લોકસભા ચૂંટણી 2024માં અત્યાર સુધીની સૌથી વધુ રૂ.4,650 કરોડની રકમ જપ્ત

લોકસભા ચૂંટણી 2019માં ચૂંટણીપંચે રૂ. 3,475 કરોડની રકમ જપ્ત કરી હતી, આંકડો હજી વધી શકે

ખાસ-ખબર ન્યૂઝ  નવી દિલ્હી, તા.16

લોકસભા ચૂંટણી 2024માં આ વખતે ધૂમધામથી પ્રચાર થઈ રહ્યો છે. સમગ્ર દેશમાં કુલ સાત તબક્કામાં ચૂંટણી યોજવામાં આવશે. આ વખતની ચૂંટણીમાં ચૂંટણીપંચે 75 વર્ષના ઇતિહાસમાં સૌથી વધુ ગેરકાયદેસરના રુપિયા જપ્ત કર્યા છે. આ રકમ 4,650 કરોડ રુપિયા પર પહોંચી ચૂકી છે. આ જોતાં પાંચ હજાર કરોડ રુપિયાનો આંકડો નજીકમાં લાગે છે.

2024ની ચૂંટણીમાં નાણાની રેલમછેલ અટકાવવા માટે ચૂંટણીપંચ જબરદસ્ત ચળવળ ચલાવી રહ્યું છે. પંચ દ્વારા શેર કરવામાં આવેલી જાણકારી મુજબ પહેલી માર્ચ 2024થી અત્યાર સુધી રોજના 100 કરોડ રુપિયા જપ્ત કરવામાં આવ્યા છે. પંચનું કહેવું છે કે મતદાન શરુ થતાં પહેલા 4,650 કરોડ રુપિયા જપ્ત થઈ ચૂક્યા છે. આ રકમ 2019ની લોકસભા ચૂંટણીમાં જપ્ત કરવામાં આવેલી રકમ કરતાં વધારે છે.
ચૂંટણીપંચનું કહેવું છે કે ચૂંટણીમાં નાણાકીય તાકાતનો ઉપયોગ કરવા માટે આકરી કાર્યવાહી કરવામાં આવશે. ગેરકાયદેસરના નાણાની જપ્તી જારી રહેશે. પંચ દ્વારા જણાવાયા મુજબ એજન્સીઓએ 18મી લોકસભા ચૂંટણીમાં મતદાન પહેલા કુલ 4,650 કરોડ રુપિયાની રકમ જપ્ત કરી હતી. જ્યારે 2019ની ચૂંટણીમાં 3,475 કરોડ રુપિયાની રકમ જપ્ત કરવામાં આવી હતી.

પંચના જણાવાયા મુજબ અત્યાર સુધી ચૂંટણીમાં 395.39 કરોડ રુપિયા જપ્ત કરવામાં આવી ચૂક્યા છે. આ ઉપરાંત 489 કરોડ રુપિયાનો દારુ, 2,069 કરોડ રુપિયાનું ડ્રગ્સ, 562 કરોડની કિંમતી ધાતુ, 1,142 કરોડની ફ્રી ઓફર કરવામાં આવનારી ચીજો જપ્ત કરવામાં આવી છે. ચૂંટણીમાં પારદર્શકતા અને નિષ્પક્ષતા જાળવી રાખવા માટે પંચ જુદી-જુદી એજન્સીઓની મદદ ળઈ રહ્યું છે. તેમા રોકડ અને સોના-ચાંદી,હીરાની જપ્તી માટે આવકવેરા, રાજ્ય પોલીસ, રિઝર્વ બેન્ક, એસએલબીસી, એએઆઇ, બીસીએએસ, સ્ટેટ સિવિલ એવિયેશન, ઇડી, પોસ્ટ વિભાગ, અને સીઆઇએસએફની મદદ લેવાઈ રહી છે. જ્યારે દારુ વેચાતો રોકવા માટે સ્ટેટ પોલીસ, સ્ટેટ એક્સાઇઝ અને આરપીએફની મદદ કરવામાં આવી રહી છે.

આ ઉપરાંત મફતમાં વહેંચવામાં આવનારી વસ્તુ માટે ચૂંટણીપંચ સીજીએસટી, એસજીએસટી, રાજ્ય પરિવહન વિભાગ અને કસ્ટમ્સ તથા રાજ્ય પોલીસની મદદ લઈ રહ્યું છે. આ ઉપરાંત આસામ રાઇફલ્સ, બીએસએફ, એસએસબી, આઇટીબીપી, સીઆરપીએફ, વનવિભાગ અને સ્ટેટ પોલીસની પણ મદદ લેવાઈ રહી છે.