વિવાદિત કીર્તિ પટેલ અંતે જૂનાગઢ પોલીસના સકંજામાં
14 જેટલા ગુનાઓની હિસ્ટરી ધરાવતી કીર્તિ પટેલ એક દિવસના રિમાન્ડ પર અન્ય ચાર આરોપીઓને ઝડપવા પોલીસ ટીમો જુદી જુદી દિશામાં કામે લાગી
- Advertisement -
ખાસ-ખબર ન્યૂઝ જૂનાગઢ, તા.23
સોશિયલ મીડિયા પર સતત વિવાદોમાં રહેતી કીર્તિ પટેલની મુશ્કેલીઓમાં મોટો વધારો થયો છે. જૂનાગઢ પોલીસે ઓપરેશન પાર પાડીને કીર્તિ પટેલની રાજસ્થાનના ઉદયપુર ખાતેથી ધરપકડ કરી છે. ખંડણી, બળાત્કારના ખોટા કેસમાં ફસાવવાની ધમકી અને ધાર્મિક લાગણી દુભાવવા સહિતના ગંભીર ગુનાઓમાં સંડોવાયેલી કીર્તિ પટેલને કોર્ટમાં રજૂ કરી એક દિવસના રિમાન્ડ મેળવવામાં આવ્યા છે. સમગ્ર વિવાદની શરૂઆત મહાશિવરાત્રિના પવિત્ર પર્વ દરમિયાન ભવનાથના મેળામાં થઈ હતી. કીર્તિ પટેલે પ્રતિબંધિત ગણાતા મૃગીકુંડમાં સ્નાન કર્યું હતું, જેનો વીડિયો સોશિયલ મીડિયા પર વાયરલ થયો હતો. આ ઘટનાને પગલે સાધુ-સંતોમાં ભારે રોષ જોવા મળ્યો હતો. ઇન્દ્રભારતી બાપુએ આ અંગે અધિકારીઓને રજૂઆત કરી કીર્તિ પટેલને કુંડમાંથી બહાર કઢાવી હતી. ત્યારબાદ કીર્તિ પટેલે મહિલા પોલીસ અધિકારી સાથે ગેરવર્તણૂક કરી ફરજમાં રુકાવટ ઉભી કરતા ભવનાથ પોલીસ સ્ટેશનમાં પ્રથમ ગુનો નોંધાયો હતો. આ ઘટનાક્રમ વચ્ચે વધુ એક ગંભીર મામલો સામે આવ્યો હતો. જૂનાગઢ તાલુકા પોલીસમાં અબઝલ સીડા નામના વ્યક્તિએ ફરિયાદ નોંધાવી હતી. જેમાં કીર્તિ પટેલે ફરિયાદી પાસેથી રૂપિયા 20 લાખની ખંડણી માંગી હતી. જો આ રકમ આપવામાં ન આવે તો ફરિયાદીને બળાત્કારના ખોટા કેસમાં ફિટ કરી દેવાની અને જાનથી મારી નાખવાની ધમકી આપી હોવાનો ઉલ્લેખ ફરિયાદમાં કરવામાં આવ્યો છે. જૂનાગઢ પોલીસની અલગ-અલગ ટીમો ટેકનોલોજીની મદદથી કીર્તિ પટેલનું લોકેશન ટ્રેસ કરી રહી હતી. જ્યારે પોલીસને ચોક્કસ બાતમી મળી કે તે ઉદયપુરમાં છે, ત્યારે તાત્કાલિક એક ટીમ મોકલીને તેની ધરપકડ કરવામાં આવી હતી. ધરપકડ બાદ તેને જૂનાગઢ સિવિલ હોસ્પિટલ ખાતે મેડિકલ ચેકઅપ માટે લાવવામાં આવી હતી. પોલીસે 5 દિવસના રિમાન્ડની માંગણી કરી હતી, પરંતુ કોર્ટે 1 દિવસના રિમાન્ડ મંજૂર કર્યા છે. ધરપકડ સમયે કીર્તિ પટેલે પોતાનું મોં દુપટ્ટાથી ઢાંકી દીધું હતું. આ અંગે ડીવાયએસપી રવિરાજસિંહ પરમારે જણાવ્યું હતું કે, કીર્તિ સામે ધાર્મિક લાગણી દુભાવવાનો ગુનો નોંધાયેલ હોવાથી તેને પોતાની જાનનું જોખમ જણાતું હતું. કોઈ અન્ય વ્યક્તિ દ્વારા તેના પર હુમલો ન થાય તેવા સુરક્ષાના કારણોસર તેને મોં ઢાંકવાની સહમતી આપવામાં આવી હતી. આ ગુનામાં માત્ર કીર્તિ પટેલ જ નહીં, પરંતુ અન્ય ચાર શખ્સો પણ સંડોવાયેલા હોવાનું પોલીસ માની રહી છે. પોલીસ તપાસ કરી રહી છે કે કીર્તિ અત્યાર સુધી ક્યાં છુપાયેલી હતી અને તેને આશરો કોણે આપ્યો હતો. તેની સાથે ખંડણીના કેસમાં અન્ય કયા વ્યક્તિઓ સામેલ હતા અને કોઈ નાણાકીય લેતીદેતી થઈ છે કે કેમ, તે અંગે પૂછપરછ ચાલુ છે. ઉલ્લેખનીય છે કે પ્રભાસ પાટણના મહામંડલેશ્વર બજરંગદાસ બાપુ દ્વારા પણ કીર્તિ પટેલ સામે ધાર્મિક લાગણી દુભાવવા અંગે ભવનાથ પોલીસમાં ફરિયાદ કરવામાં આવી હતી. આમ, ટૂંકા ગાળામાં જ કીર્તિ પટેલ સામે ત્રણ અલગ-અલગ ગુનાઓ નોંધાતા પોલીસ હવે કડક કાર્યવાહીના મૂડમાં છે. હાલમાં કીર્તિ પટેલ પોલીસ રિમાન્ડ હેઠળ છે અને પોલીસ આ ખંડણી રેકેટના મૂળ સુધી પહોંચવા મથામણ કરી રહી છે. આગામી દિવસોમાં આ કેસમાં વધુ ચોંકાવનારા ખુલાસા થવાની શક્યતા છે.
રાજ્યભરમાં કીર્તિ પટેલ વિરુદ્ધ નોંધાયેલા 14 ગુનાઓ
- Advertisement -
કીર્તિ પટેલ સામે અત્યાર સુધીમાં સુરત, અમદાવાદ અને જૂનાગઢ જેવા શહેરોમાં અનેક પોલીસ ફરિયાદો નોંધાઈ છે. આ યાદીમાં ગંભીર ઇજા પહોંચાડવી, ખંડણી, ધમકી અને તાજેતરમાં જૂનાગઢમાં નોંધાયેલા ગુનાઓનો સમાવેશ થયો છે.
1અમરોલી, સુરત 2019, અપશબ્દો બોલવા અને જાનથી મારી નાખવાની ધમકી
2પુણા, સુરત 2020, હત્યાનો પ્રયાસ (307) અને જી.પી. એક્ટ મુજબ
3કામરેજ, સુરત ગ્રામ્ય 2020, અપશબ્દો બોલવા અને મોબાઈલ કે અન્ય માધ્યમથી ધમકી આપવી
4સેટેલાઇટ, અમદાવાદ 2022, ગેરકાયદે મંડળી રચવી, હથિયાર વડે ઇજા પહોંચાડવી અને ધમકી
5વસ્ત્રાપુર, અમદાવાદ 2022, જબરદસ્તીથી પૈસા કઢાવવા (ખંડણી), સ્ત્રીની લાજ લેવાનો પ્રયાસ અને બદનક્ષી
6ભેસાણ, જૂનાગઢ 2022, ગેરકાયદે મંડળી રચી હુમલો કરવો અને ધમકી આપવી
7વસ્ત્રાપુર, અમદાવાદ 2023, અપશબ્દો બોલી મારપીટ કરવી અને ધમકી આપવી
8સોલા હાઈકોર્ટ, અમદાવાદ 2023, સોશિયલ મીડિયા દ્વારા બદનક્ષી અને જાનથી મારી નાખવાની ધમકી
9કામરેજ, સુરત શહેર 2023, રાયોટિંગ, જાહેર રસ્તા પર અવરોધ અને શાંતિ ભંગ કરવો
10 કાપોદ્રા, સુરત 2024, ગુનાહિત કાવતરું, ખંડણી અને આઈ.ટી. એક્ટની કલમો
11લસકાણા, સુરત 2025, આઈ.ટી. એક્ટ અને બી.એન.એસ. હેઠળ નોંધાયેલ ગુનો
12ભવનાથ, જૂનાગઢ 2026, સરકારી કર્મચારીની ફરજમાં રુકાવટ અને હુમલો
13ભવનાથ, જૂનાગઢ 2026, ધાર્મિક લાગણી દુભાવવી અને સમુદાયો વચ્ચે વૈમનસ્ય ફેલાવવું
14 તાલુકા પોલીસ, જૂનાગઢ 2026, ખંડણી (308) અને બળાત્કારના ખોટા કેસમાં ફસાવવાની ધમકી
