સરકારી ઉચ્ચતર માધ્યમિક શાળા ખાતે નેશનલ સ્પેસ દિવસની ઉજવણી કરવામાં આવી

ઈશારો સંસ્થાના પૂર્વ કર્મચારીઓની ઉપસ્થિતિમાં વિદ્યાર્થીને વિજ્ઞાનની ઝલક દર્શાવી

ખાસ-ખબર ન્યૂઝ સુરેન્દ્રનગર, તા.23

મૂળી તાલુકાના સરલા ગામની સરકારી ઉચ્ચતર માધ્યમિક શાળા ખાતે નેશનલ સ્પેસ દિવસની ઉજવણી કરવામાં આવી હતી જે કાર્યક્રમમાં મુખ્ય મહેમાન તરીકે ઈસરો સંસ્થાના ભૂતપૂર્વ એન્જિનિયર નગીનભાઈ પ્રજાપતિ તથા સતિષભાઈ ગજ્જર ઉપસ્થિત રહ્યા હતા. જેમાં નગીનભાઈ પ્રજાપતી દ્વારા અવકાશ વિજ્ઞાન ઈસરો સંસ્થા તેમજ વિજ્ઞાન વિષય વિદ્યાર્થીઓને રસપ્રદ માહિતી પૂરી પાડી સ્પેસ વિશેનું એક્ઝિબિશન પણ વિદ્યાર્થીઓ સમક્ષ રજૂ કરવામાં આવ્યુ હતું.

આ ઉપરાંત અતિથિ વિશેષ તરીકે સરકારી માધ્યમિક શાળાના વર્ગ-2 અધિકારી પાર્થભાઈ મહેતા પણ કાર્યક્રમમાં ખાસ ઉપસ્થિત રહ્યા હતા અને વિદ્યાર્થીઓને વિજ્ઞાન વિશે રસપ્રદ વાતો સમજાવી હતી. કાર્યક્રમને અંતે વિદ્યાર્થીઓ દ્વારા વિજ્ઞાનના તજજ્ઞોને મનમાં ઉદભવતા સવાલો પૂછવામાં આવ્યા હતા જેના મહેમાનોએ વિદ્યાર્થીઓને સંતોષકારક જવાબ પણ આપ્યા હતા. આ સાથે કાર્યક્રમમાં રોકેટ લોન્ચિંગ અંગેનું લાઈવ ડેમોસ્ટ્રેશન પણ વિદ્યાર્થીઓ સમક્ષ ઈસરોના દ્વારા રજૂ કરવામાં આવ્યું હતું.