ખાસ-ખબર ન્યૂઝ જૂનાગઢ, તા.7
માળિયાહાટિના તાલુકાની જુથળ ગામની સેવા સહકારી મંડળીમાં લાંબા સમયથી ચાલી આવતી આર્થિક ગેરરીતિનો પર્દાફાશ થયો છે. મંડળીના મંત્રી દ્વારા સત્તાનો દુરુપયોગ કરી ખેડૂત સભાસદો અને મંડળી સાથે વિશ્ર્વાસઘાત કર્યાની ફરિયાદ નોંધાઈ છે.
આરોપી કાન્તીભાઇ નરશીભાઇ હિંગરાજીયાએ વર્ષ 2009 થી 2024 દરમિયાન મંત્રી તરીકે ફરજ બજાવતા ખોટા પત્રકો અને રસીદો બનાવી કુલ રૂ. 2,09,49,609ની માતબર રકમની ઉચાપત કરી છે. મંડળીના મંત્રીએ ધિરાણ ઉચાપત રૂ. 70,67,100, થાપણ ઉચાપત રૂ. 30,44,000, રોકડ ઘટ ઉચાપત: રૂ. 59,42,989, સ્ટોક ઘટ ઉચાપત રૂ. 26,78,991, બેન્ક ખાતા ઉચાપત રૂ. 13,26,430 અને અંગત લોન ઉચાપત રૂ. 8,90,099 મળીને કુલ રૂ.2.09 કરોડની ઉચાપત કરતા ગુનો નોંધાયો છે. આરોપીએ પોતાના અંગત લાભ માટે ખોટા ધિરાણો મંજૂર કર્યા હતા અને મંડળીના ચોપડા તેમજ જામીનગીરીના કાગળો સાથે ચેડા કર્યા હતા. આ બાબતે જુથળ મંડળીના પ્રમુખ કનૈયાલાલ ઉર્ફે કનુભાઇ દેવશીભાઇ કનેરીયાએ ફરિયાદ નોંધાવતા પોલીસે આરોપી વિરુદ્ધ ઇ.પી.કો. કલમ 406, 409, 420, 465, 467, 468, 471, 477(એ) તથા ગુજરાત સહકારી ધારાની વિવિધ કલમો હેઠળ ગુન્હો રજીસ્ટર કર્યો છે. આ કેસની વધુ તપાસ માળિયા હાટિના પોલીસ ઇન્સ્પેક્ટર એમ.એન. કાતરીયા ચલાવી રહ્યા છે.
