નરેન્દ્ર મોદીની આધ્યાત્મિક સંવેદનાઓની અનુભૂતિ સમાન તેમના દ્વારા જ રચિત ’માડી’ ગરબાના મંચન દ્વારા ઇતિહાસ રચાવા જઈ રહ્યો છે ત્યારે આ ઐતિહાસિક ક્ષણના સાક્ષી બનવા માટે રાજકોટમાં પ્રજાજનો બહોળી સંખ્યામાં ઉમટી પડે તેવી હાકલ સૌરાષ્ટ્ર ભાજપના પ્રવક્તા રાજુભાઈ કરી છે. રાજકોટમાં જુદી જુદી સંસ્થાઓના સહકારથી રેસકોર્સ ગ્રાઉન્ડમાં આ ગરબાનું આયોજન કરવામાં આવ્યું છે અને તેમાં લાખોની સંખ્યામાં ભાઈ-બહેનો ઉંટી પડશે તેવી શ્રદ્ધા વ્યક્ત કરતા રાજુભાઈ ધ્રુવે તેની પણ કહ્યું છે કે વડાપ્રધાન નરેન્દ્ર મોદી અને રાજકોટના સંબંધો કાયમ લાગણીભર્યા, અતૂટ અને અવિસ્મરણીય રહ્યા છે. રાજુભાઈ ધ્રુવે અંતમાં તમામ રાજકોટવાસીઓને સાંજે 7 વાગ્યે રેસકોર્સ મેદાનમાં માતાજીની આરાધના માટે ઉમટી પડવા હાકલ કરી છે