રશિયાથી ગોવા આવતી ફ્લાઇટને બૉમ્બથી ઉડાવી દેવાની ધમકી: ઉઝબેકિસ્તાનમાં ઈમરજન્સી લેન્ડિંગ

રશિયાના મોસ્કોથી ગોવા આવી રહેલા એક ચાર્ટર્ડ પ્લેનને બોમ્બથી ઉડાવી દેવાની ધમકી મળતા સુરક્ષા એજન્સી એલર્ટ થઇ ગઇ છે. તાત્કાલિક ધોરણે આ ફ્લાઇટને ઉઝબેકિસ્તાન ડાયવર્ટ કરવામાં આવી છે.

મળતી માહિતી મુજબ ફ્લાઇટમાં 2 બાળકો અને 7 ક્રૂ સહિત કુલ 238 લોકો સવાર છે. વિમાને રશિયાના પેરામ ઈન્ટરનેશનલ એરપોર્ટ પરથી ગોવા આવવા માટે ઉડાન ભરી હતી. પરંતુ વચ્ચે સુરક્ષા સંબંધિત એલર્ટ જાહેર કરવામાં આવ્યું. જ્યાર બાદ તાત્કાલિક ધોરણે આ ફ્લાઈટને ઉઝબેકિસ્તાન તરફ ડાયવર્ટ કરવામાં આવી. હાલમાં ફ્લાઈટે ઉઝબેકિસ્તાનમાં લેન્ડિંગ કર્યા બાદ તેની તપાસ હાથ ધરવામાં આવી રહી છે.

An Azur Air chartered flight from Russia’s Perm International Airport to Goa received a security threat. Following this, the flight was diverted to Uzbekistan. A total of 238 passengers, including 2 infants, and 7 crew are onboard: Airport Sources pic.twitter.com/2JKe9bWeO8

— ANI (@ANI) January 21, 2023

માત્ર 11 દિવસમાં આ રશિયન એરલાઇન્સ સાથેની બીજી ઘટના
તમને જણાવી દઈએ કે, 11 દિવસમાં રશિયન એરલાઈન્સ એઝુરની ફ્લાઈટ સાથે આ પ્રકારની બીજી ઘટના છે. અગાઉ 9 જાન્યુઆરીના રોજ મોડી રાત્રે મોસ્કોથી ગોવા જઈ રહેલી એઝુર એરલાઈન્સની ફ્લાઈટનું ગુજરાતના જામનગરમાં ઈમરજન્સી લેન્ડિંગ કરવામાં આવ્યું હતું. વાસ્તવમાં વિમાનમાં બોમ્બ હોવાના સમાચાર ગોવાના એર ટ્રાફિક કંટ્રોલને ઈ-મેલ દ્વારા મળ્યા હતા. આથી, ઈ-મેલને ગંભીરતાથી લેતા ગોવા એર ટ્રાફિક કંટ્રોલે તરત જ વિમાનના પાઈલટનો સંપર્ક કર્યો અને તેને નજીકના એરપોર્ટ પર ફ્લાઈટ લેન્ડ કરવા કહ્યું.

જ્યાર બાદ એટીસીએ વિમાનના પાયલટને જામનગરમાં ભારતીય વાયુસેનાના એરબેઝ પર વિમાનનું ઈમરજન્સી લેન્ડિંગ કરવાની સૂચના આપી હતી. આ એરપોર્ટ પરથી માત્ર એક જ પેસેન્જર ફ્લાઈટ ચાલે છે અને તે પણ સવારમાં. મળતી માહિતી મુજબ, આ વિમાને 9 જાન્યુઆરીના રોજ બપોરના 12 વાગ્યે મોસ્કોથી ગોવા માટે ઉડાન ભરી હતી. આ વિમાનમાં 236 મુસાફરો સહિત કુલ 244 લોકો સવાર હતા. જેમાં 8 ક્રૂ મેમ્બર્સ પણ સામેલ હતા. જો કે તપાસમાં ફ્લાઈટમાંથી કોઈ શંકાસ્પદ વસ્તુ ન હતી મળી.