ટ્રમ્પે ચીન પર વધારાના 10% ટેરિફ તેમજ મેક્સિકો અને કેનેડા પર 25% ટેરિફની જાહેરાત કરી
બીજા દેશોથી આવનાર કૃષિ ઉત્પાદનો પર પ્રસ્તાવિત ટેરિફથી અમેરિકામાં તેની કિંમતો વધવાની સંભાવના છે, જેનાથી સ્થાનિક રીતે ઉત્પાદિત પાક અને પશુધનની માંગ વધશે અને આનાથી અમેરિકન ખેડૂતોને ફાયદો થશે.
- Advertisement -
અમેરિકાના રાષ્ટ્રપતિ ડોનાલ્ડ ટ્રમ્પે સોમવારે (૩ માર્ચ) ‘ટ્રુથ સોશિયલ’ પર જાહેરાત કરી કે આયાતી કૃષિ ઉત્પાદનો પર નવા ટેરિફ 2 એપ્રિલથી લાગુ થશે. આ સાથે જ તેમણે અમેરિકન ખેડૂતોને સ્થાનિક ઉત્પાદન વધારવાનો આગ્રહ કર્યો. ટ્રમ્પે પોતાની પોસ્ટમાં લખ્યું, ‘અમેરિકાના મહાન ખેડૂતો, દેશમાં વેચવા માટે ઘણા બધા કૃષિ ઉત્પાદનોનું ઉત્પાદન શરૂ કરવા માટે તૈયાર થઈ જાઓ. 2 એપ્રિલથી વિદેશી કૃષિ ઉત્પાદનો પર ટેરિફ લાગૂ થાઈ જશે. હેવ ફન.’ અન્ય દેશોમાંથી આયાત થતા કૃષિ ઉત્પાદનો પર પ્રસ્તાવિત ટેરિફથી યુનાઇટેડ સ્ટેટ્સમાં તેમની કિંમતમાં વધારો થવાની ધારણા છે, જેનાથી સ્થાનિક રીતે ઉત્પાદિત પાક અને પશુધનની માંગ વધશે અને અમેરિકન ખેડૂતોને આનાથી સંભવિત રીતે ફાયદો થશે.
જોકે, ટ્રમ્પના નિર્ણયથી અમેરિકાના તે દેશો સાથેના વેપાર સંબંધોમાં તણાવની શક્યતા પણ વધી ગઈ છે જે અમેરિકામાં કૃષિ ઉત્પાદનોની નિકાસ કરે છે. ટ્રમ્પની આ જાહેરાત સ્થાનિક કૃષિ ઉત્પાદન વધારવા અને આત્મનિર્ભરતા પર નવેસરથી ધ્યાન કેન્દ્રિત કરવાનો સંકેત આપે છે. જોકે, તેમના નિવેદનમાં એ જણાવ્યું ન હતું કે ટેરિફના અમલીકરણથી કયા કૃષિ ઉત્પાદનો પર અસર થશે. આ પહેલા, યુએસ રાષ્ટ્રપતિ ડોનાલ્ડ ટ્રમ્પે તમામ સ્ટીલ અને એલ્યુમિનિયમ આયાત પર 25% ટેરિફ લાગૂ કર્યો હતો. તેઓ ઓટોમોબાઈલ, ફાર્માસ્યુટિકલ્સ, સેમિકન્ડક્ટર, લાકડું અને તાંબુ સહિત વિવિધ ક્ષેત્રો પર વધારાની ડ્યુટી લાદવાની યોજના બનાવી રહ્યા છે. ટ્રમ્પનો દાવો છે કે તેમના આ નિર્ણયો પાછળનો હેતુ અમેરિકન ઉદ્યોગોનું રક્ષણ કરવાનો અને અમેરિકન ઉત્પાદનને મજબૂત બનાવવાનો છે.
વધતી મોંઘવારી વચ્ચે આર્થિક જોખમો
- Advertisement -
ટ્રમ્પનું ટેરિફ યુદ્ધ એવા સમયે શરૂ થયું છે જ્યારે વધતી મોંઘવારી અમેરિકન અર્થતંત્ર માટે એક ગંભીર મુદ્દો બની ગઈ છે. આયાતી માલ પર ટેરિફ લાદવાથી તેમની કિંમતો વધશે, જેનાથી મોંઘવારીમાં વધુ વધારો થવાની શક્યતા છે. સપ્લાય ચેઇનમાં પણ વિક્ષેપ ઊભો થશે. અમેરિકા સાથે વેપાર સંબંધો ધરાવતા દેશો અમેરિકન ઉત્પાદનો પર ટેક્સ વધારીને ટ્રમ્પના ટેરિફનો જવાબ આપી શકે છે. આના કારણે મોંઘવારી વધુ વધવાની શક્યતા છે. રાષ્ટ્રપતિ ટ્રમ્પે સ્વીકાર્યું છે કે ઊંચા ટેરિફથી અમેરિકામાં કિંમતો વધી શકે છે, પરંતુ તેમણે સૂચવ્યું છે કે તેમના નિર્ણયના ફાયદા નુકસાન કરતાં વધુ હશે.
મેક્સિકો, કેનેડા અને ચીન પર ટેરિફ
તાજેતરમાં, ટ્રમ્પે ચીન પર વધારાના 10% ટેરિફ તેમજ મેક્સિકો અને કેનેડા પર 25% ટેરિફની જાહેરાત કરી. તેમણે પોતાના નિર્ણય પાછળનું કારણ ફેન્ટાનાઇલ ઉત્પાદન અને ગેરકાયદેસર સ્થળાંતર સામે મજબૂત પગલાં લેવા માટે આ દેશો પર દબાણ કરવાની જરૂરિયાતને ગણાવ્યું. ટ્રમ્પના નિર્ણય પર પ્રતિક્રિયા આપતા, મેક્સીકન રાષ્ટ્રપતિ ક્લાઉડિયા શેનબૌમ પાર્ડોએ જવાબી ટેરિફ લાદવાની ચેતવણી આપી છે. જોકે, કેનેડા અને મેક્સિકો પર પહેલા જાન્યુઆરીમાં અને પછી ફેબ્રુઆરીમાં ટેરિફ લાદવાની અગાઉની સમયમર્યાદાને અર્થશાસ્ત્રીઓ અને વ્યવસાયોની ચેતવણીઓ વચ્ચે મુલતવી રાખવામાં આવી હતી.
