ગુરુગ્રામમાં મેઘતાંડવ, રસ્તાઓ નદીમાં પરિવર્તિત, અનેક વિસ્તારોમાં પૂર જેવી સ્થિતિ

ગુરુગ્રામમાં રવિવારે દિવસભર સતત વરસાદને કારણે ઘણા વિસ્તારો પાણીમાં ડૂબી ગયા, અવરજવરમાં મુશ્કેલી, દિલ્હી-ગુરુગ્રામ એક્સપ્રેસ વેના નરસિંહપુર સેક્શન અને બસાઈ અને ગોલ્ફ કોર્સ એક્સટેન્શન રોડ નજીકના વિસ્તારોમાં ભારે પાણી ભરાયા હતા.

રાત્રે 8 વાગ્યે જિલ્લા વહીવટીતંત્ર દ્વારા આપવામાં આવેલા અપડેટ મુજબ ગુરુગ્રામમાં દિવસ દરમિયાન 70 મીમી વરસાદ નોંધાયો હતો. વજીરાબાદમાં સૌથી વધુ 108 મીમી વરસાદ નોંધાયો હતો.

આ તરફ જિલ્લા વહીવટીતંત્રના જણાવ્યા અનુસાર, પોલીસ લાઈન્સ, બસ સ્ટેન્ડ રોડ, શીતલા માતા રોડ, નરસિંહપુર સર્વિસ રોડ, બસાઈ ચોક, ખંડસા, સંજય ગ્રામ રોડ, સોહના રોડ અને સુભાષ ચોક, સેક્ટર 30, 31, 40, 45, 47, 51, 22 , 23, 4, 5, 12, 13 અને 48 સહિત અનેક વિસ્તારોમાં પાણી ભરાવાના કારણે ટ્રાફિક જામ પણ જોવા મળ્યો હતો. પગપાળા ચાલતા લોકોને ઘૂંટણ સુધીના પાણીમાંથી પસાર થવું પડ્યું હતું.

અધિકારીઓના જણાવ્યા અનુસાર, દિલ્હી બાજુના નેશનલ હાઈવે (NH-48), નરસિંહપુર ચોક, હીરો હોન્ડા ચોક, રાજીવ ચોક, વાટિકા ચોક, ઈફ્કો ચોક, સોહના રોડ, બસાઈ, ખંડસા રોડ અને પટૌડી રોડ પર ભારે ભીડ હતી.

સાથે સાથે મહાનગરપાલિકાએ પણ અનેક વિસ્તારોમાં પાણીના નિકાલની કામગીરી કરી હતી.

ગુરુગ્રામ સહિત હરિયાણામાં આજે પણ પડશે વરસાદ

હવામાન વિભાગના જણાવ્યા અનુસાર હરિયાણાના ઘણા ભાગોમાં આજે એટલે કે 12 ઓગસ્ટે મધ્યમથી ભારે વરસાદની સંભાવના છે.

હવામાન વિભાગ (IMD) એ 14 ઓગસ્ટ સુધી હરિયાણામાં વિવિધ સ્થળોએ ભારે વરસાદની આગાહી કરી છે.

તમને જણાવી દઈએ કે, 16 ઓગસ્ટ સુધી હિમાચલ પ્રદેશ, ઉત્તરાખંડ, પૂર્વી ઉત્તર પ્રદેશ, દિલ્હી, રાજસ્થાન સહિત ઉત્તર ભારતમાં વિવિધ સ્થળોએ ભારે વરસાદની સાથે મધ્યમ વરસાદની સંભાવના છે.