બાબા રામદેવ અને આચાર્ય બાલકૃષ્ણને પતંજલિ ‘ભ્રામક જાહેરાત કેસ’માં સુપ્રીમ કોર્ટમાંથી મોટી રાહત
યોગગુરુ રામદેવ અને પતંજલિ આયુર્વેદના આચાર્ય બાલકૃષ્ણને મોટી રાહત આપતાં સુપ્રીમ કોર્ટે તેમની સામેના માનહાનિનો કેસ ને બંધ કરી દીધો છે. રામદેવ અને બાલકૃષ્ણએ લેખિતમાં માફી માંગી હતી અને કહ્યું હતું કે, ભવિષ્યમાં પતંજલિ ઉત્પાદનોને લઈને ભ્રામક જાહેરાતો અને ભ્રામક દાવા કરવામાં આવશે નહીં. સુપ્રીમ કોર્ટે 14 મેના રોજ ભ્રામક જાહેરાતના કેસમાં યોગ ગુરુ રામદેવ તેમના સહયોગી બાલકૃષ્ણ અને પતંજલિ આયુર્વેદ લિમિટેડને આપવામાં આવેલી અવમાનના નોટિસ પર પોતાનો આદેશ સુરક્ષિત રાખ્યો હતો.
- Advertisement -
નોંધનિય છે કે, અગાઉ પતંજલિ આયુર્વેદ લિમિટેડે સુપ્રીમ કોર્ટને જાણ કરી હતી કે, તેમણે 14 ઉત્પાદનોનું વેચાણ અટકાવ્યું હતું જેનાં ઉત્પાદન લાયસન્સ એપ્રિલમાં ઉત્તરાખંડ રાજ્ય લાયસન્સિંગ ઓથોરિટી દ્વારા સસ્પેન્ડ કરવામાં આવ્યાં હતાં. કંપનીએ જસ્ટિસ હિમા કોહલી અને જસ્ટિસ સંદીપ મહેતાની ખંડપીઠને કહ્યું હતું કે, તેમણે 5,606 ફ્રેન્ચાઈઝી સ્ટોર્સને આ પ્રોડક્ટ્સ પાછી ખેંચી લેવાનો નિર્દેશ આપ્યો છે.
આ પછી બેન્ચે પતંજલિ આયુર્વેદને એફિડેવિટ દાખલ કરવાનો નિર્દેશ આપ્યો હતો. કોર્ટે કહ્યું હતું કે, એક સોગંદનામું દાખલ કરવું પડશે જેમાં કહેવામાં આવ્યું છે કે, જાહેરાતો દૂર કરવા માટે સોશિયલ મીડિયા પ્લેટફોર્મ્સથી કરવામાં આવેલી વિનંતીઓ લાગુ કરવામાં આવી છે અને આ 14 ઉત્પાદનોની જાહેરાતો પાછી ખેંચી લેવામાં આવી છે.
