ઓબામાએ ચિંતા વ્યક્ત કરતા કહ્યું બાઇડેનની જીત મુશ્કેલ, તેઓ મેદાન છોડી દે

65% ડેમોક્રેટિક મતદારો પણ તેમની ઉમેદવારી વિરુદ્ધ: ટ્રમ્પની સામે કમલા હેરિસ સંભવ

ખાસ-ખબર ન્યૂઝ વોશિંગ્ટન, તા.19
અમેરિકાના પૂર્વ રાષ્ટ્રપતિ બરાક ઓબામાએ તેમના સાથીદારોને કહ્યું છે કે રાષ્ટ્રપતિ જો બાઈડેનની જીત મુશ્ર્કેલ છે. વોશિંગ્ટન પોસ્ટે ગુરુવારે (17 જુલાઈ) તેના અહેવાલમાં દાવો કર્યો હતો કે ઓબામા ઈચ્છે છે કે બાઈડેન રાષ્ટ્રપતિ પદ માટે તેમની ઉમેદવારી છોડી દે.

28 જૂને રાષ્ટ્રપતિ પદની ચર્ચામાં ડોનાલ્ડ ટ્રમ્પ સામે બાઈડેનની હાર બાદ ઓબામાએ તેમની સાથે માત્ર એક જ વાર વાત કરી છે. ઓબામાએ અન્ય લોકો સાથેની વાતચીતમાં કહ્યું છે કે આગામી રાષ્ટ્રપતિની પસંદગી માટે પાર્ટી માટે બાઈડેનની ઉમેદવારી અંગેનો નિર્ણય મહત્વપૂર્ણ છે.
ટ્રમ્પ સામેની ચર્ચામાં હાર બાદ પાર્ટીની અંદર બાઈડેનને રાષ્ટ્રપતિ પદની રેસમાંથી બહાર કરવાની માંગ વધી રહી છે. હવે આ યાદીમાં સૌથી શક્તિશાળી ડેમોક્રેટ ઓબામાનું નામ પણ જોડાઈ ગયું છે, જ્યારે તેઓ બાઈડેનના સૌથી મોટા સમર્થક રહ્યા છે. નેન્સી પેલોસી, જે હાઉસ ઓફ રિપ્રેઝન્ટેટિવ્સના સ્પીકર હતા, તેમણે પણ કહ્યું કે બાઈડેને હવે ચૂંટણી મેદાનમાંથી ખસી જવું જોઈએ.

65% ડેમોક્રેટિક મતદારો પણ બાઈડેનની વિરુદ્ધ છે. માત્ર 35% ડેમોક્રેટ્સ ઇચ્છે છે કે બાઈડેન ચૂંટણી લડે. 67% શ્ર્વેત મતદારો ઇચ્છે છે કે બાઈડેન તેમની ઉમેદવારી પાછી ખેંચે. અમેરિકાની કુલ 33 કરોડ વસ્તીમાંથી 60% શ્ર્વેત મતદારો છે.

હાઈ વોલ્ટેજ ડ્રામા બની ગયેલી યુએસ પ્રમુખપદની ચૂંટણી બાઈડેનની રાજકીય કારકિર્દીના અંત સુધીનું કાઉન્ટડાઉન સાબિત થઈ રહી છે. પ્રમુખ જો બાઈડેનની નબળી તબિયત, ડેમોક્રેટિક પાર્ટી પરની તેમની પોતાની પકડ અને ભૂતપૂર્વ પ્રમુખ ડોનાલ્ડ ટ્રમ્પની સામે તેમની વધતી જતી અવ્યવસ્થા… એકંદરે, બાઈડેન હવે મેદાનમાંથી ખસી જતા જણાય છે.

પાર્ટીના નેતાઓ અને સહયોગીઓના વધતા દબાણને કારણે રાષ્ટ્રપતિ બાઈડેન આ સપ્તાહના અંત સુધીમાં પોતાની ઉમેદવારી પાછી ખેંચી શકે છે. અમેરિકન ન્યૂઝ વેબસાઈટ એક્સિયોસે ડેમોક્રેટિક પાર્ટીના કેટલાક વરિષ્ઠ નેતાઓને ટાંકીને આ માહિતી આપી છે.

ગુરુવારે (18 જુલાઈ) 82 વર્ષીય બાઈડેનના કોરોના પોઝિટિવ હોવાના સમાચાર પણ સામે આવ્યા હતા. વ્હાઇટ હાઉસે કહ્યું કે તેઓ એકલતામાં કામ કરશે. બાઈડેને કોરોના પોઝિટિવના ટેસ્ટના એક દિવસ પહેલા કહ્યું હતું કે જો ડોક્ટરો તેમને અયોગ્ય જાહેર કરશે તો તેઓ રાષ્ટ્રપતિની ચૂંટણીની રેસમાંથી બહાર થઈ જશે.
ઉપરાષ્ટ્રપતિ કમલા દેવી હેરિસ (59) બાઈડેનના સ્થાને રાષ્ટ્રપતિ પદ માટે ટ્રમ્પ સામે ડેમોક્રેટિક પાર્ટીના ફ્રન્ટ રનર તરીકે ઉભરી આવ્યા છે. રાજકીય વિશ્ર્લેષક ટોની એડમના મતે હવે ડેમોક્રેટ્સ પાસે કમલાનો કોઈ વિકલ્પ નથી.

કમલાની તરફેણમાં સૌથી મોટું પરિબળ તેણીનું ભારતીય મૂળનું, અશ્ર્વેત અને સ્ત્રી હોવું છે. આ તમામ ડેમોક્રેટિક પાર્ટીની સૌથી મોટી વોટ બેંક છે.