મોરબી યંગ ઈન્ડિયા ગ્રૂપ દ્વારા વૃદ્ધાશ્રમના વૃદ્ધ પિતાઓ સાથે ફાધર્સ ડેની ઉજવણી કરાઇ

ખાસ-ખબર ન્યૂઝ  મોરબી
મોરબીમાં દરેક પર્વની પ્રેરણાદાયી ઉજવણી માટે રોલ મોડેલ બનેલા યંગ ઇન્ડિયા ગ્રુપ દ્વારા આજે પિતા પ્રત્યે આત્મીયની લાગણી દર્શાવતા પર્વ ફાધર્સ ડેની અનોખી ઉજવણી કરવામાં આવી હતી.

મોરબી યંગ ઈન્ડિયા ગ્રૂપ દ્વારા ફાધર્સ ડેના અવસરે વૃદ્ધાશ્રમમાં એક હૃદયસ્પર્શી કાર્યક્રમનું આયોજન કરવામાં આવ્યું હતું. આ કાર્યક્રમમાં વૃદ્ધાશ્રમમાં રહેતા વૃદ્ધ પિતાઓને સન્માન આપવા અને તેમની સાર સંભાળ રાખવાના ઉદ્દેશ્ય સાથે સ્વાસ્થ્ય કિટ અને કપડાંના સેટ સહિતની જરૂરી વસ્તુઓનું વિતરણ કરવામાં આવ્યું હતું. આ પહેલ દ્વારા યંગ ઇન્ડિયા ગ્રૂપે વૃદ્ધોના ચહેરા પર સ્મિત લાવવાનો અને તેમને સમાજમાં મહત્વનું સ્થાન આપવાનો પ્રયાસ કર્યો હતો. વૃદ્ધાશ્રમના વૃદ્ધ પિતાઓને પોતાના જ વડીલ સમજીને યંગ ઈન્ડિયા ગ્રૂપના તમામ સભ્યોએ તેમની સાથે સમય વિતાવ્યો હતો. તેમની સાથે મન મૂકીને વાતચીત કરી હતી અને તેમના અનુભવોને સાંભળ્યા હતા.

આ તકે યંગ ઈન્ડિયા ગ્રૂપના સંસ્થાપક ડો.દેવેનભાઈ રબારીએ જણાવ્યું હતું કે, તેમની આ સંસ્થાના આ પ્રયાસે સમાજમાં વૃદ્ધો પ્રત્યે સેવાભાવ અને સન્માનનું મહત્વ દર્શાવ્યું છે. આવા કાર્યક્રમો દ્વારા યુવાનો અને વૃદ્ધો વચ્ચેનું અંતર ઘટાડવાનો અને સમાજમાં એકતાની ભાવના વધારવાનો પ્રયાસ કરવામાં આવ્યો છે. આ ઉજવણીએ વૃદ્ધ પિતાઓને માત્ર ભૌતિક સહાય જ નહીં, પરંતુ ભાવનાત્મક ટેકો અને સન્માન પણ પ્રદાન કર્યું છે.