મોરબીના માર્કેટિંગ યાર્ડમાં કપાસ, મગફળીની ધૂમ આવક

1670 ક્વિન્ટલ કપાસ, 621 ક્વિન્ટલ મગફળીની આવક: ખેડૂતોને કપાસનો રૂ. 1820 અને મગફળીનો
રૂ. 1465 જેટલો ઊંચો ભાવ મળ્યો

ખાસ-ખબર સંવાદદાતા
મોરબીમાં દિવાળી બાદ હવે માર્કેટીંગ યાર્ડ ધમધમવા લાગતા કપાસ, મગફળી સહિતના પાકોની આવક ધીમે ધીમે વધવા લાગતા યાર્ડમાં હવે પુષ્કળ જણસીઓની આવક થવા લાગી છે. આજે 1670 કવીન્ટલ કપાસ અને 621 કવીન્ટલ મગફળીની આવકથી યાર્ડ ઉભરાયું હતું અને પોષણક્ષમ ભાવો સાથે હરરાજી થઈ હતી.

મોરબીના માર્કેટીંગ યાર્ડમાં આજે કપાસ સહિતની જણસીઓની ધૂમ આવક થઈ હતી જેમાં 1670 કવીન્ટલ કપાસ અને 621 કવીન્ટલ મગફળીની આવક થઈ હતી સાથેસાથે 158 કવીન્ટલ ઘઉં, 52 કવીન્ટલ તલ, 23 કવીન્ટલ જુવાર, 12 કવીન્ટલ જીરું, 62 કવીન્ટલ ચણા, 72 કવીન્ટલ અડદ, 44 કવીન્ટલ ગુવાર ગમ સહિતની જણસીઓની આવક થઈ હતી. ખેડૂતોને કપાસનો નીચામાં નીચો રૂ. 1700 થી રૂ. 1820 જેટલો ઉંચો અને મગફળીનો નીચામાં નીચો રૂ. 1001 થી રૂ. 1465 જેટલો ઉંચો ભાવ અને ઘઉંનો નીચામાં નીચો રૂ. 486 થી રૂ. 572 જેટલો ઉંચો ભાવ મળ્યો હતો.