મોરબીના સાપર પાસે હોટલના ગ્રાઉન્ડમાં ટેન્કરમાંથી ગેસ ચોરી

હોટલના સંચાલક સહિત બે શખ્સની 50.66 લાખના મુદ્દામાલ સાથે ધરપકડ, બે ની શોધખોળ

ખાસ-ખબર ન્યૂઝ  મોરબી, તા.19
મોરબી આસપાસના વિસ્તારમાં અગાઉ પણ ગેસના ટેન્કરોમાંથી ગેસની ચોરી કરીને ગેસના સિલિન્ડરમાં ગેસ ભરવામાં આવતો હોય તેવું સામે આવ્યું છે અને જોખમી રીતે ગેસની ચોરી કરવામાં આવતી હોવાનો પર્દાફાશ કરીને પોલીસે ગુના નોંધીને આરોપીઓની ધરપકડ કરીને કાર્યવાહી પણ કરેલ છે તો પણ આવી જોખમી પ્રવૃત્તિ બંધ થતી નથી તેવામાં મોરબીના સાપર ગામ નજીક હોટલના ગ્રાઉન્ડમાં ગેસ ભરેલ ટેન્કર ઉભું રાખીને તેમાંથી ગેસની ચોરી કરવામાં આવતી હતી ત્યારે એલસીબીની ટીમ દ્વારા ત્યાં રેડ કરવામાં આવી હતી જેથી સ્થળ ઉપર હાજર રહેલા શખ્સોમાં નાશભાગ મચી ગઈ હતી જોકે, ચાર પૈકીના બે શખ્સની પોલીસ દ્વારા ધરપકડ કરવામાં આવેલ છે અને ગેસ ભરેલું ટેન્કર તેમજ અન્ય મુદ્દામાલ મળીને સ્થળ ઉપરથી પોલીસે 50.66 લાખથી વધુનો મુદ્દામાલ કબજે કર્યો છે અને હાલમાં મોરબી તાલુકા પોલીસ સ્ટેશન ખાતે 2 શખ્સની સામે ગુનો નોંધી પોલીસે આગળની કાર્યવાહી હાથ ધરી છે. મોરબી જિલ્લા એલસીબીની ટીમના રામભાઈ મંઢ તથા ભગીરથસિંહ ઝાલાને સંયુક્ત રીતે બાતમી મળી હતી કે, મોરબીના જેતપર રોડ ઉપર આવેલ સાપર ગામ પાસે ભાગ્યલક્ષ્મી રાજસ્થાની હોટલના ગ્રાઉન્ડમાં હોટલમાં સંચાલક ભગીરથ મંગારામ બિશનોઈ રહે. બાગલી તાલુકો સાચોર જીલ્લો જાલોર રાજસ્થાન વાળા અમુક ઈસમોને સાથે રાખીને ગેસ ભરેલા ટેન્કરમાંથી ગેસની ગેરકાયદે અને જોખમી રીતે ચોરી કરીને ગેસના સિલિન્ડર ભરે છે જેથી એલસીબીની ટીમ દ્વારા ત્યાં રેડ કરવામાં આવી હતી

ત્યારે રાત્રિના સમયગાળા દરમિયાન ગેસનું ટેન્કર ઉભું રાખીને તેમાંથી ગેસની ચોરી કરવામાં આવતી હતી અને પોલીસની રેડ પડતાની સાથે સ્થળ ઉપર હાજર રહેલા ચાર શખ્સોમાં નાશભાગ મચી ગઈ હતી. જોકે પોલીસની ટીમ દ્વારા સ્થળ ઉપરથી બે શખ્સોને ઝડપી લેવામાં આવ્યા હતા જેમાં હોટલના સંચાલક રાહુલ જેતારામ કુરાડા (29) તથા મજૂર બુધારામ વાગતારામ ખીચડ (44) રહે. બંને હાલ ભાગ્યલક્ષ્મી રાજસ્થાની હોટલ મૂળ રહે. રાજસ્થાન વાળાને ઝડપી લેવામાં આવ્યા હતા જોકે તકનો લાભ લઈને હોટલના સંચાલક ભગીરથ મંગારામ બિશનોઈ રહે. હાલ મોરબી મૂળ રાજસ્થાન તથા ટેન્કર નંબર જીજે 6 એઝેડ 0432ના ચાલક નાસી ગયા હતા.પોલીસે સ્થળ ઉપરથી ટેન્કરમાં ભરેલ એલપીજી ગેસ 17,630 કિલોગ્રામ જેની કિંમત 10,10,589 તથા 40 લાખ રૂપિયાની કિંમતનું ટેન્કર અને જુદી જુદી કંપનીના ગેસ ભરેલા 26 સીલીન્ડર, 21 ખાલી સિલિન્ડર, વજન કાંટો, રબરની વાલ્વ વાળી નળી સહિત કુલ મળીને 50,66,079 ની કિંમતનો મુદ્દામાલ સ્થળ ઉપરથી કબજે કરવામાં આવેલ છે અને હાલમાં પકડાયેલ હોટલના એક સંચાલક સહિત કુલ ચાર વ્યક્તિઓની સામે તાલુકા પોલીસ સ્ટેશન ખાતે ગુનો નોંધવામાં આવ્યો છે અને રેડ દરમિયાન તકનો લાભ લઈને નાસી છૂટેલા હોટલના એક સંચાલક સહિતના બે વ્યક્તિઓને પકડવા માટે તજવીજ ચાલી રહી છે.