શિયાળામાં શાળાઓ સ્વેટર માટે ‘દબાણ’ નહીં કરી શકે: સરકાર

સ્કૂલ ડ્રેસ જેવું જ ફીકસીંગ છે : સરકારને બાળકના જીવની ચિંતા પણ અધિકારીઓએ કોઈ દિવસ પગલા લીધા?

શિક્ષણમંત્રી પાનસેરીયાની સંચાલકોને કડક ચેતવણી : ઠંડી ન રોકી શકે એવું સ્વેટર પહેરવા આગ્રહ ન ચાલે : કોઈ સ્કૂલ હેરાન કરે તો શિક્ષણાધિકારીને ફરિયાદ કરવા અનુરોધ. પ્રવર્તમાન શિયાળાની ઋતુમાં બાળકોને ઠંડીથી સુરક્ષિત કરવા ખાનગી શાળાના સંચાલકો શાળામાં ચોકકસ રંગનું સ્વેટર પહેરવા બાળકો પર દબાણ કરી શકશે નહિ તેવી ચીમકી રાજય શિક્ષણ મંત્રી પ્રફુલ્લ પાનશેરીયાએ આપી હતી.

રાજય શિક્ષણમંત્રી પાનશેરીયાએ જણાવ્યું કે, રાજય સરકાર હરહંમેશ વાલીઓ અને બાળકોની સાથે રહી છે. રાજયમાં ઠંડીના કારણે કોઈ પણ બાળકનું મૃત્યુ ન થાય તે માટે રાજય સરકાર અનેક પ્રયત્નો કરી રહી છે. રાજયના તમામ જિલ્લા શિક્ષણાધિકારીને જણાવવામાં આવ્યું છે કે, કોઈ પણ પ્રાથમિક,માધ્યમિક અને ઉચ્ચત્તર માધ્યમિક શાળા પોતાના ગણવેશને અનુરૂપ પાતળું નિમ્ર કક્ષાના કાપડ ધરાવતું (ઠંડી ન રોકી શકે તેવું) સ્વેટર પહેરવા કોઈ પણ બાળક પર દબાણ કરી શકશે નહિ.

જો કોઈ શાળાના સંચાલક એમની શાળાના નિર્ધારિત સ્વેટર બાળકને પહેરવા માટે આગ્રહ કરે તો તેની ફરિયાદ વાલીઓએ જિલ્લાની શિક્ષણાધિકારીની કચેરીને કરવાની રહેશે.

ખાનગી શાળાના સંચાલકોને વિનંતી સાથે મંત્રીએ જણાવ્યું હતું કે,કોઈ પણ શાળા બાળકોને તેમના દ્વારા નિર્ધારિત સ્વેટર પહેરવા મજબુર કરી શકશે નહિ, તેમજ વાલીઓને અપીલ કરી કે, કોઈ પણ બાળકને તેના માતા પિતા ઠંડી માટે તેમના જોડે ઉપલબ્ધ ઠંડી રક્ષણાત્મક સ્વેટર, ટોપી, હાથના મોજા પહેરાવી શકશે અને કોઈ પણ ખાનગી શાળા અને અન્ય શાળા તેમાં કોઈ શાળા તેમનાં દ્વારા નિર્ધારિત સ્વેટર પહેરાવવાનો આગ્રહ કરશે તો તેની ફરિયાદ વાલીઓએ જિલ્લાની શિક્ષણાધિકારીની કચેરીને કરવાની રહેશે તેમજ રાજય સરકાર તે શાળા પર કડક કાર્યવાહી કરશે તેમ તેમણે ઉમેર્યું હતું.