વાયુ સેના અને મનપા દ્વારા અટલ સરોવર ફરતે સ્માર્ટ સિટી વિસ્તારમાં બે દિવસ વિશેષ આકર્ષણ
રાજકોટવાસીઓને પ્રથમ વાર એરફોર્સ બેન્ડની સુરાવલી સાંભળવાની તક મળશે: રાજકોટ શહેરમાં ગરુડ કમાન્ડોના શસ્ત્રોનું પણ પ્રથમ વખત પ્રદર્શન યોજાશે
- Advertisement -
એરોબેટિક ડિસ્પ્લે ટીમ દિલધડક અવકાશી પરફોર્મન્સ પ્રદર્શિત કરી શહેરીજનોને કરશે મંત્રમુગ્ધ: એક કલાક સુધી સૂર્યકિરણ ટીમ આકાશમાં કરશે પ્રદર્શન
ખાસ-ખબર ન્યૂઝ રાજકોટ
ભારતીય વાયુ સેના અને રાજકોટ મહાનગરપાલિકા દ્વારા 7 ડિસેમ્બરને રવિવારે સવારે 10 વાગ્યે અટલ સરોવર આસપાસના સ્માર્ટ સીટીના વિસ્તાર અટલ સરોવર ફરતે આકાશમાં અદભુત સૂર્યકિરણ એર-શો, એરફોર્સ બેન્ડનું પરફોર્મન્સ અને શસ્ત્ર પ્રદર્શન યોજાશે. આ ઉપરાંત એક દિવસ અગાઉ એટલે કે 6 ડિસેમ્બરને શનિવારે સવારે 10:00 કલાકે સૂર્યકિરણ એર-શોનું ફૂલ ડ્રેસ રિહર્સલ પણ યોજાશે.
મ્યુનિસિપલ કમિશનર તુષાર સુમેરાએ માહિતી આપતા જણાવ્યું હતું કે, ભારતના ગૌરવ અને શૌર્યની પ્રતીક એવી ભારતીય વાયુ સેનાની સૂર્યકિરણ એરોબેટિક ડીસ્પ્લે ટીમ દિલધડક અવકાશી પરફોર્મન્સ પ્રદર્શિત કરી શહેરીજનોને મંત્રમુગ્ધ કરી દેશે. આ એરશો દરમ્યાન જામનગરથી ઉડાન ભરનાર 9 કે તેથી વધુ પ્લેનની ટીમ સ્માર્ટ સીટી એરિયા ઉપર એરોબેટિક ડીસ્પ્લે રજુ કરશે. સામાન્ય રીતે એરશોનો સમયગાળો 30 મિનિટ જેવો હોય છે પરંતુ રાજકોટમાં એક કલાક જેવો સમય ફાળવવામાં આવ્યો છે. સાથો સાથ એરફોર્સ બેન્ડની સુરાવલી સાંભળવાની પ્રથમવાર તક મળે તે પણ ગૌરવની વાત છે. આ ઉપરાંત રાજકોટ શહેરમાં ગરુડ કમાન્ડોના શસ્ત્રોનું પણ પ્રથમ વખત પ્રદર્શન યોજાશે. આ ઉપરાંત જો ઉપલી કક્ષાએથી ટેકનિકલ મંજૂરી મળે તો તેમાં અન્ય આકર્ષણોનો ઉમેરો થવાની શક્યતા છે.
- Advertisement -
પ્રદર્શન કરનાર ટીમની વિગતો
વિમાન : હિન્દુસ્તાન એરોનોટિક્સ લિમિટેડ હોક ખસ-132 ટ્રેનર જેટ
સૂત્ર : “સદૈવ સર્વોત્તમ” (હંમેશા શ્રેષ્ઠ)
રચના : નવ વિમાનોના જૂથમાં પ્રખ્યાત પ્રદર્શન કરે છે, જે તેમને વિશ્વની આવી થોડી ટીમોમાંની એક બનાવે છે
તાલીમ : છ મહિનાની સઘન તાલીમ અને રિહર્સલના સખત વાર્ષિક ચક્રમાંથી પસાર થાય છે, ત્યારબાદ છ મહિનાના પ્રદર્શન
મુખ્ય દાવપેચ : હાર્ટ લૂપ્સ, બેરલ રોલ્સ અને તેમના સિગ્નેચર “ઉગઅ દાવપેચ” સામેલ છે
પ્રથમ : આ એરોબેટીક ટીમ સમગ્ર દક્ષિણ એશિયાની એકમાત્ર એરોબેટીક ડિસ્પ્લે ટીમ છે, પ્રથમ નિદર્શન 8 ઓક્ટોબરે ભારતીય વાયુ સેના દિવસની ઉજવણીમાં પાલમ ખાતે કરવામાં આવ્યું હતું
નામ : 27 મે, 1996માં સૂર્ય કિરણ નામ આપવામાં આવ્યું હતું.
આંતરરાષ્ટ્રીય : વર્ષ 2001માં સૌ પ્રથમ વાર શ્રી લંકા ખાતે આંતરરાષ્ટ્રીય કક્ષાએ તેને પરફોર્મ કર્યું હતું.
એરોસોલ : સૂર્યકિરણના એડવાન્સ વિમાનો વિવિધ ફ્લાઇટ ડિઝાઇન અને પેટર્ન બનાવવા માટે એરોસોલનો ઉપયોગ કરે છે.
યુવાઓમાં એરફોર્સમાં કારકિર્દી અંગે ઉત્સાહ વધારવા એર શોનું આયોજન
યુવાઓમાં એરફોર્સમા કારકિર્દી અંગે ઉત્સાહ વધારવા એર શોનું આયોજન કરવામાં આવ્યું છે. નાગરિકો અને ખાસ કરીને બાળકો તથા યુવાઓને ભારતીય સશસ્ત્રદળ અને એરફોર્સમાં જોડાવા માટે પ્રેરિત કરવા તથા ભારતીય વાયુ સેનાની શૌર્ય અને ગૌરવથી ભરપૂર કામગીરીથી સામાન્ય નાગરિકોને વાકેફ કરવામાં આવે છે. એર શોમાં વિવિધ અન્ય ટ્રાન્સપોર્ટ એરક્રાફ્ટ કેરિયર અને હેલિકોપ્ટર પણ ભાગ લેશે. 1996માં રચાયેલ, જઊંઅઝ વિશ્વની ખૂબ જ ઓછી નવ-એરક્રાફ્ટ એરોબેટિક્સ ટીમોમાંની એક છે અને એશિયામાં એકમાત્ર છે. આ અનોખી ટીમે ભારતમાં 500 થી વધુ પ્રદર્શનો કર્યા છે.
વ્યુઈંગ સ્થળો જાહેર કરવામાં આવશે
સમગ્ર અટલ સરોવર ફરતે સ્માર્ટ સિટી વિસ્તારમાં આ એર શો સારી રીતે નિહાળી શકાશે. લોકો સારી રીતે એર શો નિહાળી શકે તે માટે અટલ સરોવર બહાર બેસીને અથવા ઊભા રહી શકે તે રીતે વ્યુઈંગ સ્થળો જાહેર કરવામાં આવશે. આ પ્રકારના સ્થળોનો નકશો તૈયાર કરી લોકોને શેર કરવામાં આવશે. લોકોની સેફટી માટે બીઆરટીએસ કોરિડોર ખાલી રાખવા તથા લોકોને વ્યવસ્થાપનના ભાગરૂપે બે કલાક પહેલા સ્થળ પર પહોંચી જવા અનુરોધ કરવામાં આવે છે.
