મ્યાનમારની ધરા ફરી ભૂકંપ આંચકાથી ધ્રુજી

3.9ની તીવ્રતા સાથે ઉત્તરી ચિલીની ધરા ધ્રુજી

28 માર્ચના ભૂકંપમાં મૃત્યુઆંક 3,649 : જ્યારે 5 હજારથી વધુ લોકો થયા ઘાયલ

મ્યાનમારમાં સતત ભૂકંપના આંચકા આવી રહ્યા છે. આજે શુક્રવારે પણ હળવો ભૂકંપ અનુભવાયો હતો. નેશનલ સેન્ટર ફોર સિસ્મોલોજીના એક નિવેદનમાં કહેવામાં આવ્યું છે કે, મ્યાનમારમાં 3.9ની તીવ્રતાનો ભૂકંપ આવ્યો. ભૂકંપ 10 કિલોમીટરની ઊંડાઈએ આવ્યો હતો. તેને આફ્ટરશોક્સ માટે અત્યંત સંવેદનશીલ તરીકે વર્ગીકૃત કરવામાં આવ્યું હતું. સોશિયલ મીડિયા પર NCS એ કહ્યું કે, ‘રિક્ટર સ્કેલ પર તીવ્રતા: 3.9, તારીખ: 18 એપ્રિલ 2025, સમય: 02:57:43 IST, ઊંડાઈ: 10 કિમી, સ્થાન: મ્યાનમાર.’

દરમિયાન, ઉત્તર ચિલીમાં પણ ભૂકંપના જોરદાર આંચકા અનુભવાયા હતા. જર્મન રિસર્ચ સેન્ટર ફોર જીઓસાયન્સિસના અહેવાલ અનુસાર, ગુરૂવારે ઉત્તરી ચિલીમાં 5.7 ની તીવ્રતાનો ભૂકંપ આવ્યો હતો. ભૂકંપનું કેન્દ્રબિંદુ 178 કિલોમીટર (110.6 માઇલ)ની ઊંડાઈએ હતું. 28 માર્ચે આવેલા ભૂકંપ પછી સેંકડો આફ્ટરશોક્સ આવ્યા હતા, જેના કારણે કોઈ મોટા નુકસાન કે જાનહાનિના તાત્કાલિક અહેવાલ નથી. મ્યાનમારની લશ્કરી સરકારના પ્રવક્તા મેજર જનરલ ઝાવ મીન ટુનના જણાવ્યા અનુસાર, શુક્રવાર સુધીમાં, 28 માર્ચના ભૂકંપમાં મૃત્યુઆંક 3,649 હતો, જ્યારે 5,018 લોકો ઘાયલ થયા હતા.

સંયુક્ત રાષ્ટ્રએ ગયા અઠવાડિયે ચેતવણી આપી હતી કે, 28 માર્ચના ભૂકંપથી થયેલા નુકસાનથી મ્યાનમારમાં હાલની માનવતાવાદી કટોકટી વધુ વણસી જશે. મ્યાનમાર હાલમાં ગૃહયુદ્ધનો સામનો કરી રહ્યું છે. આ કારણે, અહીંથી 30 લાખથી વધુ લોકો પહેલાથી જ વિસ્થાપિત થઈ ચૂક્યા છે. ભૂકંપથી કૃષિ ઉત્પાદન પર ખરાબ અસર પડી છે. મ્યાનમારમાં આરોગ્ય કટોકટી ઊભી થઈ છે, જેમાં ઘણી તબીબી સુવિધાઓને નુકસાન થયું છે અથવા નાશ પામ્યો છે.