મોરબી જીલ્લાના વિવિધ વિભાગોની કામગીરી અન્વયે ’દિશા’ કમિટિની બેઠક યોજાઈ
ખાસ-ખબર સંવાદદાતા
મોરબી કલેક્ટર કચેરીના સભાખંડમાં ડિસ્ટ્રીક કો-ઓર્ડિનેશન એન્ડ મોનિટરિંગ કમિટી દિશાની મીટીંગ સાંસદ મોહનભાઈ કુંડારીયાના અધ્યક્ષસ્થાને યોજવામાં આવી હતી. આ બેઠકમાંસાંસદ કુંડારિયાએ શ્યામાપ્રસાદ મુખર્જી રૂર્બન મિશન હેઠળ થયેલા કામોની વિગતો જાણી તેમાં નવી આંગણવાડીમાં બાંધકામ અને રિપેરીંગ અંગેના પ્રગતિ હેઠળના કાર્યો જલ્દીથી પૂર્ણ કરવા તાકીદ કરી હતી જ્યારે મનરેગા યોજના હેઠળ રમત-ગમતના મેદાનો તેમજ સામૂહિક કામો અંગે ચર્ચા કરી હતી.પ્રધાનમંત્રી આવાસ યોજનામાં જે આવાસોનું બાંધકામ બાકી રહી ગયેલ છે તેને ઝડપથી પૂર્ણ કરવા સૂચના આપી હતી અને મોરબી નગરપાલિકામાં જે પ્રોજેક્ટ અધુરા છે તેની સબંધિત એજન્સીને કામ જલ્દી થી પૂર્ણ કરવા તેમજ આ અંગે કમિટી બનાવી 15 દિવસમાં અહેવાલ તૈયાર કરવા સાંસદ દ્વારા સૂચના આપવામાં આવી હતી.
મોહનભાઈ કુંડારિયાએ સંકલિત બાળ વિકાસ સેવા યોજના હેઠળ દત્તક લીધેલા બાળકોને મળતા પોષણ અંગે જાણકારી મેળવી તેમનું મોનીટરીંગ જાળવવા અને મધ્યાહન ભોજન અંગે જાણકારી મેળવી સંબંધિત વિભાગના અધિકારીઓને જરૂરી સૂચનાઓ આપી હતી તેમજ ખાણ ખનીજ વિભાગ વિશે ચર્ચા કરી ઉપસ્થિત થતી પરિસ્થિતિ અંગે પણ ચર્ચા કરી હતી. આ બેઠકમાં નાયબ જિલ્લા વિકાસ અધિકારી ઈલાબેન ગોહીલે બેઠકનું સંચાલન કરી સંબંધિત વિભાગના અધિકારીએ દરેક પ્રોજેક્ટમાં થયેલી કામગીરી રજૂ કરી હતી જેના આધારે કેન્દ્ર તથા રાજ્ય સરકારની સંકલીત યોજનાઓમાં મોરબી જીલ્લાઓમાં થયેલા કામોની સમીક્ષા કરવામાં આવી હતી.
