નાઈજરમાં લશ્કરે સરકાર ઉથલાવીને સતા કબ્જે કરી: રાષ્ટ્રપતિને કેદ કર્યા

-ફ્રાંસના રાજદૂતને પણ બંધક બનાવાતા તણાવ

નાઈજરમાં સેનાએ લોકતાંત્રિક સરકારની હકાલપટ્ટી કરીને સત્તા કબજે કરી લીધી છે. રાષ્ટ્રપતિને બંધક બનાવવામાં આવ્યા છે અને તેઓ નાઈજર આર્મીની કસ્ટડીમાં છે. ફ્રાન્સની સેના અહીં તૈનાત હતી, જેને નાઈજરની સેનાએ તખ્તાપલટ બાદ દેશ છોડવા માટે કહ્યું હતું.

આ દરમિયાન ફ્રાન્સના રાષ્ટ્રપતિએ મોટો દાવો કર્યો છે. નાઈજરની સેનાએ ફ્રાન્સના રાજદૂતને બંધક બનાવી લીધા છે. રાષ્ટ્રપતિ ઈમેન્યુઅલ મેક્રોને કહ્યું કે નાઈજરમાં ફ્રેન્ચ રાજદૂતને બંધક બનાવવામાં આવ્યા છે. તે ફ્રેન્ચ એમ્બેસીમાં છે. તેમને ખોરાક અને પાણી આપવામાં આવતું નથી. તેમના બહાર નીકળવા પર પ્રતિબંધ મૂકવામાં આવ્યો છે. તેઓ લશ્કરી રાશન પર જીવી રહ્યા છે.

નાઇજર આર્મીએ જુલાઈમાં રાષ્ટ્રપતિ મોહમ્મદ બઝૌમને હટાવીને સત્તા સંભાળી હતી. આફ્રિકન દેશોમાં 1500 ફ્રેન્ચ સૈનિકો તૈનાત છે. નાઈજર પણ તેમાંથી એક છે. લોકતાંત્રિક સરકાર સાથેના કરાર હેઠળ, સેંકડો ફ્રેન્ચ સૈનિકો સુરક્ષાના કારણોસર અને અન્ય કારણોસર અહીં તૈનાત હતા.

બળવા પછી, નાઇજર આર્મીના વડાએ ફ્રાન્સ સાથે વાટાઘાટો કરવાનો પ્રયાસ કર્યો. રાજદ્વારી રીતે જોડાવાની પરવાનગી આપવામાં આવી હતી. ફ્રાન્સના રાજદૂતને મીટિંગ માટે બોલાવવામાં આવ્યા હતા પરંતુ તેઓ સેના સમક્ષ હાજર થયા ન હતા.

ગયા અઠવાડિયે, નાઇજરમાં અટકાયતમાં લેવાયેલા એક ફ્રેન્ચ અધિકારીને મુક્ત કરવામાં આવ્યો હતો. ધરપકડથી ફ્રાન્સ અને નાઈજર વચ્ચે તણાવ વધી ગયો હતો. ફ્રેન્ચના વિદેશ મંત્રાલયે એક નિવેદનમાં જણાવ્યું હતું કે, વિદેશમાં ફ્રેન્ચ નાગરિકો માટે કાઉન્સેલર તરીકે કામ કરનાર સ્ટેફન જુલિયનને તેની ધરપકડના પાંચ દિવસ બાદ બુધવારે મુક્ત કરવામાં આવ્યો હતો.